Dik lo chu dik lo

Hmana misual an tih kha tunah sum a nei a, midangte tan a pawisa a thawh a, Mizote chuan mifel an ti ta mai a. Hmanlai Robinhood-a ang ni ve si lo, sorkar aṭanga sum eirua inti lian, khehpuam leh chiah-puam hmanga inti lian, smuggling lian tak kalpui hmanga inti hausa hi Mizoramah mi tam tak an awm ve ta reng mai.

Kan titi naah kan sawi a, lang lo lamah kan phun sep sep a, "Saw pa saw hmanah chuan eiruk avangin a hmingchhia a, a chet duh dan pawh chutiang chu a ni a, mahse eng tin tin emaw thil dik lo tih hnial lo na na na chu a lo hausa ta thut a, tichuan mipui lawm zawng hriain midangte tan a pawisa dik zan lova a lakluh chu a hmang a, mipui chuan mi thilphal leh mi ropui chhuahin an chhuah tawh," kan ti a, kan phun ral mai mai.

Titina dangah chuan, "Saw pa saw chu ka hre chiang a ni. A background ka hria a, a sumdawnna kalpuina pawh a la rei vak si lova, heti em ema a lian hi chu mak ka ti lo thei lo.

Chutiang chuan a ti e, tia a khehpuam emaw a chiahpuam emaw hre ve lo mah ila, sumdawnna kal-phung pangngaiah heti lekah a len theih loh," an ti sup sup a, chu chu a tawpna a ni leh ta a.

Khawilaia thil inti hre deuh ṭhianho titi chuan, "He pa pawh hi in hre chiang lo a ni. Tun hma
aṭanga Myanmar nena connection nei tlat, smuggling chi hrang hrang kalpuitu a ni a, tunah hi chuan a hausa tawh a, a inbengbel a sumdawnna dang khawih angin a inlantir a, mahse a sum siamna hi chu smuggling a ni.

Hetiang mi hi an awm nual a nia," an ti leh a, chuzawng chu a ni leh mai.

Mipui nawlpui ti ti chuan, "Han en reng reng hian a in hi a hlawha a sak a ni thei lo. Thla khatah nuai pawh a lalut tling lova, nuai 200 man vel in sak hi a hlawha sak theih a ni lo. A pawisa lak dan a dik lo, a eiru a ni. A car mante hi a tam. Huan zau deuh a la nei. A fate sikul
ṭha ber berah phaiah a dah a, mobile phone sing 5 chuang man an nei fur a, thlawhnain an thlawk thei reng bawk si," an ti a,
ṭhenawma eiru nia an puhte an han sawi leh a, titinaah a tawp.

Ka unau, hetiang avang hian beidawng duh suh aw. Dik chu dik a ni reng dawn. Dik lo chu dik lo a ni reng dawm. Dawt sawi, eiru, smugg-ling-a inti lian leh dik loa nung hi chu an hmuingil tluantling chuang lovang, dik chu dik a ni reng dawn.

- C.Lalrammawia