POLITICS

Vântlâng aurinna aṭanga gas sem hun tur an puan leh Sawrkarin lo hal ni tur a puan te kan hre fo va. Hengte hi politics a ni tih chu kan ngaihtuah lem lo maithei. Hei bakah tui sem te, kawng siam te leh insak te thleng hian politics leh a kaihhnawih vek an lo ni. Tih tak takah chuan tisa thila kan nitin khawsak dan tur ruahmanna zawng zawng hi politics  vek a lo nia lawm maw le. 

Politics chu eng nge ni?: Politics tih hi Greek ṭawng ‘politika’ aṭanga lâk a ni. A awmzia chu “Khawpui inawpna” (affairs of the cities) tihna mai a ni. Tun hma tak tak Isua pian hma daihin  mifing Aristole (384-322 B.C.) chuan ‘Politika’ tih lehkhabu a lo ziak tawh a. Chung hun lai chuan Greece ram khawpui hrang hrangah inawpna hran an nei a, tu thuhnuaiah mah an awm lo. 

Chung khawpuite chu City-States an ti a, tunlai ṭawng takin independent sawrkar vek an ni. Mizote hun hmasaa khaw tina lal an awm te pawh kha a  ang thei ang. Chûng an City State lian deuhte chu Athens, Spartan, Thebes, Corinth, Delphi leh a dang tam tak te an ni. Greek ṭawng chuan polis tih hi khua tihna mai a ni a, Acropolis chu khaw hmun sâng, Necropolis chu mitthi khua, Decapolis chu khaw sâwm, Tripolis chu khaw pathum,  etc an ti ta duah a. Chutianga an inawpna fel tak chu politika hi a ni. Chu thumal politika chu kum 1430 velah English-a siam  remin politics tih hi a rawn piang ta zel a ni. 

Heta chhinchhiah tur chu politics chu vantlang ṭhatna tura rorelna hi a ni a, chuta  thuneihna bulṭhut chu mipui an ni a, an aiawha an thlan chhuah mi tlemtein rorelna an kengkawh ṭhin - chu chu democracy kan tih hi a ni. Greek ho hian democracy lo pianchhuahna ram nih an hauh reng fo bawk. 

Chutiang zêl chuan politics chuan sawrkar indin dan zirna political science a rawn hring a, political science aṭang chuan Sawrkâr inrelbâwl dan leh a hmanruate zirna public administration a rawn piang leh ta zel a ni. Tichuan, politics hman dan azirin democracy hmanga inawp dan hrang hrang - inthlah chhâwng lal awpna (monarchy) sawrkar, mipui thlan sawrkar, parliamentary form of government emaw presidential form of government leh mimal rorelna autocracy (dictatorship kan tih mai) te a rawn awm ta duah mai a ni. Rorelna danglam tak, 'Kleptocracy' erawh hi chu awm thei tura mawi pawh a ni lo. 

Engpawhni se, politics chuan mipui vantlang ṭhatna tura ro inrelna fel tak a kâwk ber a nih chu. Chuvangin, a hmaa kan sawi mipui mamawh - gas, tui, in leh kawng leh vantlang tana mamawh apiang te fel leh dik taka pek chhuah kha politics tum ber chu a ni. 

Politics tihchingpenna a tam: Khawvel ṭhang chho zelah hian tun hmaa politics dik tak kha hlamchhiahna a lo tam chho ta hle a. Thuneihna pumhmawm chi dictatorship te chu sawi ta lo ila. Mipui aiawha roreltu, mipui thlan chhuahte ngei pawhin kha politics dik tak kha kalsanin mahni mimal leh Party tihlen tumna  hi khawvelah a tam ta êm êm mai a. Mipui hamṭhat rualna (egalitarian state) ai chuan mahni pawl leh chhûng leh khatte invulhna, (nepotism leh cronyism) ah politician te an kal nasa a. Inthlanna te pawh a hming chuan awm ve ṭhin mahse, vote tihchingpen te, vote lei leh sawrkar siam tura MP/ MLA inleite a hluar ta em em a. Chu chuan mipui rorelna democracy hi nuihzatthlakah siamin inawp dan famkim lo tak, mahse a thlakna kan hriat chuan si loh (necessary evil) ah kan chhuah ta dêr niin a lang. 

Churchilla sawi ang deuhvin indo lai phei chuan democracy hmanga rorelna hi rorelna vuaicha ber a lo ni ta hial a ni. Indo lai kher lo pawha tunlai politics kal dan dik lo chu mi pangngai chuan an hre hle vek a ni. Hei hi politics principle bawhchhiatna a ni a, a dik chiah chuan politics pawh a tling tawh lo  zawk hial awm e.

Mizote politics thlirna: Kan han sawi tak êngah khian kan rama politics kan khelh dan hi han en ta ila. Mizote hian kum 1946-ah politics hmelhriat ṭanin vawiin thlengin Sawrkar chi hrang hrang - District Council, UT leh State-ah te kan kai chho ta a. Political Party hrang hrang nei vein chûngte chuan inthlan an chuh a, kan aiawha rorel turin an inpe a. Heti chen hi chu politics pang­ngaiah kan la ngai thei ang. 

Mahse politics tak tak, mipui aiawha mipui ṭhatna tura rorelna chu kan hlamchhiahna  a rei tawh a. Politics khel lovin party politics, huap zim tak kan khêl chho va. Political party te tum ber chu inthlanaa an party an chak chuan an party mi leh sa te duhsak bikna neih tum rân vek an lo ni ta a. Hei hi thu mai ni lovin a takin kan hmu reng mai. Inthlan dâwna an campaign hla ber chu, “Kan party in thlana kan chak chuan chuan fatu hluiah in kil ang” tih te pawh inthlahrung miah lovin an sawi ngam tawh a ni. 

Hmanni lawka Local Council leh Village Council inthlan dawna Minister ṭhenkhatten local TV channel-a ruling party thlan tlinin lukhawng a neih turzia leh oppo­sition candidate thlan tlin a nih chuan an ro turzia  thu an sawi te kha kan la theihnghilh lo ang a. Khatianga huap zim politics kha Mizote hian kan khelhna  a rei tawh a. Kan party mi ni lo chu kan chhung leh thisen zawmpuite pawh ngaihsak duh lo khawpin kan politics hi kan sâwr zim ta em em mai a nih hi. Tuna LADC inthlanna turah pawh hian ruling party lam thlantlin hlawk turzia sermon-a hmanga vote zawn (canvassing) zel niin a lang. 

Engtiziaa kan politics hian kawngbo ta nge ni?: Mizote hi kan pi leh pute aṭanga mi rinawm leh duhâm lo ni-ah kan inchhâl ṭhin. Mahse khua kan lo hawi zau ve ta deuh va, ram leh hnam changkâng zawkte thil neih chu kan awt ve ta a. Chung kan thil awh nei tur chuan sum chu a pawimawh hmasa ber niin kan hria a. Chu sum hlu tak chu mi ṭhenkhatin rinawm tak leh thawhrimna nena an hmuh laiin  tam tak chuan hahdam taka dâwt sawi chunga neih kan tum a, a lo theih ve zel bawk si a. 

Chuvang chuan engkim mai hi suma chantir kan tum ta emaw tih turin thil hlutna chu sum nen kan teh ta zel a. Chutiang chuan politics pawh sum siamna chi khat, hausak pui tur emawa ngaiin thudikin a daih loh thlengin politics-a hamṭhatna kan ûm ta a ni ber. 

Sawrkar kal tawh leh Sawrkar kal lai mek te an dang chuang lo. Party mi leh sa duhsak bikna te hi lo awm zauh zauh pawh ni se, âwm ve rengah a ngaih theih. Mahse engkim mai ruling party ta tura kan ngai ngawt mai ṭhin hi kan kalsual nasa hle tawh a ni. Chuvang chuan kan thlan tlinten sawrkar sum leh hmanraw hmanga an invulh nghek nghek pawhin ngaiah kan neih mai a, kum nga chhunga an mawm hle a nih pawhin, “Ruling Party an ni miau va” kan ti liam zel. An thawhsak tur mipuite aia an hausa chak zawk a nih pawhin mak kan ti tawh lo. Hetianga rorelna hian rinawm lohna (corruption) a siam ṭhin avangin 'Rûkrute rorelna' (kleptocracy-rule of thieves) an lo tih ṭhin kha kan thleng ang tih pawh a hlauhawm ta hial mai. 

Khawvela hmasawnna tehfung hriat hlawh, Human Development Index pathum - hriselna, zirna lam leh mimal tin thawh chhuahah te hian Mizoram hi in teh ve ila, kan san viau a rinawm lo. Kan sawrkar neih ṭhin te hian hna an thawk miah lo chu a ni bik si lo. Hmasawnna hmuh theih tam tak an thawk ve ṭhin. Mahse, party politics ringawt an atchilh fo avang hian hmasawnna a kai rual thei lo va, kan hrisel tawk lo va, kan zirna in te a sawprawp a, kan sum lakluh a chau em em reng mai a nih hi. 

Hetiang taka kan politics a lo ṭawp tak avang  hian Kohhran X-ray hmanga en chuan kan politics chu a nelawm loh ta em em mai a. Kohhran hruaitute zinga mi va zuang lut ve te pawh kan hmuh dan a hê ta vek a, dâwt sawina hmun leh inhêkna hmuna va lut teh châwkah kan chan a, an Pathian thusawi pawh kan ngaithla tui meuh tawh lo a nih hi. Party office-a an thusawi leh Biak Ina an thusawi a in persan êm a ni. Engati nge kha politics ṭangkai leh ṭha tak, mipui thlavâng hauhtu ber ṭhin kha thil tenawm taka kan chhuah tak mai le, tih hi zawhna chhan har tak a ni fo dawn a ni. 

Politics hman ṭhatna ram apiang an changkang: Ram tam takin politics leh democracy an kaihlek laiin ram ṭhenkhatah chuan politics an ṭhatpui em em thung. Kan sawi châmchi Singapore leh Japan ram te, khu lamah United Kingdom leh USA te an changkânzia kan sawi fo va. Fel famkim lo mahse, politics ze ṭha an la chhawm nung zel a, mipui an vannei a ni mai.  

Kan chenna India ram hi dan leh hrai ṭha tak takte neiin Constitution sei leh chipchiar ber nei ram ni mah ila, Centre leh State hrang hranga an politics te en hian mipui hi chu hmanrua lekah min hmangin politiciante hian in vulh len an tum ber ṭhin niin a lang. Politician leh party atchilh ho tan chuan mipui mimir hi chu mihring pawh ni zo lovin vote kal thei kan ni ringawt mai a ni. 

Kawng a la awm em?: Awm e. He kan ram politics kal dan dik lo tak mai hi siam ṭhat theih a la ni. Chu mi atan chuan kan politician-te hian rilru thlâk danglamna, party mai ni lova mipuite hmangaih tak takna neia ram an hruai a ngai. Chutah chuan politics chu a nihna ang takin kan phur chhuak tawh ang. 

Pathian hming lam reng chunga sawngnawi reng ai chuan sakhaw ngaihsak vak lo pawha ram tihma­sawntu nih a ṭha zawk ang. Chu political revival chu kan neih hunah politician-te tân dâwt sawi fo leh inhêk tawn fo te hi a ṭul tawh lo ang a. Sawrkar siamtu party pawhin huap zo takin Mizo mipuite tan ṭhahnemngai takin party mi leh mi lo thliar tawh lovin an thawk thei tawh ang. 

Ei leh barah pawh intodelhin kan dân siamtute hian politics khela hausa nih hi an inthlahrung tawh ang a, mipui pawhin kan zah em em tawh dawn a ni. Chu hun chu nghahhlelhawm tak a ni.