DR.R.LALTHANGLIANA DINHMUN

A mimal chanchin lam aiin Politics a a dinhmun mek leh dinhmun tura lang kan thlir ho dawn a ni.

POLITICS KAL TAWH -

1998 hma lam khan MP-ah a lo ding ve tawh a, a tling zo lo. 1998-ah MLA ah thlan tlin niin Rural Development Minister a ni a, a lar vet vet hle. Hall te hawngin thingtlang lam a tlawh nasa a, a hun lai khan zâwn hut hut pawh a hlawh nasa viau mai. Rei vak loah a Portfolio, RD chu Pu Aichhinga(L) kutah dah a ni a, a hrisel lo nen RD chu a reh ta raih raihin a lang.

2003 inthlanah tling lehin School Education a chang zui leh a, SSA-a bul ṭan chhoh dan leh kalpui dante Zoram mai ni lo, State dangte'n an hmu a, an rawn zir chiang hial a ni. 2008-ah an Sorkar a tla zui leh a, khatih laia SSA a lo kalpui hlawh tlin tawh aṭang chuan Item 11 lai chu an kalpui zui theih tawh lohin a awm zui niin an sawi.

SORKAR LEHNA HMANRUA -

MNF tlin lehna tur atana thawhhlawk ber pawh a tih theih ang. Party Vice ni chhoin 2013 atang khan theihtawp a chhuah leh a, a hriate sawi dan chuan 2013 aṭang khan Mizoram hi a dung zawngin vawi thum a fang chhuakin an sawi a, khaw hrang hrang Party Worker pawh hmelhriat a ngah hle niin an sawi. 2013-ah an la tling zo chuang lo. Hnam Run a tlawh nasat avang leh a zin nasat avangin a thawhna Pachhunga University College-ah chuan a tuitlak loh phah deuh hialin an sawi.

Thathlah leh beidawng hauh lovin a bei zui a, 2018 inthlan tur atan hian lehkhathiam Candidate ṭhenkhat hi a sawm chhuah liau liau niin an sawi. SEDP an duan chu a fehchhuahpui nasa hle a, Projector hmangin hmun hrang hrangah SEDP zirtirna a pek thu Chanchinthar lamah pawh kan hmu nasa hle a ni.

TUN DINHMUN -

An han sorkar ta a, ṭhenkhat chuan Pu Tawna a lo upa ve hlek tawh bawk si a, Dy.CM Post emaw, Home Department chang tur emawa kan rin ṭhup laiin Sorkar hmingchhiat awlna Health leh Higher & Technical an chantir ta zawk a ni. 2019 December thla aṭanga hri leng chuan khawvel a tuam tih hriain a inbuatsaih nan 3rd February 2020 khan Mizoram Finance Department(CM) ah Nuai 130 vel a dil a, hnawlsak a ni zui. Kha kha lo pe ta se, tun hri lengah hian kan zan kal lo deuhin a rinawm.

Thawk leh khatah Elected OB aṭangin paih a ni thut mai a, a tuang a chhah a, sawi lo mah se a hote/naute thlengin an natzia ka hre ve. Hri lengin min tuam zui ta lo se, a dinhmun hi hniam hlea ring an awm a, mipui Hero a ni laklawh a, dah tet hleih theih si lohin a awm ta tlat niin a lang. Inthlan lehah chuan Candidate chan tawh loh hial te, Minister aṭanga paih thlengin sawi rik a awm hman a, hri lengin a hrut rual ta hlauh zawkin a lang.

SEDP-ah chuan a Department chan Health pualin an dah tlem hle a, hri leng doa buai karah Health Department chu Audit thut a ni a, Department dang chu a tahtawla Audit zel tur anga sawi a nih laiin Audit ve an nih thu hriat zui a ni lo. Hri a la leng reng a, ani kher lo hian Health hi chang ta se kan hniam ngawt ang tih hi mi tam zawk ngaihdan niin a lang a, Block leh Chhimlam Headquarters-a a lamṭang nia langte thlauhthlak zeuh zeuh an tawh chhoh laiin hri leng erawh a hmachhawn nghauh nghauh mek a ni.

A TIH FUH LOH -

MNF Sorkar hlima Congress Budget Pass tawh, hman mumal hman loh lo awm ṭeuh kha a hmanralna kawngah amite a duhsak uchuak niin an sawi a, Headquarters-a nihna nei leh MNF chhungkua tak tak ni lo, amah puitute a vulh nasa nia an sawi khan Hnam Run GS rualah lamṭang a nei mang lo niin an sawi a, Vice President aṭangin chhuanlam tur awm miah lova paih zui a ni. Pu Zorama thlak tur leh Next CM tia mipui tarlan zauh zauh ṭhin hi thikna a awm tel thei bawk.

Baptist Kohhran Upa niin Baptist Kohhranah hruaitu nihna hrang hrang a nei a, Kohhran ang zawnga duhsakna lantir nasa thei tak niin an sawi. A lawina Kohhran tan chuan thil lawmawm tak a nih theih laiin Baptist ni ve lo Worker leh mipui mit a thip thei tih hi ngaihtuah thleng pha lo khawpin Kohhran hian a bual nasa ve thei bawk.

HMA THLIR -

Mi pahnih, Pu Hawla leh Pu Zorama te hi ze inang hauh lo an ni a, an inanna awmchhun chu an thlah tawh, an Vice President paih tawh tungding leh vuan nawn mai mai tawh ngai lo an nihna hi a ni.

Chutiang miin Vice President aṭanga a paih, Pu Thangtea hian dinhmun sang zawk chu sawi loh dinhmun ngai awh leh pawh thil harsa tak a nih dan chu keini aiin a chian zawk ka ring. Hmanah khan boruak chhe ven nan Term khat chhung khawhar taka an dah, tuna Assembly Speaker ni ta hi 2018 inthlan hmain MPCC Treasurer, Pu Zodintluanga khan a bial Khawzawl ahte zinpuiin Nomination siamtute ṭhutkhawm hma hmain Congress Ticket-a a din leh dawn thu a sawisak a, Congress-in an mamawh em lam ni lovin amah avanga Party dinhmun hniam thei ven nan inthlan dawn meuh kha chuan an tiṭha fál hle a ni. Mahse Congress zia hrechiang chuan lawm viau ahnekin MNF a zawm rup mai a nih kha.

Pu Thangtea pawh hi tuna an dah khawhar ruk viau ang ai hian mipuiah a Hero laklawh si a, Party hniamna tur vengin 2022 chhoah chuan an ti ṭha ve leh hle thei bawk a, mahse MNF Party zia tak tak man tawhtu a ni a, a dinhmun tur hi a thlir thiam viauin a rinawm. Term chanve pawh hman hmaa kawng zawh tur tihchian rup chi lah a ni si lo.

Pu Thangtea hi mi chak a ni a, MNF ah hian eng tikah mah President thlaktu a ni ngai dawn lo tih a chiang. Ani ai chuan mipui hnawl tawh Pu Auva te, Pu Thlenga ten rin an hlawh ta zawk a, tlin vanglai pawha MLA tling zo lo Pu Zawma te chu Party ah an tlatlum zawk a, tuna an hmatawng (Frontman) tur thlirsak hian inthlan hmachhawn leh hi a zuamawm zek zek lem loh ang.

Khawi Party ah pawh lut se boruak siam dawrh tham tur a ni a, mipui ngaihven chi mihring a ni. Hruaitua buai ru ang reng tak, Congress-ah hian khaipa tak tak ni turin lut thei se, Congress kaithotu hmanraw ropui tak a nih theih a rinawm. Chutiangin ZPM hian dinhhmun sang tak chelh turin ko lut thei se, vawrh kang dawrh thei tur a ni ngei bawk ang. MNF hian an dinhmun hriain CM Candidate ah vawrh leh thut se, kan nuih zat, kan hne nghal deuh der Party hian an chhawr tangkai viau thei bawk. Tunah a nihna leh tlin tawk angin par chhuak thei lo mah se, Politics ah chuan a hma hun a eng hle a, a zawh thiam leh thiam lohah pawh a innghat ve ngei ang.

TLIPNA -

Mimal taka ka thlirna chhan chu 2023 inthlanah hian mimala kawngro su thei tak tur, boruak ti danglam pha tur zinga ka ngaih vang a ni. A sukthlek hian awmzia a la nei pha ngeiin ka ring e.