MLA BÂN LEH DÂN

Pu Lalduhawma MLA aṭanga bân a nih chungchângah hian Pastor tâna lo sawi ve vak vak remchâng lo chin a awm a. Amaherawhchu, thil kan hriatthiam tûr pawimawh tih êm êm ka neih avângin, khawi maw lai laiah chuan kah pah deuh deuhva ka lo sawi ve tawh ṭhin, dân leh a hrilhfiahna (interpretation) te, a hman dân te tlêmin kan sawi leh teh ang. 

Dân hi chhan neia siam a ni ṭhîn a, 'a chhan' kha a pawi­mawh ṭhîn. Dan ṭha, thiltum ṭha tak neia siam leh dân ṭha lo, thiltum ṭha lo tak neia siam a awm thei bawk. 

Hamanan Morde­kaia a huat avânga Judaho tih mangna tûr dân Lal Ahasuera a siamtîr te, hotuten Daniela an îtsîk avânga Daniela tihhlumna remchâng atâna ṭawngṭai khapna dân Lal Daria an siamtîr ang chite kha thiltum ṭha lo neia dân siam chu a ni. 

Tûnlai khawvêlah pawh sorkara thil ti theiten anmahni hamṭhatna atân leh tute emaw dan chêpna atâna dân an siam (emaw, mi thiltitheiten an thiltihtheihna hmanga sorkâr dân an siamtîr) te pawh a awm ang chu - political lobbying tih ang chite pawh. 

Dân ṭha tak, thil­tum ṭha tak neia siam, nasa taka hman khawloh si ang chi hi a awm bawk a. 

Tichuan, dân siam a nih chuan, thil pahnih a lo awm ta a. Pakhatnaah, dân siam a tûl chhan leh siam a nih chhan, dân thiltum (the spirit of the law) kha a awm hmasa a ni. Pahnih­naah chuan, dân ngau ngau, dân lehkhaa ziak, a ṭawngkam leh thu ngau ngau (the letter of the law) kha a awm leh a. 

Dân siam chhan (the spirit of the law) aia dân lehkha ziak (the letter of the law) lâk vâwng zâwk a nih hian, emaw, the spirit of the law kalh zâwnga dân lehkha ziak hman a nih hian, dân hman sualna hlauhawm tak a lo awm ta ṭhîn a ni. 

Hei tak hi kan Lalpa Isuan leia a lên laia a do ngat ngat kha a ni. Pharisaite leh lehkhaziaktute, Juda hruaitute khân, dân thiltum, dân siam a nih chhan ai khân, dân lehkha ziak, dân thu ngau ngau kha la vâwngin khirh tak leh khermei takin an lek kawh a. Dân thiltum kha an ngaihthah si ṭhîn a, kha kha Isuan a haw êm êm a ni. 

Tûn ṭuma Serchhip Bialtu MLA disqualify a nih hian, rorêltu hian dân thiltum leh dân siam chhan nge a ngaihpawimawh a, dân lehkha ziak tih hi chu chhiartuten mahni chhia leh ṭha hriatna aṭanga in lo chhân atân dah ta ila.