Heti hian ka ngaihtuah ṭhin

Mahni awmna hmasa party chhuahsana party danga insawn avanga awmna hmasa hruaitute theihtawpa dem kual chingho hi mi hlauhawm tak an ni. Hetiang mihring hi, an insawn kual ngun duh viau a, an awmna hmasa party leh hruaitute an sawichhe zui ziah leh nghal. Hei hi thil chin ṭha lo tak a ni.

Political party hrang hranga awm member-te hi kan duh thlanna ngei party-a awm kan ni deuh vekin a rinawm a, kan awm chhan ber chu a hrang ṭheuh thei. Mi ṭhenkhat chu party policy ṭha tih vangte a ni thei a, ṭhenkhatte erawh chu chhungte emaw, ṭhiante emaw sâwmna vang a ni thei. A ṭhen chu tu sawm leh thlêm vang pawh ni hran lovin, keimahni ngeiin kan hma lam hun tur thlir ran chungin, kan chhungkaw tan, fate sawrkar hna an hmuhna tur a ni mial mahna tih vang emaw, thlerhlo ilo vel tal ka dawng ve mahna tih beisei vang emaw, contract hna chhete tal ka hmu ve mahna tih beisei vang emawa a ṭha ber tur nia kan hriatnaah kan duh thlanna ngeia decision fel tak siam a, party-ah hian awm kan ni tlangpui awm e.

A enga pawh chu ni se, kan awm chhan chu tu vang pawhin ni se, eng vang pawhin ni se, kan duh thlanna ngeia awm kan ni tih erawh chu a chiang. A chhan chu tu ma'n min tih luih theih loh vang a ni.

Chutih lai karah chuan mi tam tak chu hrehawm tuar peih lovin, opposition-a kan awm veleh party danga chhuah mai kan ching ṭhin. Mi ṭhenkhat phei chu, mahni nupui/pasalte thih hlima ruang ṭhutpuitu nula/tlangval lo melh tai nghal ringawt ang maiin, opposition an nih veleh ruling party an melh tai nghal ringawt ṭhin. A chhan chu kan retheiin hlawm em avangin opposition-a awm hi kan ngam ngang lo ni berin a lang.

Chuti lai karah chuan mi ṭhenkhatte erawh chu, "Tun hma aṭangin, tuin nge maw kan chhungkua hi min lo châwmsak ngai le? Kan thawhrim rahin asin maw nupui fanaute hei leh chen hi ka lo châwm le," tia opposition party-ah pawh, pa tak leh rinawm taka awm lui ngar ngar mi tam tak an awm bawk.

Mi ṭhenkhat ve thung chu chutiang rilru chu an pu ve lem lo. Party chhuahsana pawl sawn hi an ching em em mai a. 'Party-te chu kawr ang alawm,' tia party danga insawn zung zung ching an awm a. An awmna hlui party-te'n ui eng ang mah se, anmahni duh thlanna a ni miau a, tu mah an inui bet zo lo chu a nih hi.

Mi tam tak chu an awmna hlui party an chhuahsan chhanah, 'Ka tan leh chhungkaw tana ṭha zawk tura ka ngaih avangin ka chhuak a ni,' ti mai lovin, puhmawh tur hrang hrang an dapin an puhmawh bawk ṭhin.

An chhuah chhana an puhmawh leh an chhuanlam ber chu, leader-in a thu a duh em vang a ni, tih emaw, a duhàm vang emaw, mahni hma a sial vang emaw, a chuti khati vang tia mahni inthiam chawpna tlang chhipa din tumin, mi dangte leh thawhpui hmasate an dem kual vak vak ṭhin.

Party aṭanga party danga insawn avanga mahni thawhpui hmasate dem kual vak vak chin hi thil ṭha lo tak a ni. An va awmna party an chhuahsan hunah pawh hetiang tho hian an sawichhe leh dawn tih a chiang. Chuvangin, an lungawi loh chhan chhuanlam an siam hi lo hriatthiampui a, thu tak khûka lo khûkpui loh a ṭha khawp mai. Hetiang an chin avang hian ṭul lovah mi dangte rilru an tinâ a, ṭhian hluite min ṭhentir phah fo a ni.

A nihna takah chuan, 'Party chu kawr ang a ni,' an lo ti ang deuhin, an duh loh chuan an chhuahsan mai tur a ni a. An chhuah tak avanga an awm hmasakna party theihtawpa sawichhiat zui chingho hi mi ṭha lo ber berte an ni tih hi mipui pawhin kan hriat a pawimawh. Mi pangngai chinin hetiang hian an sawi ve ngai lo. Gentleman takin an awmna party an duh loh chuan an chhuahsan a, an duhna tak party-ah an lut hmiah mai a ni.

Mahni awmna party hmasa sawichhiat ching emaw, hotute emaw, thawhpuite emaw sawichhiat zui ching ho reng reng chu, an va luhna party an chhuahsan leh huna an sawi leh dan tur tho a nih avangin a dawnsawn dan chin lo thiam hle tur a ni. Hetiang chingho reng reng chu mi tak sa tak an ni ngai lo tih pawh hriat reng tur a ni bawk.

-CL Hranga, New Siaha