Year of Consolidation an namnûl

ZPM sawrkar hotute'n thu mawi tak, 'Year of Consolidation' an sawi dum dum a, mahse, a takah erawh chuan nasa takin an namnûl lawi si!

Chief Mnister-in sawrkar sum renchemna lamah hmalak an tum nasa niin a sawi a, Year of Consolidation a ti dum dum a, sum renchemna leh sawrkar sum indaih lohna zualpui siamṭhat a tum hle niin a lang. A ṭawngkam hi mawi hle mah se, a takah erawh sum renchemna lam a lang lo a, Year of Consolidation a tak hmuh tur awm lo, 'Thu chauh, Hla chauh' a ni rih.

Education Minister, mithiam tak kan nei mek a, Department-ah mithiam tak tak an ther fûk a. Chu'ng mite ring zo lo ni awm fahrana thla khata ₹ 35,000 hlawh tur Govt. Secretary rank Consultant atan ZPM Vice President hlui Rev. Dr. K. Thanzauva ruat a ni hi thil ṭul lo tawp a ni. Amah hi academician a ni lo a, educationist a ni hek lo a, theologian a ni daih a, ani a awm avanga Mizoram zirnain hma a sawn phahna tur a awm lo. ZPM din tirh aṭanga hruaitu pawimawh a nih avanga nihna pawimawh tak chelhtir tum vang bak a ni thei lo. Sawrkar sum sen belh thlawnna mai tur tur a ni.

Revenue Minister thawm nâ, active tak kan nei mek a, Revenue Department chhungah officer leh thawktu dang tawnhriat nei ṭha tak tak tam tak an awm. Chung mite chu ṭha taka kaihhruai ni se, Minister hova kalphung a dik phawt chuan ramin hma a sawnpui tham an ni. Chutih laia Secretariat Service mi leh sa pension tawh, hun reilote Revenue Department-a awm tawh Pu C. Chalsawithanga, MSS (Rtd) Consultant-a dah a ni pawh hi thil ṭul lo, ramin hma a sawn phahna tur awm lo a ni. Amah hi tun hnai lawka ZPM zawmtu niin an sawi a, a dik a nih chuan party induhsakna vang a ni ngei ang.

Kum 2008 leh a hma lama MNF sawrkar lai khan Chief Minister khan Adviser a nei nual a, mipuiin an nuihzat a nih kha. Khatih lai aia tam mah tuna kan Chief Minister hian Adviser a nei leh ta mek. Mipui hian kan nuihzat leh ṭan mek a ni. An hlawh leh an office inrelbawlna atana sum senso sang tak hian Year of Consolidation a support lo hle.

Sawi tur tam tak a awm, mahse, duh tawk rih ang. A chunga kan sawi lante chauh pawh hian sawrkar sum renchem lam a hawi thlawt lo a. Sawrkar kal tawhte ai mahin thil ṭul tak tak lo leh a lo pawha awm theih rengna thila sawrkar sum senna tur a tam zawk mah tawhin a rinawm.

Year of Consolidation hi thu chauh ni lo, hla chauh ni lo, 'a tak' ni se a va duhawm em!

- Vanlalsanga