MangṬha

Nikum kha a ni ta awm e, WhatsApp group-ah hmeichhe tleirawl nia ka ngaih pakhat chuan mangṭha tih a duh lo a, "Chibai pawh al i ti ngawt ang a," ka ti a; nuam a ti vak lo. Tum dangah pawh mi pakhatin, "Mangṭha tih ka duh lo, mut tui tih ka duh zawk," a ti a; "Miin an duhsakna tur che ṭawngkam lo thlan zut zut tur a ni lo e," ka ti a; "Mangṭha" ka ti ta tho a, a vui ngam ta chiah lo.

Mangṭha awmzia:

1. Thil duhawm leh mumang ṭha tak nei tura induhsakna ṭawngkam a ni. Mizo chuan kan inlengte thlahna atan emaw, zana inhmuh tawpna turah emaw, induhsakna ṭawngkam atan he thu hi zan tin kan hmang ṭhin a; hei hi a awmze bulpui ber a ni.

2. Zan riaka zin tur leh khawi iloa kal bo tur hi mangṭha kan ti ve bawk. Hei pawh induhsakna ṭawngkam ni tho mah se, a awmze tak tak piah lam thil a ni.

3. Hla thu-ah a tlangpuiin inṭhenna lam hawiin an hmang a, induh lo emaw inti-thiam loa inṭhen sawina atan; a awmze ṭobul tak a ni tawh lo.

4. Kan ngaih em em, kumkhuaa kan
ṭhen tur emaw, kan
ṭhen takte emaw pawh mangṭha kan ti ṭhin - kan hmangaiha kan duhsak em avangin. Amaherawhchu, hei pawh hi a awmze pang-ngai pela kan hman chawp mai mai tho a ni.

Engtik lai emaw aṭang khan tu tute emaw hian mangṭha tih an duh lo ta tlat mai a. A awmze dik tak sawi mah ila, keini aia ṭawng chak leh
ṭawngthei te an ni lawi a, inhrilhfiah a har khawp mai. Manṭha tih chu rapthlak riauin an hria a, an hlau a ni ber. Fiamthua lemchan mai mai ni se, kan nuihpui nasat dawn vei nen, an ṭang kawh ve tlat mai si a, mi pangngai chuan a hman dan dik tak kan hrilh leh a ngai ta a ni ber.

Rinthu-ah chuan, tu emaw-in ama ngaih dan a vawrh kual vel ang a, intih tunlaina emaw tiin mahni tawka ngaih dan mumal nei lem lote’n an lo lem duak duak ni berin a lang.

Mangṭha tih kan hman ngunna ber leh a awmze dik tak chu mu tur inthlahna a ni a, hnial buai rual a ni lo. Hemi hmang duh lo kan lo chhuak thar ta hluai hi a pawi thui hmaa inzilh harh theih thil a ni. A thu hrimin, mahni ṭawng ngei ngei, a awmze penhleh zawk la vawnga a awmze pangngai han ngaih pawimawh loh vel hi intihtheihna chi a ni lo.

“Mut tui” in tih hi a mawi a, a pawi lo; “mangṭha” tih a rapthlak riaua ngaih hi a mawi lo a, a pawi ta mai chauh a ni. Mangṭha tih hi hnam dangin min hmanpui peih tak tak dawn si lo a, zan tin tu emaw ber chu kan zavaia kan mang-
ṭha ziah a ngai.

- Rempuia R. Lûtmâng