Rempuia R Lutmang kan chán ta
(Rempuia hi a nupui fanaute nena an chenna in Ramhlun South (Vengthlang), Aizawlah June 23, 2024 Pathianni chhun dar 12 khan vui liam a ni)
Kum 43 mi chauh ni si tunlai ṭhangtharte zinga ziak mi ṭhang duang tak, Mizo ṭawng hmangaih tak, a bikin thu mal hman dan chhui kawnga Zo fate arsi êng tak ni zel tura inher chhuak mek, Vanglaini chanchinbu leh chanchinbu dangtea thu ziak thawh taima tak, social media leh chanchinbutea a thu ziaha 'Rempuia R Lutmang' tia indah ṭhin, a hming tak erawh 'R Lalrempuia' ni si hi Ratu khuaah December 16, 1980 khan lo piangin, Synod HSS aṭangin kum 14 mi chauh a nihin HSLC a pass a. A hun laiin Ratu khuaah matric pass naupang ber record a ni.
Lehkha zir zelin B.Com. a zo. B.Com. a zawh hnu hian kum 2008-ah State Bank of India-ah clerk-a lûtin, departmental exam-in officer scale I-ah kai sangin Bangalore leh Zokhawtharahte a awm a, scale II-a a kai san hnuah Khawzawlah dah a ni. Khawzawl aṭangin Regional Office, Aizawlah June 15, 2025 khan sawn a ni a, kar khat emaw chauh hnuah hun lo takin June 22, 2022 khan chatuan ram min pansan a ni. Mizo Writers' Association leh Mizo Academy of Letters Whatsapp Group-ahte chuan uitu kan tam hle.
Mizo thu leh hla lama tui em em mai a ni a, a tuina chu social media leh chanchinbu hrang hrangahte Zoṭawng Thu Nawi tia thupui vuahin chhuah ṭhin a ni. Heng a thu ziah Zoṭawng Thu Nawi hi lehkhabu pakhatah fûn khawmin kum 2020 khan tihchhuah a ni bawk.
Zoṭawng hman danah amah anga duhtui hi an la rawn chhuak zel ang; thu ziaktute pawh an la piang zel bawk ang. Mahse, Rempuia R Lutmang danglam em em bikna chu–Mizo ṭawng thu mal hrang hrang khel nana chanchinbutea thu tawitê a ziah pawhin tun hmaa an lo hman ṭhin dan hriat nan lehkhbu hlui leh chanchinbu hlui tak takte a dap chhuak tam peih hle ṭhin hi a ni a, he a taimakna leh thawhrimna hi Mizo hnam tan a hlu em em a ni. Hemi kawngah hian tuin nge a hnung zui ta ang le?
A thu ziah hnuhnung ber pahnihte–'Grammar tih ṭuah hum reng mai hi' tih Vanglaini chanchinbu June 22, 2024 leh Vanglaini chanchinbu thoa tihchhuah 'Felfai' June 24, 2024.
Rempui, mangṭha le. Kan hre reng ang che.
- Dr JT Vanlalngheta