Kohhrana tel hi phurrit a va ni thei dawn em!

Mi tam tak sawi ngam loh, rilrua awm ve reng si, a sawi hmasa sa chu ‘sih hlawkah’ an ti emaw tih tura heti lam zawnga thu ziah la tam mang si lo hi han tipuak pawp teh ang.

Mizote hi sakhuana ngai pawimawh, kohhran emaw a hnuaia pawl awma inhmang lo chu hmu pangngai lo mai thei khawpa Pathian pawh nia inngai, pawl hrang hranga zirtirna danglam deuh ṭhûm, mahni rinna chawi nun tum, ringtu dang mil thei mang der si lo, Isua zuitu inti si, nuna lang si lo hnam kan niin a lang.

Kohhrana inhman chu ṭhenkhat tan ni tin eichawp zawng tan rilru tihah tham a ni thei mai em? Pathian hnaih leh a rawngbawl chu hahdamthlak awm tak hi a nih laiin, rilru hah phah ve fe fe chu kan awm ru foin ka ring. Kohhran kaltlanga Pathian thil phût hi a tam ta lutuk nge ni!

Chawlhni zing emaw tlai emaw a lo ni a. Kohhran leh a hnuaia pawl hrang hrang aṭangin thawhlawm thawh ngei ngaia lang leh mahni inhuamna chin thawhlawm an rawn khawn a, chumi karlakah buhfaiṭham a la tel zui! Kar tluana inhlawhfa, chhangchhe pa tan chuan Chawlhni zing hi ‘zing sakei’ a ni hawt thei dawn e. Chawlhni zing hi chuan len bo daih emaw, puzawn te ina chaw eia chhuah daih mai a châkawm ṭhin ngawt ang.

Zingkara khawn theih zawng zawng an han khawn fai rek hnuah pa ber rilru tihahtu a la awm fo dawn, biakina inkhawm mawlh mai pawh hi. Pahmei, inhlawhfa chawp, fa 3/4 nei tan ngat phei chuan Chawlhni inkhawm thawmhnaw ringawt pawh hi rilru tihah tham a ni chho zel. Mi neih ang kan awt a, chumi nei thei si lo chu min intikiltawihtu a ni leh si a. 'Kan neih ang ang hi a fai ṭhat chuan a ṭha ber, Pathian lawm zawng pawh a ni. Pathianin thawmhnaw a en lo,' titute hi thawmhnaw thar nei uar uar, a chhuak thar leh mi incheina en chîk peih peih zingah an tel duh phian leh nghal a.

Biakin lamah kan han inkhawm chhunzawm a, chutah chuan sawma pakhat pek a ṭulzia leh kan pek loh chuan Pathian ta eiru kan nih theih dan sermon thui tak hmangin kan chhipah min han deng leh dawt dawt mai a. Patling luhai ve fe fe, 'Inkhawm khât deuh ila, kohhranah hian member ni ila, a dang zawngah chuan ṭhahnemngai lo hian tâl mai mai ila,' ti haw tawk hi an kat ve nuk thei lo maw. Kan rawngbawl dan hautak ta lutuk hi mi retheite'n kan tuar berin a lang.

Kan rawngbawlsak Lalpa lah kha a che hautak lo mai sia. A thu kan hril dan leh a ram zauh kan tum dan hi kan kalphung a fu lo nge a hautak chho ta ṭalh ṭalh em mai. Kan Pathian hian eng chin hi nge min phût a, eng chen hi nge min beisei tih hi kan chian a ngai hlein a lang. He laia mihring phuahchawp thil dang tam tak, mi dang tana harsatna tam tak thlen thei hial hi Lalpa lakah eng thlen thei tak ni ang maw! He leia kan rawngbawl hna nia kan ngaih tam tak hi Lalpa hian engtin tak ngai ve ang maw! Ṭul a ti vek kher lo mai thei a ni.

Chanvo eng eng emaw, vanram chahbi ni awm taka lang, phat ngam loh hiala pawimawha lang, an han ruat chhuak a. Chumi tihlawhtling thei lo mite chu dai pawna vawm chhuah tlak khawpa hnaisailo emaw, mawhpurhna hlen lovah leia cheng mihringte hian kan ruat a. Lan mawi leh lan ropui kan tum leh duhna avanga chanvo kan inpek chawp tam tak hi rorelna hmaa kan din hun chuan kan pa Pathian hian ‘A va han ho mai mai em, thil sawngsawhlawt lo a nih hlawm hi' a tih tur a tam ve ngawtin ka ring.

- Martha-i Pa