MIZORAM 2027

 A kumleh chu Mizoram inthlanpui a ni nain sawrkâr dinglai erawh chuan campaign lam a hawi thei meuh lova, mipuite tâna hna thawkin a hmanhlel a, sawrkar lai party chuan kum 5 chhûnga mipuite tâna a hnathawh kha campaign-na atan a ring nghal mai a, a hranpaa campaign teh vak a mamawh lo a ni. In tina hmasawnna thil hun luh chu house to house campaign-na angah a ring nghal mai bawk a, a awlsam hle. Mipuite pawhin 2023 inthlanpuiah chu party , sawrkarna la chelh ngai lo party an thlang tling kha an inchhir lova, 2028 inthlanpuiah pawh chu party kalphung thar chuan mite thinlungah thu a sawi nawn leh dawn a ang .

Inthlan dawn kum ni mah se, kum dang ang lo takin party mite pawh party-ah an phusa tehchiam hman lo. Loneitute chuan an thlai thar hralhna turah harsatna an tawk tawh lova, lo neih chu a hlawk em avângin an huanah te, an leiletah te an bung suau suau a, Mizo ṭhalaite ngeiin company dinin chumi hnuaiah chuan an thawk suau suau a, company hnuaia thawk ni lo, mimal dawra thawkte pawhin a darkar bi a inhlawhin, an buai em em vek mai a, 2027 kum a lo inher chhuah meuh chuan a taima-in an hlawh tam a, thawkrim te tan thawh rim man a awm ve ta! Therhlo leh semin hmun a chang lova, engkim mai chu sem ni tawh lovin, puntirna vek a ni tawh  mai zawk!

Mizoram chu mihring chenna in atâna dâp in awm tawh lohna state-ah puan a ni a, kum 7 kalta vela tui dahkhawlna siam deuh vek avanga state sawrkârin lawmman 1-na a dawn ṭum, a tak rama tui dahkhawlna a awm mumal leh si lo ang kha a ni tawh lova, kha mi ṭuma lawmman pakhatna an dawn kha chuan mipuite a barakhaih a, tun ṭuma an lawmman dawn erawh chuan sawrkâr a chawimawi a, an lawmman dawn mipuite'n an hriatpui a ni. 

A nawlpuiin chhungkaw tin khawsak a nuam a, mi tinte hnathawh a inthlak thawk lem lova, an lakluh zat erawh a inthlâk thawk thung a ni. Labour chuan labour hlawh ṭha zawk a la a, private sikula inhlawhfa zirtirtu pawhin hlawh ṭha zawk lain, loneitu, chawhmeh zuar leh thil danga ei zawngte pawhin kum 6 kaltaa an hna ngai reng kha thawk mah se an lakluh-ah thil inthlak danglam an hmu a, kum 7 kaltaa 'India rama state hlim ber' dinhmuna thlan an nih lai ai khan 'happiest state' lawmman chu dawng nawn kher tawh lo mah se,  2027 kumah chuan an lawmkim em em zawk vek mai si a ni. A ngaihna hria  ram hruaitu neih man a va'n awm em!

Chakma leh Tuikuk avângin Mizo leh Mizo an invaw tawh lova, ei leh barah an intodelh miau avângin Assam sawrkar hlauh a ngai tawh lova, hnathawktu-te'n hlawh ṭha an neih avângin Mizo ṭhalaite'n thawh hreh an nei tawh lova, thatchhiat vânga thawh hreh nei emaw kan tih Mizo tlangvâlte khan hlawh chhiat vâng zawka thawh hreh nei an ni tih a lo lang chhuak ta a , hnathawh chu thil hlawk a nih tawh tlat avângin thil hlawk lam ûm chu tungchhova kal mihring pangai zia a ni a, chu kawng chu an zui ta mai a ni. 

Zoram politics chu a fîm ṭan tawh hle a, opposition- te chuan pawisa sem hmanga mipuite thlem tum mah se mipuite zawkin sem chu an mamawh tawh lova, sem aia hlawk zawk leh daih rei zawk a thawha thawh chhuah thuruk an kawl tawh avângin  politician-te pawhin sem an tawktarh ngam tawh lova, mipuite inbumsiakna Zoram politiks chu thil ṭha intihsiakna hmunah a lo chang ta, mipuite hlim leh lawm nui riin min tihharh hma loh chuan ka mumang a ni tih reng ka lo hre lova, he mumang hi eng tikah nge a  thlen dik ang a? thlen diktîr tûrin mipuite'n eng tikah nge huaisenna kan neih ang? tiin ka inzawt a. Eng hun nge tia pawn lama kan dah chhuah chuan, zan a lo ni a, ni e, zan hunah ka awm miau a, zan chu mumang neih hun a ni.