Remna Ni a huhoa hman
Central YMA bultumin kumin Remna Ni chu pawl leh political party bik a hmang loin, a huhoa hman tum a ni. He thil hi ṭha tak anga lang si, ngaihtuah ngun ngai tak niin ka hria. A phenah hian tute emaw platform duh vangte a ni thei em tih thlenga ngaihtuahna sen a
ṭul awm e.
Independent Day leh Republic Day-te chu lawm ṭhin a ni teh meuh mai, mahse Remna Ni nen hi chuan khaikhin theih a ni lo ang. Independent an sual leh sual lo lam chu sawi ka tum loa, political party ho inhnialna turah ka dah mai. Mahse, India sorkar leh MNF-te kha chuan remna thuthlung an ziak ngei a, remna ziahna ni June 30 chu Remna Ni tia vuah a ni.
Rambuaia hun rei tak chhung Mizo-ten kan tawrh hnua inremna a awm hi thil lawmawm tak a ni a, mahse lawm vak vak kher enge a
ṭulna ka hre lem lo. A bik takin a huhoa lawm kher phei hi chu thil ṭul lem lo tak niah ka ngai. Rilru inhmu miah lote'n Remna Ni an han hmang ho anga, political party-te'n thu an sawive phei chuan inkahna leh insawithiamna platform-ah a chang mai mai dawnin ka hria.
He ni hi kan lawm loh avang hian remna kan neih avanga Mizo mipuite kan lawm a nep chuangin kei chuan ka ngai hauh lo. Political party-te'n an anmahni bila hun an buatsaih ṭhin pawh kha ṭul ka tih lem loh laiin, a huhoa hman lakah chuan a la ziaawm viauah ka ngai. Vantlang huap khera Remna Ni hman tum a nih chhan hi tute emaw platform duh vang a ni thei ang em?
Kan hriat ṭheuh angin Central YMA hruaitu hlui engemawzat chu politics huang chhungah an lo zuang lut tawh a, tuna hruaitu ni mekte hi zuan luh an tum em chu ka hre hauh lo. Mahse, hetianga platform an zawng reng mai hian ngaihtuahna a hruai kawi deuh a ni.
Remna Ni hmanna turah hian tunge pawisa tum dawn chiang takin ka hre lo na a, ka hriat ruk dan chuan sorkarin cheng eng emawzat chu a tum dawn a ni. District hrang hrangah he ni hi a huhoa hman tura ruahman a ni a, chuvangin sum harsa tak Mizoram sorkar chuan ṭul lem lo, pumpelh theih rengah cheng engemawzat a seng dawn a ni.
Kuminah chuan rua-hmanna engkim kalpui a ni tawh a, sut leh chi a ni tawh lo mai thei. Mahse, kum dangah chuan Remna Ni a huhoa hman hi chu tih tawh loh tawp nise ka va ti em? Rilru inhmu miah lote kohkhawm a, sorkar sum tam tak senna atan chuan a ho takzetin ka hria. Duh leh political party-te chuan an duh dan danin lo hmang leh mai teh se.
Central YMA hruaitute hnena ka chah duh chu tlawmngai pawl a nih ang ngeiin, hruaitute hi platform an zawng chiam chiam turah ka ngai lo. Mizorama tlawmngai pawla ka ngaihsan ber leh ka dahsan ber hi a hming hliau lohna atan hruaitute an pawimawh hle, miin platform zawng lutuka an ngaih palh che u chuan a pawi dawn e mai.
- Lalmalsawma Fanai