Chhung rila inthiamlohna leh politics

Mizo hnam party tia invuah hial ṭhin leh zalenna pawh lo sual tawhtu MNF te hian thutlukna lian tak vawi hnih an siam sual ta. Hei hi chuan an dam chhungin chhung rilah inthiam lohna a siam kumkhua tawh dawn a, heng thil pahnihah pawh inthiamlohna an nei lo a nih lek phei chuan an dinhmun a ngaihtuah awm tawh zawk hial a ni ang. 

Pakhatna chu Citizen­ship Ammendment Bill chungchangah khan Mizoram mipui min bum tawh a, ṭhalai rilru a na thuk hle tih kan hmu. Tun hnaia Pu Lalduhoma thila tih sual/eiruk/ pawi khawih vang pawh ni lova, "ZPM office-ah ZPM mi leh sa lawm lutin ZPM angin a awm," tih hmanga MLA aṭanga an paih hi chu a hektute leh Speaker tana inthiam loh kum khua tawhna tur a ni. 

CAB-ah khan kan MP zahawm tak Pu C Lalrosanga khan a chhia zawng zawng kha a lo mimal phurh tawh a, kan MP kha thutlukna (decision) siam tu a ni lova, a puang tu chauh kha a ni si a. 

CAB an do tur thu cam­paign laia an sawi hnuah BJP pachal, Amit Shah leh a hote an ngam loh vangin an sawi ang letling chiah in an khawsa ta a, Mizo ṭhalai rual thinrimin an han bei let tak tak kha chu MP nih chakawmna zawng zawng kha a bo hial ang. 

Khatih lai khan Mizo ṭhalaite kha an rilru a na hle tih a lang a, kha kha social media lam ah a rawn lang chhuak zui ta a ni. Kha vang khan kan MP leh kha thutluk na siam tir tute kha chuan chhungril lamah inthiamlohna an nei kumkhua tawh dawn a ni awm sia. Khang ṭhalai lungawiloh na kha AMC inthlan hunah leh MLA leh MP inthlan dawn hunah kha inbumna anga an ngaih kha ṭhalai ten an la au chhuah pui leh dawn a ni. 

Tun hma anga thil hi kal liam puat a ni tawh lova, an thusawi leh thuziak leh video zozai kha tunah hian internet khawvelah a la leng kual sup sup reng a ni. Kha mi ṭuma thinrimte kha an thinrim a la reh lova, kan hotuten CAB do tur tia vote zawn dawna an sawi hnuah CAB an thlawp thu an sawi leh khan MP kha a sawitu mai a ni a, thu tlukna chu party office Hnam Run lam siam a ni daih si a. 

Pu Lalduhoma ban hi kan MNF MLA 12 te hian an rilru dik tak sawi ngam se (patling mahni rilru sawi ngam lo tur khawpa politics-in a phuar nih pawh hi a leh lamah chuan a zahthlak tawh tho tho a) an MLA pui zingah pawh kum lama an senior, a hektu ṭhenkhatte ang bawka Kohhran Upa la ni ve zui han hek hi chu an duh miah lo vang mawle. 

Rawngbawltu Kohhran Upa-in Kohhran Upa ve bawk, "A ZPM leh lutuka chuvangin Pu Speaker, ban mai rawh," han tih ngawt hi an thinlung chhung rilah an pawm thei lovang; chu chu Sap ṭawnga 'guilty feeling' (mahni inthiamlohna) an tih hi an dam chhungin an nei hlen tawh dawn a ni. 

Chhuan lo awm leh zel turin Mizoram political history an chhiar apiangin, "He pa hi mahni MLA pui thil tisual pawh ni lo ban tura hek duhtu kha a ni," tiin mi pangngai leh neutral chuan an ngai vek tawh dawn a ni. 

Kan MP ang bawk khan a bantu ni ta Speaker pawh mipuiin nasa takin social media-ah an dem rawn ve leh a, mahse thu tlukna chu Hnam Run thunei tute siam tho a ni si. 

Chhungrila inthiamloh­na nei kumkhua tawh tura politics a nih avanga mi challang, Kohhran Upa leh mi pangngai ve tak takin (MLA pawh ni phak chin) thil mak tak an ti duh ta mai ṭhin hi Mizo pa, Kristian ni ve bawk tan chuan nakin zelah inchhirin ban a chen dawn a ni si a. Tun lai tak pawh hian an mut a tui thei dawn miah lo a ni.