PWD Minister ka dem!

Durtlang Leitan leh Bawngkawn inkarah hian vawi tam tlan tawh mah ila, thlamuang taka tlan hi a awm tak tak thei meuh lo a, leimin leh lung tla tawn fuh hlau reng rengin kan tlan ṭhin. Fur lai phei chuan thla a muang lo zual. Tunlai phei chu harsatna hi kan va tawk nasa tak, mi tam takin kan buai phah em em a ni. Tu thiam loh nge tiin rilruin ar bo a zawng a, keini ang mi fingvar lo chuan mawhpuh tur ber hre lo mah ila, kan PWD Minister hi rilruin a dem ta riau mai!

Tun hma aṭang tawhin Durtlang Leitan leh Bawngkawn inkarah leimin leh lung tla a awm zauh zauh tawh a, ṭhenkhat chu lian tham deuh a ni a, a ṭhen erawh chu a lian tham vak lo. Lung tla leh leimin avangin kawngpui pawh motor-a tlan tlang theih lohin a ping fo tawh. Kawng a pin changa a hêlna kawng awm chhun chu Selesih-Zuangtui road a ni. He kawng lah hi a chhe em em reng ringawt mai.

Kumin furah pawh Leitan-Bawngkawn kawng hi leimin avangin motor-a tlan tlang theih loha khar a ni leh ta fo mai a. Tun hnai teah pawh Halflong bula kawng chhak lama leiminin kawngpui a hnawh a, lirthei tlan tlang thei loh a awm fo. Mi bengtlalo ho ṭhenkhatin kawng chhak lam an lo lai ve leh zel a, chu'ng an lei laihte chu mi thiam zawkte'n an endiknaah a him loa an ngaih thu hriat tur a lo awm leh zel nen, he kawng hi tunlai chu a ralṭi tak zet a ni.

Bawngkawn leh Leitan inkar kawng a pin changa a helna kawng awm chhun Selesih-Zuangtui kawng lah hi a chhe na laileng mai si. He kawng chhia hi tun hnaia chhia a ni lo a, a hma daih aṭanga chhe tawh a ni. Tunah phei chuan a diak kâwi zeih zuih mai a, hmun tam tak chu a nâl em em bawk. Aizawl leh Durtlang inkara tlan tlang lo thei lo mi tam tak an awm a, an khawngaihthlak tak zet. Two wheeler-a tlan ngei ngei ngaite an khawngaihthlak zual ngawih ngawih.

Selesih-Zuangtui kawnga a chhe zual lai, diak kawi nâl zual lai hi Aizawl North-I bial huam chhung a ni a, bialtu MLA chu tuna PWD Minister hi a ni. PWD Minister bial a nihna chu thu hran, kawngpui pawimawh a ni ve hrim hrim bawk.

Minister rau rau zingah pawh kawng siamtu department enkawltu, PWD Minister biala heti tak maia kawng a chhia hi a bial a ngaihsak tawk loh vangah ngaih loh theih a ni lo. Nikum tawp lamah PWD Minister a ni ṭan a, PWD Minister a nih hnu hian kumina fur ruahtui a tlak hma si khan siam ṭhatna hun a awm a ni.

Durtlang Leitan - Bawngkawn kawng a pin zauh zauh avangin mi tam takin loh theih lohin Selesih-Zuangtui kawng hi an zawh ṭhin. He kawng hi PWD Minister hian a bial chhung a ni bawk a, a chhiatzia hi a hmunah hian rawn hmu ngei se, blacktop mai a remchang rih lo a nih pawhin, kawng khuar chhe zual lai talte hi chu rang takin hnawh mamtir se a va duhawm tak em; he thuziak hmang hian kan ngen nghal bawk a ni.

- Lalnunsanga