ISUA KRISTA DUH DANIN CONGRESS A KAL ZEL DAWN EM ?

A chunga thupui (EM? tih tel lo) hi Dec. 12,2020 (Inrinni) Vanglaini phek hmatâwngah hawrawp lian tawka ziakin, Pu Lal Thanhawla hming a rawn chuang vah mai a, mi a hipin chhiar a va nuam teh reng em. A thu ken ka’n chhiar vat a, tun hmaa an sawrkar laia mi rethei leh a mamawh takte hnena rangva an sem leh NLUP mi tam takin an dinchhuahpui thu a lo ni a; mi rethei, a mamawhte'n an lo dinchhuahpui chu thil hlu tak a niah ngai ila. Amaherawhchu, an sawi zîm/tlém deuhva, tun laia Mizoram issue pawimawh, Pu Lalduhawma MLA aṭanga bantir tura MNF MLA 12-ten Speaker hnena an hèkna thu ah te khan Congress hotute chu an chet nalh teh reng nen a sawi lang lo va. Khatiang thilte kha tarlang pahin Isua Krista duh dana Congress an kalna tur kawng ṭhate han sèprawtuipui nan a chunga thupui khi (EM?) tihbelhin thupuiah ka rawn hmang ve a ni.

Pu Lalduhawma, MLA aṭanga ban tura MNF MLA 12-ten speaker hnena hèkna an thehluh chungchangah khan ngaihdan puitling ṭha leh fakawm tak Congress hotute, Pu Lal Thanhawla leh Pu Zodintluanga’n an sawi a, an ziak bawk a. Tuna Pu Lalduhawma dinhmun hi Anti-defection law-in MLA aṭanga ban theiha a sawi khan a kawk lova, mimal hnawk intihna avang mai nia an ngaihthu an sawi a ni. Pu Hawla phei chuan, hemi thu Mizoram rorelna sang ber, Assembly record-a a awm reng tur chu ṭha lo hlea a ngaih thu pawh a sawi tel a. Tin, Pu Riachho, IAS (Rtd.) (Congress supporter-a ngaih theih) pawh khan, party thlirna aṭang ni lova, academician thlirna aṭanga rawn ziakin, Pu Lalduhawma dinhmun hi anti-defection law-in dan bawhchhia, bân theih a tih dinhmun a nih lohzia a sawi chiangin, anti-defection law a bawhchhiat loh thu a rawn sawi chiang bawk a. Mahse, tunah a takin Pu Duhawma chawthleng chu an leih buak luihsak ta ngei a.

Hetiang hi thil awm dan a lo nih takah hian, Isua Krista kha tuna MPCC hruaitu hi lo ni ta se, “Miin in chunga an tiha in duh tur ang apiang chu, mi chungah pawh ti ve rawh u; (Matt.7:12)" titu khan, tharuma Pu Duha chawthleng an leih buaksak hi, “Chhúra duh loh Nâa’n nei nâng e,” tih ang hrimin chhar khalh a, neihsak daih tumin a lo bei ve ang em le? Ui insual ang maiin, a bet zawk chin rawn vak tumin a beih ve vak a rinawm em? Chu chu Isua duhzawng leh a zia niin a lang lo. Chu lam ai mahin, a rawn kal chhan Nazareth-a a sawi angin, “Tihduhdah tuarte chhuahtirna tur a,” a beih ngei a rinawm zawk. A chawthleng an leih buaksak kha a chharpuiin, a ta ngai kha a neih leh theih nan a lo ṭanpui zawk dawn lawm ni? Hemi chungchanga ngaihdan puitling leh mawi tak lo vawrh chhuaktu, Pu Duhawma’n anti-difection law a bawhchhe lo titu leh, “Isua Krista duh danin Congress a kal zel dawn,” titu party hian Pu Lalduhawma chawthleng leih buaksak hi lainat takin chharpui ta zawk se, Isua duh dan chu a ni ang â! Lal Isua’n chhuang em ema Samari mi ṭha thu a sawi nen khan a inhmeh hle dawn lawm ni? Tirhkoh Johana pawhin, “Naute u, thu chauhvin i hmangaih suh ang u khai, lei chauhvin i  hmangaih hek suh ang u, thiltih leh tihtakzetin ni zawk rawh se,” a tih kha. (1 Johana 3:18).

Chutiang zela Mizoram Congress hi puitling taka Isua Krista duhdanin an kal zel a nih ngat chuan, Mizoram politics-ah bung thar min kaipui a ni ang a, party dang tan pawh entawn tlak an ni bawk ang.Kum 2023 inthlanpui lo awm tur atan chuan campaign hla mawi ber a tling ang a, sawrkarna pawh an la let leh bawk ang.Isua Krista duh dan ang zela kal an nih avanga Pathian malsawmna dawnga sawrkar leh an nih ngat chuan Zoram mipuite tan thil uiawm lam aiin Zoram mipuite malsawmna a tling ang. Chumi chhuh let leh tur chuan, anni aia Isua Krista duh dan ang zela kal ṭha zawk nih chu party dangte pawhin an tum tur a ni ang a, Zoram politics inlumlehna ṭha tak a ni ang a Zoram malsawmna hnukpui a tling bawk dawn a ni. A va ṭha dawn em! MPCC hi Isua Krista duh dan ang zel chuan kal mawlh teh se.