Durtlang kawng leimin

Fur kan hmang mek a, Mizoram hmun hrang hrangah fur ruahtui tla vanga chhiatna hrang hrang hriat tur a tam hle a, a bik takin kuminah nunna chan an tamin chhiatna lian thleng pawh a tam hle –Mizoram hmun hrang hrangah ruah tui tla vangin harsatna kan tawk mek a ni.

Harsatna thleng mek zingah Bawngkawn, Aizawl leh Durtlang Leitan inkara leimin hi a langsar pawl tak a ni awm e! Leimin hian chhiatna lian tak a thlen rih lo, chutihrualin Aizawl khawpui motor veivak tikhaihlaka tibuai thei taktu a nih avangin a nghawng hi a na a, ngaihthah theih pawh a ni lo.

Aizawl khawpui hian enkawltu a nei a, chu chu Aizawl Municipal Corporation a ni. AMC hian a huamchhungah lei laih leh in sak phalna a pe ṭhin a, a thuneihna pawh a ni. Tuna Durtlang kawng min pawh hi lei laih nghawng an ni tih a chiang reng a, hetianga lei laih phalna petu chu AMC an ni ngei ang, a thuneitu sang Mayor pisa kalna kawng a ni a, a maimitchhinsan tlat a nih ngawt loh chuan kawng sira an lei laih leh leimin hi a hmu ṭhin ngei dawn tih a chiang hle a ni.

Sorkar thuneitu lam chuan an theihtawp an chhuah a, leiminin chhiatna nasa zawk a thlen loh nan a hmunah vilin lirthei tlan dan tur pawh fel takin an ruahman a, an fakawm hle a ni. Ruahmanna fel tak awm mah se, chung lamin eng angin nge ruah a rawn surtir dawn hriat a la ni lo a, nghawng na zawk la nei thei mai dinhmunah a ding mek a ni.

Kum dangah pawh Fur hi kan la tawng leh zel dawn a, khawvel a awm chhung chuan kan tawng zel bawk ang. Chuvangin engtin nge fur a lo thlen hmain kan inbuatsaih ang a, ruahmanna fel zawk kan neih theih ang tih hi a pawimawh. Chhiatna leh buaina a thlen hnua inruahman chauh chuan khua a tlai zo tawh ṭhin a ni.

A hmasa berah chuan tui luankawr mumal leh felfai kan neih a ngai, hei hian leimin tur leh lei che thei tam tak a ti kiam theiin a rinawm a, mi tinin hma kan lak theihna tur remchang leh ṭha a ni thei ang. A dawtah chuan, leimin hlauhawm leh nghawng a neih theih lai tura lei laih loh a ngai, hei hi thuneitu lamin ngaihtuahna seng uluk se la, a hnu lawka buaina thlen thei tur hi chu a hunlaiin lo dang ngam se, kan harsatna leh buaina ṭhenkhat hi chu kan pumpelh thei ngeiin a rinawm.