Sumdawnna lirtheite nuar kha
Commercial Vehi-cles Joint Action Committee (CVJAC)-in ni li chhung, May 18-21 inkara sorkara phut neia nawrh an huaihawt chungchang kha tawitêin i'n thlir let lawk teh ang. Kan hriat angin, ni li chhung ngawt mai sumdawnna lirthei zawng zawng an tlân loh avangin Mizoram mipuite'n harsatna kan tawk a, kan phun sup sup a, CVJAC-te thil tih kha mipui náwlpui chuan an dem a nih kha.
Media hrang hranga kan hmuh angin, CVJAC-te thil phût kha chi hrang hrang a awm a; chu'ngte chu tihhlawhtinsak turin sorkar an nawr a, sorkar lam lahin a tuang a tichhah tlat a, a tihhlawhtlinsak duh lo. Supply Minister Pu John Rotluangliana chuan sorkarin a tihsak theih angte chu a tihsak vek tawh niin a sawi a; Chief Minister Pu Lal Thanhawla chuan CVJAC-te thil phût chu tihhlawhtlin a duh loh thu a sawi bawk.
CVJAC-te chu Cen-tral YMA-te hmalakna vangin May 21, Inrin-niah sorkar nen an inrema sawi a ni a. An thuchhuak kan hmuhah chuan, Home Minister-in CYMA palaite hriat-puiin, CVJAC-te tan thil lawmawm sorkarin a tihsak dawn angin a lo hrilh niin an tarlang a, sorkarin kan harsatna chinfelpui min tumsak avangin lawmthu an sawi nghe nghe a ni.
CVJAC-te khan an nawrh avang khan hlawhtlinpui an neiah an inngai a ni mai thei a. Kei erawh chuan nawr chhuah an neih ka hre lo. Lifetime tax chu instalment-a pek theih turin tihhlawhtlin mek nia an sawi kha, an nawrh hma pawha sorkar hmalakna kal mek a ni. Auto-rickshaw kawngkhar dinglam hawn chungchangah DTO-te'n hriatthiamna nei tura hmalak an remtia an sawi pawh sorkarin a kalpui mek, ngaihhnathiamna thui tak a neih sa a ni.
CVJAC duty-te zingah che uchuak tak tak an awm a, Mizo hmel an tibâl hle. Private motor neitute'n tlawmngaiin, chuan man pawh awm loin an kalna tura kal ve turte phurh an tum a, lo dan tlat te, mi bungrua phurhsak an tum a, lo phal loh tlatte phei kha chu an thuneihna páwn lam daiha inrawlh an ni a; a Mizo lo a, a Kristian lo hle. Mission Veng Local Council phei chu an veng chhunga duty-te chêt mawi loh vangin an inrawlh hial a nih kha.
Nuarte khan ni 4 an nawrh hnuah pawh an thil phût an nawr chhuak dawn loin an inhria a, chutih karah sorkarin MESMA puan khum a tum a, mipuiin an dem nasa tawh bawk si a. Chu'ngte hre chung chuan, an duh nawrh chhuak chuang si loin, chhuanlam tur dap chawpin sorkar nena inrem ang leh sorkarin an phutte tihhlawhtlinsak tur ang-in an insawi mai a ni zawk ang em?
CVJAC thil nawr point eng emaw zatah khan sorkarin tihsak se tih pahnih ka nei ve. Chu chu - lifetime tax pek dan chungchang leh Special Permit kalpui dan chungchang kha. Tuna lifetime tax ṭum khata kum 15 atana pek tlak nghal tih hi chu sumdawnna lirthei a ni emaw, private motor a ni emaw, Mizoram mipui zawng zawngin an duh loh niin a lang. Taxi leh maxicab-te tana an tlanna bik ni loa kal dawna permit lak ngai tih pawh hi thil buaithlak tak a ni.
- Zomuani Patea