Thu Mal Hman Dan Dik
Tun ṭum chu Mizo ṭawng leh English thu mal kan hman dik loh tlem tê chauh i'n thur chhuak lawk teh ang.
1. July 1, 2024 aṭang khan British-in India an awp laia an dan siam IPC, CrPC leh IEA thlakna dan thar, 'dan bawh chhiate hremna dan' chu hman ṭan a ni ta. Heng dan thar, a hlawma sawi nan hian Mizorama ni tin chanchinbu pakhat chuan 'pawi khawihna dan thar' tiin a ziak mauh mai. Dik tak chuan, pawi khawihna dan' chu a ni lo asin. Heng dan Zoṭawnga sawi nan hi chuan spaced compound noun (terminology) hman dan dik lo a ni. He chanchinbuin dan thar pathumte Zoṭawnga a lehlinnain a kawh theih chu – pawi khawihtute'n pawi an khawih dan tur sawina a ni. Chuvangin, ka rawn tar lan ang khian emaw, term dang rawtna kan neih loh pawhin 'pawi khawihte (-tute) hremna dan' tiin emaw, 'thil sual ti/dan bawh chhia (pawi khawih)-a puhte hremna dan' tih ang chia dah hi ni ta se a chiang deuh ang.
2. A hman rem dan dang: Hetiang hi thu mal bul (root word) kawng danga hman dan emaw, a hman rem dan emaw sawina a ni. A sap ṭawng chuan variant form emaw modification tih emaw, modified form tih emawa hman hi a dikin a lar hle. JH Lorrain-a Dictionary-ah modified form hi hman dan lar tak a ni. Ka Dictionary–The Concise Learner's Dictionary of Mizo, adt-ahte erawh chuan 'variant form' (a lam tawi 'var.' ) hi ka hmang zawk thung. Padma Shri hial dawng chin emaw, chanchinbua thu ziak thei chin emaw, Whatsapp group-a grammar lam rawngkai compound word emaw word group emaw hmang ngam chin hi chuan English thu mal an hman chhun hi chu an hmang dik ngei tur a ni. 'Modified form' tih tura 'modify form' tia hmang ta mai ka hre/hmu fo mai hi a zia lo lam deuh a ni. English grammar-a thu mal awm dûn/ho chi (word group) kan chiang lo a nih chuan a Sap ṭawng hi hman loh ngam mai ni se; zirlaite hruai sual an nih loh nan.
3. Council of Ministers–Minister vs Ministers: English thu mal awm ho (collective name)-ah 'Council of Minister' tih hi a awm lo a, 'Council of Ministers' tih erawh chu a awm thung. Minister pakhat aia tam sawi nana 'r' dawta 's' dah reng hi Mizo ṭawnga thu ziahah rem loh chang a awm maithei. Hetiang hunah hian 's' aiah hyphen dahin Mizo ṭawnga pakhat aia tam sawi nana hman 'te' hi hman mai ni se a ṭha ang. Entir nan: 'Council of Minister an ṭhu khawm' ti lovin, 'Council of Ministers an ṭhu khawm' tih tur a ni. Hetiang chiah hian Mizo ṭawnga minister pakhat aia tam sawina kan hman dawn chuan 'minister-te' tih hi hmangin, 'Council of Minister-te tân an ṭawngṭai' tia hman ni se. CoMs hi ziah dik loh palh a awl a niang e, Mizorama chanchinbu ropui ber leh lar awm chhun Vanglaini July 3, 2024 chhuakah meuh pawh an ziak dik lo tlat mai; 'Lungleiah Council of Minister ṭhukhawm' tia a ziah hi!
4. Grammar vs grammer; guitar vs guiter: Grammar leh guitar hawrawp pawh hi Mizorama kan tih sual zin pawl tak a ni hial ang; thu mal kan ziahin spelling-ah i fimkhur ang u.
Heng kan sawi tak ni lo, Mizo thu mal leh English thu mal lar tak, a hmangtute ngei pawhin hre lova an hman dik loh hi ṭhahnem tak thur chhuah tur a awm thei ang; duh tawk phawt ila.
- Dr JT Vanlalngheta