Dan ngaih pawimawh vang nge, Politics rilru chhiat vang zawk?

ZPM-in kum 2018 in­thlan dawna Chief Minister candidate atana an puan, amah ngei pawhin CM a nih ve theih chuan "Super Chief Minister nih ka tum" a tih avanga 'ZPM Super CM' tia nuihsawh taka an sawi zui ṭhin Serchhip Bialtu MLA Pu Lalduhoma chu Mizoram Assembly Speaker Pu Lalrinliana Sailo (Chalfilh bialtu) chuan 'dan ang taka kal a duh avangin' MLA aṭangin a ban ta rup mai a le. 

A ban chhan hi amah kan Speaker hian ban ṭul a tih vang ni lovin MNF zinga an MLA junior (first timer) 12 in ban tura an hek vang a ni. 

Heng MLA 12 zingah hian politics lama future bright tur tak tak, lehkhathiam leh khaw hawi zau awm tak takte pawh an awm nachungin an chet duh dan en hi chuan, "Politics a nih tawh chuan tih hreh pawh kan nei love," ti angin an rawn che ta a ni a, "Kan party ṭhatna tur a nih chuan mi party ti chhe turin eng ang pawhin ka kal ngam, mipui laka hming chhiat pawh ka inhuam," an rawn ti a ni ber mai. 

Kan MLA junior (first timer) 12 te hian an hma lamah politics khelh zel an duh a nih chuan, "Khami ṭuma ZPM CM candidate, "A ZPM leh lutuk a, ZPM Office-ah mi a lawm lut' tih avanga mi hektu 12 zingah khan a tel," tia an kawh zui tura ram hmangaihna vang pawh ni lo party hmakhaw ngaih vanga an awm duh hi chu an lainatawm lehling tiin kan sawi thei a ni. 

Chutichuan han sawi ta zel ila, heng kan MLA te hi MNF zinga MLA thar 12 an ni lova, MNF zinga MLA thar (first timer) zingah hian Pu TJ Lalnuntluanga, Pu Robert Romawia leh Pu Lalrintluanga Sailo an la awm a ni. Hengte hi chu hmingchhe kum hlun tawh tur 'Hektu' zingah an tel lova, MLA tlin vawi khatna zingah rau rau Minister ni bawk, hektu aṭanga awl tir bawk - chawm bawka hawp bawk an han ni bik hi chu MLA 12 tan hi chuan thik ngei ngei tur an ni. 

Pu Duhoma hian dan a lo bawhchhia a, a thlangtute a phatsan (defect) a nih chuan rang takin MNF Party President hian hek nghal hmak mai tur a nia, a nih loh pawhin an Cabinet Minister ni phak chin MLA senior te hian hek se a inhmeh zawk daih a ni. Mahse mipuiin a hektute an dem dan tur hre sa reng chung hian MLA zinga vawi khat tlinnaah pawh Minister leh Deputy Chief Whip ni ve phak lo zawng kha an han hek tir a! MLA 12 te hian dan ngaih pawimawh vangin an hek lova, party thu hmu in politics takin an che a ni zawk tih chu Mizoram hian a hre ta a ni. 

Engpawhnise hektu ni chunga Krismas hman te, hektu ni chunga dam chhung hun hman tawh turte hi a tira an duhthlanna pawh ni lovin party politics tui nu an chungah a tla ta a ni a, heng MLA 12 te hi chhinchhiah an ni dawn ta a ni. 

Amah Pu Duhoma teh­reng pawh hi ZPM Symbol hmanga ZPM Flag leh ZPm Manifesto nena campaign vanga Serchhip bialin MLA atan an thlan tlin kha a ni a, a lo ZPM em alawm tia hek pawh a ngai tawh lo zawk asin mawle. 

Kan politics kal pui duh dan hi chu Biak Ina luh pui ngam a va har tawh dawn ve Ka Unau.