Sangha man ve a châkawm

Mamit lama kan MLA zahawm tak pakhat chuan Mamit leh Phaizau khuaa MNF party hruaitu ṭhenkhatte nen Tut luiah, Phaizau khaw­tlangin an humhalh huam chhungah lehnghal bomb hmangin sangha an man e, an ti a. 

Sawrkar Depart­ment ṭhenkhatin an bawhzui thu te, Police Station-ah FIR thehluh a nih thu te, Court lamah pawh complaint thehluh a nih thute kan hre leh zel a. Phaizau khawtlang pawhin press release meuh siamin an puangzar tawh a nih kha.

Hetiang a nih chhoh tak zelah chuan an puhna hi a dik ngei turah ka ngai nghet bur tawh a. Kan MLA zahawm tak hian legislator a nihna anga a zahawmna bosal ṭhaka bomb hmanga sangha an man hian ram mipuiteah entawn tur chhe tak a hnutchhiah tihna a ni a; a zialo tak zet a ni. A thil tih hi keini thingtlang lam mite'n kan entawn chho a, kan khaw ram luia sanghate kan man lo man ve a nih pawhin, min thiam lo bik lo turin mipuite kan ngen lâwk a che u. 

Luia nungchate man te, ramsa pêla kahte hi thil ṭha ber ni lo mah se, keini thingtlang mite nunah chuan a bet ve tlat tawh a, tun hma, kan nu leh pa, kan pi leh pute aṭanga kan lo tih ṭhin tawh dan a ni. 

Ramsa leh luia nungchate humhalh a ṭulzia an sawi ṭhinte lo hre ve fo tawh mah ila, chuti maia bànsan leh tawpsan hmak chu a harsa ve viau a nia. Sa kan ei ve châk tho a, mahse, miin sa an sêr pawhin leina tur kan nei reng lo a; sa leina tur nei pawh ni ila lei mai tur kan hmu pha ve lo. Chuvangin, luia nungchate kan man ṭhin hi sa kan râwp lutuk phuhrûkna a ni ve tlat.

Chuti chung chuan, kan harh ve zel a, tunah chuan kan zia viau tawh. Ramsa pawh kan buh leh bâl min khawihsaktute ni lo chu kan pêl kan pêl tawh lo. 

Luia nungchate, a bikin sanghate pawh lên leh lênkhang te, nghakuaite leh lungrem hmangte bak chuan kan man duh tawh bik lo a; bomb hmang phei chuan kan bei ngai meuh tawh lo, bomb hmanga beitute hi chu khawpui lam mi an ni deuh zel tawh asin. 

Kan MLA zahawm takin a zahawmna bosal ṭhaka a ṭhui­hruaite nen bomb hmanga sangha an man hian kan ngaihtuahna a tikal thui hle mai. 

Sawrkar dan kalha dik lo taka sangha an man tih a chiang a, thlalak nen lam a darh chung pawha hrem an ni lo a nih ngat chuan, kan entawn lo thei dawn lo; sangha leh nungcha dangte man kan inthlahrung duh tawh bik kher lo ang. 

Min lo hrethiam dawn nia, sa kan ei ve châk tho alawm. Mahse, bomb hmang kher kher chuan kan man ve lo ang.