Dar 5 a dawr khartir hi!

Tun hnaia sorkarin Covid19 hrileng vanga mipui kaihhruaina tur (SOP) a siamah chuan dawr zawng zawng tlai dar 5 ah khar tur tih a ni. Hetianga tih hi mipui lam him tlan zawk nan a ni ber a, Covid 19 vanga India rama Lockdown nei rei ber state kan nih lai leh eizawnna in nasa taka a tawrh lai pawhin kan sawisel ngai lo. 

Tin, mipui tana roreltu sorkar hian rel sual palh leh tih dik loh palh a lo nei a nih pawhin sawisela mawhchhiat ngawt hi khua leh tui ṭha in a tih tur pawh a ni lo hrim hrim a, kan sawisel ngai lem lo bawk. 

Tuna sorkarin tlai dar 5 a dawr zawng zawng khar tur a tih erawh hi chu a fuh ta lo viau mai. Dawr in hawn chhawk tih pawh kha a fuh lo tawh a, tuna tlai dar 5 a dawr a khar tir vek mai pawh hi thil awmze nei loa, dawrkaite tana harsatna siam sakna bak a ni miah lo. 

Tunah erawh thil a danglam tawh a, Lockdownb leh in kaihhruai dan tur vawi tam tak sorkarin a siam tawh a, finna tham a ni tawh. Ram dang aṭanga inzir tur pawh ni ila, Covid19 hri len dan leh in kai chhawn dan lam ni lo mipui kaihhruaina tur lam hi chu fing khawpin kan siam zing tawh a ni. 

Hetianga mipui kaihhruaina tur siamtute hi sorkar hnathawk te, doctor te pawh an ni thei e, anniho hi Covid19 avanga mipui nawlpui kan buai em em a, eizawnna leh kawng tam taka kan mangan viau lai pawha eizawn­na leh thil danga buai ve map lo an ni daih lawi si. 

Sorkar hian dawr­kaite hi a zuam deuh bik riau hian a lang bawk. Dawr hrang hrangah police an vak kual a, hmai tuam lo an hmuh fuh chuan an chawi tir nghal zat zat a. Chutihlaiin chanchinthar kan en fo a, sorkar mi pawi­mawhte meeting lai a rawn lang fo a, a tam zawk chuan hmai an tuam lo ngai lem lo. Hetianga dan bawhchhia hi meeting leh sorkar function hrang hrangah hmuh tur an awm fo a, kan police ten dere pawh an chawi tir thawm kan hre ngai si lo. 

Chutihlaiin kan police te bawk hi mi dawr chhung an lut a, a ṭhenin thil an ei zo deuh chiah tihah te hmai tuam lo case-in pawisa an chawi tir fo a, sumdawngte hi kan zuam mah mah niin a lang ṭhin. 

Tlai dar 5 a dawr khar hun tir pawh hi a ṭul miah lo. Zan curfew dar 8 tibuai lo turin dawrte an remchan danin khar se a tawk viau a ni. Dar 5 a dawr kan khar tir hian sawngsawhlawtna a awm miah lo. 

Hri leng vanga kan mangan em em lai leh sorkarin ṭanpuina te pawh sem se kan tih viau lai hian eizawnna tibuai zawng hi chuan che tawh lo ang u. Dawr titawp an awm zut a, in ruak luahtu awm lo te a awm chhoh thluah lai hian eizawnna tibuai lo zawnga chet dan i zir ve tawh teh ang u.