Mi thiamte chhan atan

Heng thu ho te te hi kei hian ka lo buaiphah ve em em a, chhan tlaka in ngaih chuan min han hrilhfiah teh u.

AMC–e-em-si tia kan lo lam thiam ve em em tawh te, ATC–e-ti-si tia nâl taka kan lo sawi ve zaih zaih ṭhinte chu tunlai hian mithiam pui pui ni âwm takte hian a hawrawp bul hi Mizo ṭawnga A AW B-a mi 'A' ang hian an lam ta tlat mai a. Aizawl Municipal Corporation chu a-em-si an ti a. Aizawl Theological College pawh a-ti-si an ti ta fo mai si a. Engtia lam tur ber nge ni ta le?

Hawrawp bul ber hi Mizo ṭawnga A AW B-a mi anga lam a ni tlat alawm, kan ti a nih chuan, a dawt leh thute hi Mizo ṭawng veka dah awm tak te ka lo ti ve a. Eng nge e-em-si, e-ti-si tia sawi chu a pawina awm le te ka lo ti ve deuh a ni. Hnam dang bula sawi dawnin engtia sawi tur nge? Hnam dangin an chhiar dawnin, 'e' ti suh, 'a' ti rawh tih tur em ni?

Kan ti-Mizo dawn a nih rau rau chuan, Aizawl Khawpui Rêlbawltu–a-ke-ar (AKR). Aizawl Pathianthu Zirna–a-pi-zet (APZ)-te ti ta ila. India ram state lian ber leh mihring cheng tamna ber Uttar Pradesh khu a lamtawi chuan iu-pi (UP) an ti a, a lampumin Iutar Pradesh an ti leh mang si lo va, te ka lo ti vel mai mai a.

Tun hma deuh khan, ti ila, tun hnaiah pawh mi pakhatin a sawi ka hria, Italian football league sang ber, Serie 'A', English alphabet-a mi anga keinin Serie 'E' kan lo tih ṭhat hle hle kha, mi ṭhenkhatin Mizo A Aw B-a mi angin, 'A' tih turte an ti leh si a. Italian ho khuan Mizo A AW B-a mi kan lam ang hian he thumal 'A' hi an lo lam ve emaw mi le? Chuti a nih chuan, an league sang ber dawttu, Serie 'B' khu, Serie 'Aw' te tih leh mai awm tak ti tein ka lo buai ve em em a.

Ka buaina hi a tam lutuk a, a hnuaia pakhat tal hi engtia lam nge dik ber tih min han hrilh teh u.

Aam Aadmi Party = AAP = e-e-pi = Em Edmi Party.

Khawvel huap pawhin thu lam dan tlanglawn deuh hi chu a awm lo maw?

- Hmingthankaia