An Tan Mangchhia A Ni Zawk Ang Em?

Khatia, Speaker meuhin, an puh dan kalhmang a chhiar chuar chuar lai khan, chak lo zawk awm lo (win-win situation) angin thu tlukna han siam se ni tur a... 

"A hektu lam hekna hi, ngun taka ka ngaihtuah hnuin, bantir nghal rup rup ṭha ka ti lova, an lungawi lohna angte (mi lawm luh etc) hi, Pu Duha hian a tih chhunzawn tawh lem loh chuan, ban kher lovin, chalrem angin kal rih mai se, mahni MLA puite han inbantir hawl mai chu..." han ti se, enthla reng thung bawk ta se. Pu Duha hian mi lawmluh loh tawp hi a thei dawn si lo, party chhung pressure vang pawhin a ti leh ngei ngei ang. A lawmluh leh veleh, "Kan khawngaihna pawh hrethiam lovin, a member puite deu ang zawk hiala a la chet zel avangin, hreh tak chungin, rorelna khawng kalpui a ngai ta," han ti zui mai se chuan, mipuiin, "Pu Duha chu, ama thangah a inawk ta..." an ti ang a, khawngaih aiin, misual nih a hlawhtir zawk ang a. Vawiin nia khawngaihtute rilru a inthlak hlawk ang a, a politic thlân a lâi an ti mai dawn a ni. Hei zet hi chu, dikna duh vang ai mahin, rilru fim lo thuthlukna a ang ber mai. 

An beiseina neih pakhat lah chu, court ah kal se, tih a ni. Chak lo bawk se, mipui khawngaihna pawh a dal phah deuh ang, an tihna lah chu, an hre ve khiauin a lang bawk si, bye election a din leh phawt an tih hmel ta bawk si nen.  Huiha...

Bye election lo awm turah, Serchhip bialah Minister pawh lut chho dawt zut mah se... Patling, an bialtu MLA, anmahni ngaihven em emtu kha, khawngaihna awm miah lova, fik hmawk ang mai a, lehpek awm lova paihchhuaktu kha chu, thla ruk chhung lek hian an theihnghilh hman dawn der si lo... Sum hmangin han inlei tlin tum eng ang mah se, suma lei theih anga min ngaitu party an lo tih a, Pu Duha an ti tling a nih leh hlauh phei chuan, sipai bang, lu a hai khawp ang le. 

Tunah chuan, anmahni (MNF) mi leh sa tam tak pawhin an khawngaih phah a, ṭul ti lo lah an kat nuk mai si. Beng daih han tum sateh mah se, a reh loh nan opp. party lamin an sawi vul reng tawh dawn bawk si a. He thutlukna hi chu an tan chuan mangchhiaah a chang ang tih a hlauhawm ta ber mai. General Election kan la sawi thleng lo mah mah...