Bawngkawn-Durtlang kawng kamah lei laih phal loh tawp ni rawh se
Fûr tak tak kan thleng ta. Mizoram chhunga khawi khawiah emaw leimin thu te, leiminin in a hnâwl leh kawngpui a hnawh pin thute hriat tur a awm zauh zauh reng a, tunlaia langsar ber chu Bawngkawn leh Durtlang Leitan inkar kawngpui chhak lama lei laih leh leimin a ni.
Nikum lam aṭang khan Bawngkawn-Durtlang inkar kawngpui kamah, a chhak lam lei laih a ni. Lei laih nasa ber chu petrol pump siamna tur nia sawi a ni a, hei hi chu kawngpui hnawh khawpin a la min belh lo. A thlang lawkah lei laih a ni a, fûr hmain in an sa uaih hman a, min belh hlauhawm âwmin a lang lem lo. A thlang lehah lei laih a ni bawk a, hei erawh hi chuan tunlai hian harsatna a thlen mek.
Aizawlah hian lei lai tur chuan AMC aṭangin phalna lak hmasak a ngai ṭhin. Bawngkawn-Durtlang Leitan inkar kawngpui chhak lama lei laitute pawh hian AMC aṭangin phalna an nei vek ngeiin a rinawm, nei lo se chuan an lai ngawt lo ang. Lei laih zinga hmun pakhat chuan mipui tan harsatna a thlen mek a, tuna harsatna la thlen lote pawh hian harsatna a thlen lo ang tih sawi theih a ni lo. Chuvangin, tuna harsatna thleng mekah hian AMC-in mawh a phur lian hle a ni tih loh theih a ni lo - lei laih phalna petu a ni miau.
Bawngkawn-Durtlang kawng hi khâm kara siam a ni a, lei laih belh miah lo pawh ni se, chhak lam aṭanga leimin leh lung tlak hlauhawmna lai vek a ni. Tun hma pawhin a lo thleng tawh ṭhin. Chutih laia lei laih belh a ni leh nghal phei hi chu a hlauhawm zual sauh a, fûr laia he kawngpuia tlân rêng rêngte chu thin phu dêp dêpin an tlan ṭhin a nih hi.
June ni 29, 2024 zinga lama leiminin kawngpui a hnawh pin avang khan mipuiin harsatna an tâwk nasa hle. A hêlna awm chhun Zuangtui lam kawng lah a chhe na laileng mai bawk si. Mi tam takin AMC an dem a, mi ṭhenkhat phei chuan anchhia an lawh hial. Chutah AMC hotute an la rawn insawifiah zui a, mawhphurtu ni lo ang maiin mahni thiam inchantir tum a rawn insawifiah a hnih kha. AMC hotute hi an zak lo ngawt mai! Harsatna thlen hnuah chinfel dan tur an zawng leh a, an buai chûk chûk a; 'Se bo hnua se kawng khâr' ang chauh a ni tawh.
Durtlang kawnga lei laitute hian LSC an nei a ni thei; lo nei pawh ni se, lei laih dil pawh ni raw sek sek, phal loh mai tur a ni. Phal lo se chuan tuna harsatna leh mipui phunna tam tak hi a awm lo ang. Thuneitute'n lei laih an phalsak avanga mipuiin harsatna an tawh zozai hi thuneitute hian ngaihtuah ve hlawm teh se.
Tun hnuah chuan Bawngkawn leh Durtlang Leitan inkar kawngpui kam, kawng chhak lam zawng zawngah hian lei laih phal tawp ni se a ṭha ber ang. Miin eng ram pass pawh nei se, ram pass an neih avangin lei laih phalsak ngei ngei tur an ni tihna a ni lo; lei laih hrim hrim phal loh a him ber - hei hi thu dik a ni.
- Zoramchhana