Biak ina mitthi ruang lakluh

Vanglaini 6.6.2016 khan Biak ina mitthi ruang lak luh thu Pu Rualkhuma Hmar khan a rawn ziak a. Bible-in a khap a nih thu Bible changlam nen a rawn tarlang a, a bengvarthlak hle mai. Hetiang thu hi hmanah Vanglaini-ah hian ka lo ziak ve tawh.

He thil hi eng tik aṭanga chiang ṭan nge kan nih tih hria pawh an vang hle. Min hringtu Kohhran tihdan kan lak pawh a ni lo a, Kohhran din tirh
aṭanga kan chin pawh niin a lang lo. Hman kum Synod Calendar-ah khan Pastor Chhuahkhama vuina Mission Veng Biak in tuala a lan thu a lo chuang a, hre awm deuh ka zawh pawhin hria an awm mang lo.

Ṭhenkhat rin dan chuan Missionary pakhat Durtlang damdawi ina thi Durtlang Biak in tuala an phum tak kha a vawikhatna a ni mai awm mang e an ti thei chauh a ni. Biak ina Upa leh Pastor-te ruang lakluh hi a buaithlakna han sawi ve ta ila-

Baptist Upa Lalawia chu Ramhlun Vengtharah a thi a. In lamah rei tawk an vui hnuin khiah khiah Chaltlang Baptist Biak inah hlate khuaah hah thikulin an zawn chho a. Biak inah rei tawk an vui hnuah khu-ah khu-ah an in aia thlang daiah Chite kamah an zawn thla leh a, an vui ta a. Zarkawt Upa Lalchungnunga chu a thi a, an in leh Biak in inkarah Bial Upa ten zawn tur an ti a. Upa naupang te te YMA rual lek lek an tam tehlul nen. In lama vui hnuah Biak inah rei tawk an vui leh a, Pastor Thansiama chuan a thih hmain a tu leh fate hnenah, "Ka thih hunah chuan Biak inah ka ruang la lut suh u" tiin a chah diam a. A inah Synod-in an vui a, Biak ina tih ang chiahin Bial Zaipawl leh Kohhran Zaipawlin an thlah vek a, kan in zawn kual kan in zawn kual ve lo. Upa Lungliana pawhin Biak ina vui a duh loh thu kan hre bawk.

Kan Vengah chuan Upa leh Pastor thi chho zawng hlirin pasarih (7) kan zawn a, nem ngheh thar turte nen chuan chhoh zawn ngai pariat (8) kan nei leh dawn a, chhuk zawn ngai chu pathum chauh a ni ang. Upate leh Pastor-te'n an kut hmawr pawhin an khawih duh si lo a, a nuam leh hahdam chinah Biak in chhungah chauh an khawih/ zawn duh a, Biak in chhungah chuan mi dang khawih ve pawh an phal si lo. Upa leh Pastor-te vui huna hla rem tur thihna lam hla lo zir lawk tluk tluk thu a awm si lo a, aurinnain kan inau khawm a, kan buai leh hle si a.

An nupuite hi asin khaw-ngaihthlak ni. In lamah rei tawk, Biak in tualah rei tawk thla kan lakpui a. Biak in tualah phei chuan Committee peng hrang hrang bakah Sub-committee peng thlengin thla lakpui kan tum a. An nupuite chu thu reng turin kan ti si a. Mipui lam an en ngam si lo, mipui lahin hnai takah kan kil tuau tuau a, an kun tlawk tlawk mai a ni.

Tunah chuan kan thlanmual te a hla tawh a, a ṭhen Tuirial ralah te a ni. Thlasik laiin Upa leh Pastor-te an thi ve tho si a, ruang awm laia in ral kan hreh si a, veng hla deuhte chu khuain min thim hnan fo mai.

Hawh u, mi ram te tih ang hian Biak inah Upa leh Pastor thite hi i la lut tawh lo ang u. Mitthi vui a hautak em mai. Bible-in a khap leh nghal. Bible khap hi chu i ti lui lo ang u. Kan tuar palh ang e.

- Lal Hmachhuana