BEIDAWNG SUH

Nipui khaw lum, ṭhal va ek char hun a liam a, ruah tui tam hun Fur hunpui a rawn inher chhuak a. Khua a cheng a, pawn chhuah hleih theih loh khawpin ruah a sur a, khawlai a berh zo a, khawchhiat vanglai phei chuan nula ina han chuan kai a, han len luh pawh a inthlahrunawm zo a, mahni inlumah kan tawm chawt chawt a. Tunlai thiamna hmangin kan khumpui laizawl aṭang kan duh berte biahthu kan han hlan a, tui takin mutmu kan tuah zui veleh mai ṭhin.

Chu fur pui hun chu liam vat vat se tiin duhthu kan han sam zui a, kan duh ang ngei chuan fur hun chu a han liam a, kan pi leh puten hunpui a zawnga nuam an tih ber ṭhin, Favang a rawn inher chhuak leh a. Boruak a rawn danglam a, khua a lum lutuk tawh lova, a vawt lutuk tawh hek lo. Ruah tui pawh a tam tawh lo - airuah a sur zeuh tih mai loh chu.

Chu favang hun boruak nuam tak chu kan han hmang zo a, thlasik hun, khaw vawh hun a rawn inher chhuak leh a, vun a rawn ro a, vun hnawih (lotion) inchulh loh chuan khawlaia chhuah pawh mi tam tak chuan kan ngam lova. Chu khaw vawh hun, thlasik hun chu a han liam leh a, khaw lum hun, nipui hun a ni zui leh ṭhin. Hetiang ang chiah hi he mihring nun hi chu a ni.

Hringnunah hian kan hlim ber lai leh kan lawm ber lai pawn vanduai chang, lungngaih chang, mangan chang, beidawn chang, chak loh chang a rawn thleng ṭhin a, chu thil chu kan hrethiam lo fo a, beidawngin kan indawm kun fo. Hmalam pan harsa kan ti a, mi zawng zawng aia vanduai bikah leh chan chhe bikah kan inngai fo bawk. Keini aia chan chhe zawk mi tam tak an awm tih ngaih-tuahna chang reng kan hre lo.

Thinghnah leh mau hnahte hian tlak kawlh hun an nei a, pangpar mawi tak takte pawh hian chuai hun an nei. Kumtluang par meuh pawn kum tluan a daih bik lo.

Mahse, chuti chung chuan pangpar mawi tak takte hian a hun taka par an ṭhulh chuang lova, a hun takah thing hnahte pawh chu an rawn chawrno leh a, maute pawn hnah an rawn chhuah leh ṭhin.

Khawvela thil awm zawng zawng mihringte tih chauh lo hi chuan a tira leilung leh a chhunga thil awm zawng zawng siam a, vante kai pharhtu thu hi an zawm em em a, an chantawkah an lung a awi a, an nihna an hloh ve ngai lo.

Thinghnah leh mau hnahte an tlakkawlh a, pangpar te pawh an chuai a, a hun takah an nihna an rawn lan chhuahpui leh ṭhin dan hi ngaihtuah la, beidawnga indawm kun mai lovin hmalam pan ṭhin ang che. He mihring nun hi chak reng tur leh englai pawha hlim reng tura duan a ni lo; hrehawmna leh harsatnate pawh paltlang a, hneh thei tura duan a ni zawk.

Eng thil emaw avangin i mittui a lo tla mek a ni thei a, eng emaw leh tu emaw avanga i rilru natna leh hrehawmna nasa tak avangin mahni intihhlum pawh i lo duhin, i lo tum mek pawh a ni thei bawk e. Tuna i hliam tawrh nasa tak avang khan hmalamah ke vawikhat lek pen pawh harsa i ti a ni mai thei. Chungte avang chuan, i nun khua a lo harin, a lo mal a ni mai thei. Chung thil avang vek chuan hma hun pawh nei ve tawh lo ah leh, nung ve tlakah pawh i lo inngai tawh lo a ni mai thei a, siamtu Pathian hnenah i lo vui viau pawh a ni thei e. Chung i thil tawnte avang chuan hlutna reng nei loah i lo inngai a ni mai thei bawk.

Mahse maw, he mihring nun hi hunpui inthlak danglam ang leh, thinghnahte an tla kawlh a, an rawn chawrno leh ang chiah hi a ni. Tunah khan lungngaihna nasa tak tawk mah la, i hmaah hlimna leh lawmnaten an hmuak ve reng tho che asin.

Eng thil pawh tawkin hma-chhawn mah la, chung ang thilte chu hneh thei tur leh paltlang thei tura siamtu'n uluk tak leh famkim taka a duan che i ni. He khawvelah hian nangmah ang reng reng an awm lova, nangmah tluka hlu an awm lo tih hi hria la, i nunah eng thil pawh lo thleng mahse, beidawng lovin hmachhawn la, mahni in dah hniam ngai suh ang che.

I nuna harsatnate khan an la kiansan ang che a, hlimna a la rawn thleng ngei ang.

- Nawlchunga Chinjah, Siaha