SAWRKAR A FIMKHUR LO BER ZAWK

Kan Mizoram sawrkar chuan COVID-19 laka invenna atan leh a dona atan kawng chi hrang hrangin hma a la a, fimkhur turin mipui a chah châmchi a. Kan daktawr te, task force lamte leh mi ṭhahnemngai dangte pawhin fimkhur turin mipui min ngen ṭhin. Ni e, inngen, inchah, inhriattir mawlh mawlh reng a ngai rêng a ni.

Heng karah hian, kan sawrkar hi COVID-19 a darh lohna tura fimkhur lo ber a ni a, hripui a darh hluai ṭhin nachhan pawh sawrkar rorel dik lo vang a ni deuh zel. A hnuaia mite hi lo ngaihtuah ve teh mah u. 

1. Village Council leh Local Coun­cil inthlan. VC leh LC inthlan leh a kaih­hnawih avangin nasa takin COVID-19 a darh a, sawrkar vêkin Aizawl­ah lockdown a puan phah zui a. Mi tam takin eizawnna hna an thawk thei lo a, sum tam tak an hloh phah. Chu mai bakah, hnu chhui (contact tracing) a ngai nasa a, swab sample test tur tam tak a awm phah bawk a; heng atan hian sawrkarin sum dinhmun chhe tak karah sum tam tak a sên belh a ngaih phah a ni. 

2. Covid Care Centre (CCC) aṭanga positive chhuahtir. ITI CCC, Aizawl aṭangin COVID-19 positive tih la hriat chian reng mi 8 emaw ni chhuahtir an ni a. A chhuaka te khan mi dang an lo kai darh hman. 

3. Inchhuahtir dan ṭha tâwk lo. Hun eng emaw ti aṭang khan COVID-19 positive-te'n hri an la vei leh vei loh endik nan Rapid Antigen Test (RAgT) deuh chauh a hmang ta a. RAgT hi COVID-19 swab test nan a ṭhat tâwk lohzia te, result dik lo, a bikin negative result-ah a tam thute mithiamte'n an sawi ṭhin. Internet lamah pawh chhiar tur tam tak a awm. Chuti chung chuan kan sawrkar chuan a hmang zui lui tlat tho. 

RAgT negative vanga enkawlna hmuna chhuahtir, a tak taka la positive site an awm theih avangin, October thla tir lam aṭanga hri kai chhan hriat loha hripui vei an awm ta nawlh nawlh leh a darh leh tak chiam chhana an puh ber a ni. A mawhphurtu chu sawrkar bawk. 

4. Tun dinhmunah, chawlhkar liam ta vel aṭanga tualchhunga COVID-19 inkai chhâwn nasatna ber chu Lawngtlai district a ni; chuti chung chuan Lawngtlai district-ah hian December 4 hian LADC MDC inthlanpui neih a ni dawn mauh mai! He inthlan tur hian COVID-19 chung changah eng angin nge nghawng a neih dawn tih erawh kan la hre thei lo. 

VC leh LC inthlan vanga a hnu lama sawrkar leh mipui buai phah nasatzia kan hre chiang tawh. Tawnhriat ṭha tak kan nei tawh chungin tun dinhmuna Mizorama COVID-19 darh nasatna ber district-ah inthlan neih a ni tur hian ngaih a ti ṭha thei mawlh lo. 

Chu mai bakah, chanchin tharahte kan lo hmuh danin, Lawngtlai khawpui chhungah phei chuan December ni 1-5 chhung partial lockdown an ti dawn a ni àwm a. He an partial lockdown tur hian inthlan ni, December 4 chu a huam chiang mai a. Partial lockdown ngai khawpa hripui a darha a chenchilh laia an inthlang tur hi an khawngaihthlak ngawt mai. 

Mipuiah thu awih tâwk lote awm bawk mah se, mi nâwlpui chuan thu an awih. Kohhrante hlei hlei hi thu awih ṭha an ni; inkhawm an châk zek zek tawh a, mahse, thu awih phawt a ṭha e, tiin an la inkhawm lo a, Krismas pawh lawm an tum lo hlawm hial tawh a ni.

Mi punkhawm loh tur an ti a, koh­hrante leh pawl hrang hrangte'n an zawm ṭhat em em laiin, sawrkar bawk hi a zawm ṭha lo ṭhin leh, inkaihhruaina a siam ngei bawhchhe ṭhin chu a ni. Tun hnai lawkah Mizoram Youth Commission-in 'Khuangcher Project : Huaisen Inzirtir' tih programme 'curfew hun chhungah' an buatsaih a, eng ang takin nge an hman kan hre kilh kelh lo nâin, curfew lai kher ni loah pawh tih theih a ni ngei ang. Chu bakah, kal khawm tur an tarlan en khan, kal khawm thei zat aia tam an kal tiin sawi se, ka ringhlel lo ang.

Mizoram chhunga COVID-19 hripui inkai darhna thleng tawh zawng zawnga mawhphurtu chu sawrkar a ni. Mipui an ni lo a, kohhran an ni lo a, village task force pawh an ni hek lo; Mizoram sawrkar ngei a ni.