Remna Ni June 30 Leh Sjac

Zirlaite aṭanga remna leh muanna nawr chhuahna hmanrua awm chhun Students' Joint Action Committee (1985-1986) hlutzia hre lo kan awm nualin a rinawm; a chanchin tlem i'n sawi teh ang.

SJAC hi Peace Accord thlen nana a pawimawhzia hi tawitêa sawi mai theih a ni lo; mahse, a hlu si. Pu Laldenga ngei pawhin hlu a ti a, kan chairman hmasa ber Zothanmawia Ralte kha London aṭanga rawn biain, "Remna nawr chhuah nana ṭangkai ber chu zirlaite hi in ni, a ṭul hunah extreme taka kal thei in nih avangin; kohhran leh YMA ai pawhin in thawh hlawk daih zawk a nia; Govt of India nen remna kan ziah hma chu theihtawp chhuahin in bei ṭang ṭang dawn nia," tiin SJAC hruaitute chu a khat tawkin telephone landline hmangin a rawn fuih ṭhin a ni.

AR Lammual leh Treasuty Square, tuna Assembly Annexed-ah hian high school leh college zirlaite chaw kan ngheipui a. Treasury Square-ah hian Pu Lalduhawma'n chawnghei (relay fasting) neite a ho a ni. Hetiang khawpa remna thlen nana pawl pawimawh MZP (MZP a ding thei tawh si lo a) hluite din SJAC hlutna hian sawi zui a hlawh tawk lo hi rilru a na ṭhin.

Politician zingah pawh Pu Lalduhawma deuh chauh hian Remna Ni lawmnaah hian a sawi lang ṭang ṭang ṭhin a, SJAC hruaitu hluite chu a chungah kan lawm hle a ni. Dik tak chuan mal khaiah chuan remna thlen nana pawl thawk nasa ber leh thawh hlâwk ber chu SJAC hi a ni.

SJAC Chairman nihna hi a hnuah Pu Hminga kutah a tla a, mahse, Delhi lamah a chhuk hma avangin C Vanlallawma chu interim chairman nihna a hlan a ni.

Peace Accord ziah a nih theih nana zirlaite chêt lakna hi a bua chhuah tham a nih avangin tuna tan chuan i duh tawk phawt ang.

Mizoramah remna a awm zel theih nan Lalpa'n Mizoram mal sawm rawh se.

- Dr JT Vanlalngheta