REVIEW OF PRESS MEET OF SRI M.KIKON, BJP NATIONAL SPOKESMAN

November 30-a BJP National Spokesperson-in Aizawl Press Club a media mite a kawm chungchang kha nizan lam TV-ah leh newspaper-ah te chhuah a ni hlawm a. Point ṭhenkhat bik luh chilh ang. 

1. Mr. Kikon kha la nau­pang te mah nise a chezia leh thusawi enin Politician ṭha tak (seasoned politician kan tih ang chi) a ni der tawh. Ka rilru te tein Naga ho ang tal hian engtikah tak Mizote hian National Party Spokesperson te hi nei ve thei tak ang i aw... ka lo ti. 

2. MNF Party-in a thu­sawiah khan zahna chang, inenfiahna chang hre tak ang maw... ka lo ti. Chiang takin, Pu Kikon hian 2018 kum tawpa MNF ti tlingtu chu Central BJP an ni a ti hmiah mai sia. Helaia Mizoram lama MNF unaute'n BJP haw em em leh do ve em ema an insawi chu a lo ni lo tawp tih a hriat chiang ta si. A thu sawi danah khan CBJP chuan MNF hi Party ṭha leh hrisel tak an nih avanga ṭanpui an ni lova... Congress Party hrim hrim 'dan nil' an duh avanga Mizoramah pawh MNF hi pui ta vak an ni tih a chiang. 

Vai Hindu BJP hovin MNF ho chu an rawn campaign pui ta vak ni lovin an sum leh pai mamawh (Election Kharcha) an rawn tum a ni tih pawh a chiang nghal vek a. Chutih rualin Delhi tlanga CBJP-in MNF MP te Parliament-ah Treasury Bench-a an ṭhut tir larh laiin Mizoram Legislative Assembly-ah ve thung BJP MLA neih chhun pawh chu Treasury Bench lama an ṭhut tir ve lo lui tlat erawh MNF unaute hawihhawm loh (ungrateful) zia an ti lang maiah a ngai tih a hriat. 

CBJP hian MNF sawrkar chu an polite loh chhoh viau chuan polite zui reng bik an tum dawn lo tih sawi chiah lo mahse a chiang viauvin a lang. 

(Kei chuan MNF hovin BJP chunga an polite ngam loh chhan ka hre kir kar mai si. Duh thala BJP laka tha ba rulh leh han chet polite ve chu Central a BJP sawrkara tlaktlum lehzual nan pawh  an duh ngei tih pawh  ka chiang, mahse chu chu political suicide ang tur khawpin an ngai laklawh si.) 

3. LADC inthlanah BJP chak se tia a rawn campaign chhan ber pawh chu.... Aizawl lam aṭangin Chhim­lam ADC hote chan ve ṭhin tur Central Schemes hrang hrangte'n an thlenna tur (targeted beneficiaries in ADC regions) an thlen mai ṭhin loh leh uchuak taka lo mismanaged (ADC te tana Central sum lo kal ṭhin sem chhuah leh kawnga buaina) a tam ṭhinzia hria-in Sixth Schedule to the Constitution of India-ah thuk zawk, tam zawk leh awmze nei thei tur zawka Central Sawrkarin a ṭul anga Amendment siam sak an tum tlat a ni tih te pawh chu ADC lama unaute tan chuan "Chanchin ṭha lawmawm em em" a nih reng laiin ADC pawn lamah hrethiam lo lui tlem azawng kan lo awm a ni mai thei. Amaherawhchu, Mizo Kristian taka kan lawmpui a, LADC areas hmasawnna chu Mizoram leh hnam hmasawnna a ni tih kan lo pawmpui thiam a ngai zawk chiang hle tih hriat a ṭha. 

4. Pu Kikona hian Mizo­ram leh Assam ramri buaina pawh chu MNF in Peace Accord kum 1986 a an rawn signed khan an hmanhmawh luatah ramri kha rawn zir chianga ti fel ta lo ni mahse... he Mizoram - Assam ramri buai hi chu Central a BJP sawrkar khuan a chinfel sak thuai dawn. A chhan chu North East-ah BJP hlang emaw BJP telna sawrkar vek neih a nih avangin chinfel a harsat loh tur thu confi takin a sawi a nih kha. 

(NB : Thil pakhat chiang zawk erawh chu Central sawrkar chelhtu BJP hian Mizorama MNF sawrkar dinhmun hi an hriat chian hmel si a, an rawn ngaisang lo mai ni lovin engtia rei nge MNF chezia hi an la digest chho theih ang tih hi rin thiam a har lutuk lo. Pathian leh kan ram tan titu... Mizo National Front te hian Central BJP lakah an dinhmun leh hawiher an improve vat vat loh chuan MNF Party mai ni lovin Mizoram sawrkar, ram leh hnamin kan tuar chho hle thei tih a chiang.) 

Nihna ang taka lan ngam mai hi a ringtu zia asin mawle!