KAN KHAW DAIAH

Tun hnai khan Central YMA Kum puan Committee leh SRS duty-ten Mual-khang leh a chhehvelah ei rawng-bawlna Gas bur tih-chingpen lai an man a. May ni 28 zan khan Khamrang leh a chhehvelah búr 231 an lo man tawh bawk.

Aizawl khawpui daiah hetiang hi zan tin deuhthaw a thleng a, buhfai lah chu 'truck inmawng zawm' an tih mai hmangin khawih chingpen reng a ni a, Petrol lah chu kum tam tak chhung pawlh dal a ni tawh. Rangvamual leh Phunchawng vel lah chu kum tam tak chhung, zu hmunpui a ni tawh a, tlawmngai pawlten an man fova, an duty ngawrh loh hlek chuan a hluar vak zel a nih kha.

Mipuite ni tin mamawh langsar ber ber - Buhfai, Petrol leh Gas-te chu kan khaw dai velah hian tihchingpen mawlh mawlh reng a ni.

A awmzia chu, heng thil pawimawhte hi mipuite hian a dik leh a tling ngei man pe siin pawlh dal leh tihchingpen hnu kan lei a, a man chu a dik a, kan thil lei erawh chu a dik ve ta lo nasa hle tihna a ni. Rakzu lah chu thlawr mawlh mawlh reng a ni bawk. Mahse hengte tireh tur hian Police leh Excise Force te tih theih chu a tlém hle mai a, tlawmngai pawl kutah kan innghat titih a, hlawh nei ho chu an kèl-e-àwl deuhthaw emaw tih tur a ni.

Kan ram hi a letling ta hle mai. Tlawmngai pawlte hnathawh hi ei zawn nana hmang, sorkar mite hian an pui lêt titih a ni tawh a, pawi khawihtute lah chuan hna pui berah an neih avangin, a khát tâwka YMA duty zeuh zeuhte nen chuan an bei ngawrh hlei bawk si a, heti hian kan awm ringawt mai a ni.

Han sawi hlek ila, thuneitute chu a hre hlei hlei an ni zel bawk si.

Chutih laiin Aizawl daiah bawk, M/S Mizo Carbon Product Pvt. Ltd. an tih mai chu a awm a, 'a awm' ti ila 'a awm lo' a ni zawk mah a, awm mang si lo chuan Central Transport Subsidy (CTS) leh Central Capital Investment Subsidy (CCIS), cheng nuai tam tak an la tawh a, chu chu he thil siamna hmun (awm lo)-a lungalhthei leh an mamawh dang man pawh ni lo, a phurhna man ringawt a ni a, tun hnaiah mi ṭhahnemngaiten an zu en a, khaw ram ang chauh a lo ni si a, hmanraw ṭawng-
ṭáwl pui pui leh vai tlangval pakhat hi an zu hmu ringawt a ni.

Chuti chung chuan heng subsidy chi hnih hi an la dil leh ngam tho a, May ni 27-a State Level Committee
ṭhu khawm chuan heng subsidy chi hnih hi pêk atan a lo recommend leh niin Central YMA-in an sawi bawk - kan khaw daia thil thleng hi a va rapthlak ve mawle.

Kan khaw daiah, pên thum lekah, chil chhâk phâk lekah hetiang thil a thleng mek chung hian 'hnathawk ṭha' kan la inti ngam zel ang em?

- RK Lianzuala