Thuthlung nge Thuthlun?

Thuthlung Thar nge, Thuthlun Thar?

Thuthlung bâwm nge, Thuthlun bâwm?

Kan Bible-a ‘Thuthlung Thar' tih hi ṭawngkam dik a nih leh nih loh pawh ngaihtuah lovin dik anga ngaiin hei chen hi kan lo hmang ta a. ‘Thlung' tih hi ‘Thlang–thlan’ ‘Thleng–thlen’ tihte anga a ze chi khat atan ‘thlun’ tih hi hman ve tur a ni em? Hman ve tur a nih chuan ‘Thuthlung Thar' tih hi ‘Thuthlun Thar' ‘Thuthlung bâwm' tih hi ‘Thuthlun bâwm' tih zawk tur a ni dawn lo'm ni, tih hi ka sawi tum chu a ni.

Mizo Bible bu pumpuia heng bung leh changahte hian loh theih loha an hman dikna lai a awm a. A en peih tan tlem azáwng han tarlang ila (lehlin thar).

Gen. 9:15, 21:33, Exodus 24:8, 34:15,27, Deut. 20:12, 31:16, I Samuela 20:8, 22:8, Lalte 8:21, 2 Chronicles 23:16, 29:10, Sam 50:5, 59:21, 105:9, Ezekiela 37:26, Joba 41:4, Hebrai 8:7, (adt). Heng zawng zawngah hian ‘thlung' hi ‘thlun’ tiin an lo hmang dik vek a.

Entirna'n: 2 Samuela 4:3-a 'Lal chuan anni chu Hebron khuaah chuan thu a lo thlunpui a' tih hi 'a lo thlungpui a' lo ti ta se emaw, Hebrai 8:7-a ‘Thuthlung hmasa kha sawiselbo ni ta sela thlun nawn a ngai lo tur' tih hi thlung nawn a ngai lo tur' tih lo ni ta se la, ‘Het sala' kan ti duh mai emaw a ni si ang. Hengte aṭang hian Mizo ṭawnga ‘Thlung’ tih hi ‘thleng-thlen,' ‘thlang-thlan' tihte anga ze chi khat atan ‘thlun' tih hi hman ngei tur niin a lang ta e.

'Thuthlung Thar' tih hi Mizo tawng dik a nih a, 'Thuthlung bâwm' tih hi Mizo dik ṭawng a nih ngai chuan, Lunglei khawpuia veng hming pakhat 'Sethlun kâwn' tih hi 'Sethlung kâwn' tia thlak a ngai ang a. Kan Bible bu tawp bera ‘Thupuan' tih pawh hi ‘Thupuang' tia thlak a ngai ang. Mahse ‘Thuthlung Thar,’ ‘Thuthlung bâwm' tih ang chiaha dik lo hi a ni si ang.

Ka hrui thlun chu naupang ninhleiin an lo vai chat thei ang a, ka hrui thlung chu an vai chat thei lo vang. Ka bawng thlun pawh tlangval hawklakin an lo chhuah thei ang a, ka bawng thlung erawh chu an chhuah thiam lo vang. Hetiang chiah hian Pathian thuthlun chu mihringin kan bawhchhe theiin kan bawhchhe thin a, a thuthlung chu bawhchhiat a har viau lo vang maw?

Kan Lehkhabu Thianghlim (khaih)-a lehkhabu hi nge thianghlim a chhung thu zawk hi? Pathian Lehkhabu tih nge dik Pathian Thu Thianghlim bu? Hei pawh hi chai fe tham a awm âwm e. A kâwma ṭawngkam dik lo nia lang ‘Thuthlung Thar' tih chiang reng mai tur hi ṭhangthar mi thiam leh thil chîk mite an la rawn chhuak zel ang a, an la rawn hai chhuak si ang a, keini chhuan hi min la rawn dem palh ang e! Kan mi thiamte kha han che teh u.

- Upa Saikhuma