KMMTTP kawng compensation
Kaladan Multi Modal Transit Transport Project (KMMTTP) kawng siamna tura Lawng-tlai District Land Owners' Association (LDLOA) in zang-nadawmna pek phûta kawng siamtute hna thawk tur June 1, 2016 aṭanga an dan thu hi beisei angin mipuiin kan khel zui lo a, he kawngpui siamnaa compensation phut zat hi a hre chiangte chuan a tam uchuak hle niin an sawi.
PWD hotute sawi chanchinbu lama a lan danin KMMTTP kawng siamnaah a tira ram enfiahnaa ram neitu dik tak nia hriat mi 165-te chu zangnadawmna cheng nuai 927 pek a ni tawh a, a tira tel lo mi dang 800 velin an ram nei nia an insawi leh avangin Gauhati High Court-ah petition an thehlut a ni.
A tirah ram enfiah thlap a ni a, a tira tel lo mi 800 chuang an han awm thei hi chu a nuihzatthlak a ni.
A tira ram tehtute hian an tisual palh a nih pawhin mi 800 ram zet an lo teh hmaih hi chu khawvela thil teh thiam lo ber an ni hial ang. A tirah ram neitu dik tak nia an hriat, an en fela an teh chin chu mi 165 an ni a, compensation pawh an pe tawh a ni. Hemi hnua mi 800 lai mai ram neitu ni si compensation dawn ve loh avanga lungawi lo an chhuak thei hi chu kei a mak ka ti ve thlawt a ni.
Chief Minister Lal Thanhawla chuan he thilah hian ku tling lova sum lak luh tumna a awm thu a sawi piap piap mai a, Chief Minister thu hriat hi hriat chian deuh chakawm tak a va ni em! Ngaihdan mawl tak ka neih ve mai mai chu a tira ram endika tel lo leh tih hmaih hi chu thil awm thei a ni a; mahse mi 10 aia tam hi tih hmaih an awm thei dawn em ni le? ka ti deuh.
Tunah chuan mi 100 pawh ni lo, mi 800 zet maiin an ram enfiah a nih ve loh thu leh kawngpuiin an ram a paltlang avangin compensation an phut a, ram bial zim taka mi 800 lai mai tih hmaih an lo awm reng mai hi chu thil mak tak a ni chiang mai.
Mizo mipui nawl-pui hian KMMTTP kawngpui siala compensation phut dan hi kan zir chiang lo a ni mai thei a, hei hi chu ngaihthah chi a ni tawh lo. Mi 800 vel an lo lan leh danah hian a tira ram enfiahtute nge dik lo nasa zawk mi 800 zinga mite zawk hi? tih hi a chhanna ka hre chak khawp mai.
- Lalremsanga