YMA LEH MORAL REFORM

“Mizo ramah chuan Kohhran belh

a tha ber a, a dawtah YMA”

Thuhma: YMA Ni (Day) June 15 kan lo thleng leh ta reng mai. YMA han tih hian Mizo zawng zawng chu min hmer tel vek a; tute tan pawh neitu chan kan chan theihna Pawl a ni. Kum 1935 a YLA (Tuna YMA lo ni ta) din a lo ni hi, Mizote tan khawtlang nun malsawmna a ni e tih hi ka sawi hmasa duh a ni. YMA leh Moral Reform thil tum hi sawi hran theih, lak hran theih loh ang mai a ni,a chhan chu Kristian nun dan tha min zirtir avang a ni.

Moral reform thil tum: Ṭawngkam hnih khat maia hrilhfiah thiam a har deuh. ‘Kan rilru chhungrila thil dik, ṭha leh mawi kan tih, nuna lanchhuahtir hi a ni’, ti ila a fun kim deuh ber mai awm e. Kawng dangin sawi ila: Piangthar nun dik tak a nun hi, Moral Reform nun chu a ni ber e. Piangthar nun dik, ṭha, fel leh mawi kan tih, a taka kan lanchhuahtir thei mang lo leh tlat ṭhin hian, Moral Reform pawimawhzia a ti lang hle awm e. Kan ram tan thil thar a ni hran lo; a hun leh hmun a thua kan sawi thar leh ṭhin mai hi a ni. Kum 2009 aṭang erawh chuan, Moral Reform tih hming hmerh a sawi uar leh sawi pawimawh thar deuh chauh a ni. He thu hi Mizoramah leh ram pawn lamahte pawh, inrawnkhawmna (consultation/ seminar etc) hmanga neih a ni tawh ṭhin a. Tin, a bik taka a huho (group) a heng, Kristian Ṭhalai/ Ṭhalai Kristian Pawl te, Kohhran Pavalai/ Mipa Pawl te, Kohhran nuhoah te, MLA/ Minister leh Sorkar Officer lianho zingah te, zirna school/ college/ university zirtirtu leh naupangte zingah te, YMA/ MUP/ MHIP/ Zirlai Pawlte leh NGO hrang hrangte zingah te, Theological College hotute leh zirlai zingah te leh chanchin bu/ ni tin chanchin bu (news magazines/ papers) ahte sawiho fo tawh a ni a. CYMA Committee sang berah meuh pawh Moral Reform tih hi kum 2012-ah sawi hawnna paper nen meuh sawiho a ni tawh nghe nghe. Chu chuan tuna thu ziahte pawh hi min tingampa sawt a ni. Moral Reform nihna leh pawimawhna kan sawi tam ta hle mai; kan zawm duh leh duh loh a thu a ni ta ber mai. Chutih rualin Moral Reform hi
ṭum khata sawi leh tihtawp mai chi a ni lo; sawi zel leh kal zel tur chi a ni.

Ram, Kohhran leh Khawtlang nuna lungthu pathum (3): Mizo ram, Kohhran leh khawtlang nun hi a vannei hle mai. Khawvel hmun danga kan hmuh ve ngai loh, Sorkar, Kohhran leh YMA, lungthu ang maia an ṭangtlang hi ngaihsan tlak a ni. Mi ṭhenkhat chuan, Mizoramah pawl pathuam, Sorkar, Kohhran leh YMA a awm e, an lo ti ve reng a ni. A hrang ṭheuh an ni e ti lovin, an tum chu inkungkaih vek, inphan tiak an ni thung a ni; a memberte lah mi dang ni lo, a ngai deuh vek kan nil eh vek bawk. Kumin YMA Ni thupui: ‘Ram leh hnam humhalh’ tiht angte phei hi chu Mizo zawng zawng ngaih pawiamwh vek a ni. Ka sawi duh tak chu, heng lungthu pahtumte hian tun aia tanrual dan tha zawk kan hriat chuan, Mizoram chu ram nuam tak a ni thei dawn tih hi a ni. ‘Mahni seh seh mual hrangah,’ tih ang deuhin, thahnemngai tak vekin kan thawk hlawm a; a lawmawm hle mai. Ngun taka kan ngaihtuah chuan, heng rawngbawlna ki thumte hian an tih awm leh awm loh deuhte chu a awm ve niin a hriat theih. Theih chu ni se, heng Sorkar leh Kohhran leh Khawtlanga kan rawnngbawlna duhawm takah hian, engtin nge tun aia tha leh hlawk zawka kan tanrual theih ang, tih thuah Inrawnkhawmna (seminar/ consultation adt) buatsaih thei ta ila chuan, sawi tur tha tak tak kan nei hlawm teuhin a rinawm a ni. Entirnan, sum leh pai thila corruption kan do tlan theuh chungchang te, zuk leh hmuam leh ruih theih thil, zu leh ruihhlo (drugs) do chungchang te, Hun hman that dan hrim hrimte leh a dangte pawh. Chutia kan inrawnkhawm hnuah chuan, mahni rawngbawlna mual theuh a hmalak dan tur inbat leh ta ila; kan ram pumpui nun chuan awmzia a nei thui thei hle lawng maw?

Mizo nun hma lamah kawl a eng (Mizo society has a future): YMA Ni tarmit vuah aṭanga thlir chuan, Moral Reform chu, Kristian nun dan tha ngaihsan a ni, kan ti thei ang. Tin, Moral Reform thil tum chu, Lal Isua leh a hnathawh ang mite thinlunga tuha nun chhuahtir te pawh ti ila a sual lo vang. Moral Reform Bible chang innghahna pakaht chu, Marka 10:45 a kan Lal Isua lo kal chhan, ‘Mite rawnbawl saka awm tur ni lovin, mite rawngbawl turin,’ tih hi a ni a. Mi tanpui ngaite tanpui hi Lal Isua thuchah ropui leh pawimawh em em chu a ni. Hei hi YMA mit aṭang bawkin, ‘Tlawmngaihna dik tak’ kan tih chu a ni. Mi tanpui ngaite tanpui tur chuan, rinawmna leh taihmakna a keng tel tlat bawk. Beisei let tur engmawh nei lo va mite taanpui hi a Kristian ziain a YMA zia hle bawk. Mite rawngbawl sak duhna nun hi, vawiin thlengin Mizo dik tak rilruah chuan a la mit hauh lo; kan duh angin a par chhuak lo ve kan ti mai a ni. Hnam dang zinga kan hriat ve zen zen lem loh, Mizo khawtlang nuna langsar tak pakhat chu, YMA-in tanpui ngaite chenna In sak sak fote leh mi bote an awm a, ni 7 chhung hmuh hma chu kan zawng kan zawng maite hi a ni. Tin, he thu ziak laia Mualkhang rama gas bur tihchingpen vaia kan YMA ten an tlaivarpui thak thak maite hi maw le! A, gas bur tichingpentute tak hian Moraal Reform kan tih chu han nei tak tak ni se, hetiang kan tawk lo tawp tur le!.Heng kan sawite aṭang mai pawh hian, tlawmngaihna kan tihte hi chu a la bo lo hle tih a lang. Tin, Mizo khawtlang nuna mak leh danglam riau chu, mi dik leh tha kan la ngaisangin, kan ngaihsante pawh a la inang tlang hle mai hi a ni. A lang a changa mahnihmasial takte hi tun kan ngaisang tlat lo. Tun laiah nula tlangval ṭhenkhat zelthel deuhte awm mahse, tam tak chu an hun lo kal tur thlira thahnemngai taka tan la sauh sauh hriat tur leh hmuh tur an thahnem khawp mai. Inelna chi hrang hrang result (rah) ah an tilang hle a ni. Thiamna leh sum dawnna kawng hrang hrangah lah, Mizo hming titha thei hriat tur an awm reng bawk. Kristianna nun kawng hrang hrang kan zawh mekna leh Chanchin Ṭha hrilh darh zelna kawngahte hlei hlei hian, hma kan sawn chho zel a ni lo maw? Heti anga tan kan lak chhoh zel chuan, khuavel kan la deng chhuak ngei ang le.

Tlangkawmna: YMA hi lo din ta lo ila, kan khawtlang nun chu eng ang takin awm ang imaw tih hi ngaihtuah tham tak a ni. Khawtlang nun kan tih hian Kohhran nun pawh a tuam tel vek tih hi kan hriat saah ngai ila. Eng hnam pawh ni ila, Kristian kan nih chuan, Kohhran belh hi a ṭha ber a; a chhan chu mihring nun kawng hrang hranga a tha ber leh mawi ber inzirtirna a nih avang a ni. Chuvang chuan, eng Kohhran pawl (Denomination) ber emaw hi belh neih ngei hi a tha ber a ni. Eng emaw avanga Kohhran belh kan nei lo a nih hlauh pawhin , YMA tal hi belh ngei chi a ni; a chhan chu, a tum hi Kristian nun dan tha ngaihsana zawm bawk hi a nih vang a ni. Kohhran leh YMA belh ve ve chu a tha lehzual. A hma lama kan sawi tawh ang khian, Moral Reform chuan Kristian nuna tha, dik, fel leh mawi ber a lang, nun chhuahpui hi min zirtir ber chu a ni. Hei hi kan Mizo nun ze mawi kan tih pawh hi a nit ho mai. Hengte hi chhungkua aṭanga inzirtir chi a ni e. Moral Reform hi vawi leh khatah nei mai lo mah ila, zawi zawiin nunah kan la nei chho mai ang tih I ring tlat ang u.

Tin, kan mihring chhia leh hriatna hmang pawh hian kan duh tak tak chuan Moral Reform hi kan nei thei bawk. Chu bakah Thlarau Thianghlim ṭanpuinain chawplehchilh pawhin kan nei thei tho bawk a ni.

- Rev. K. LungMuana