Mizo mipui in enfiah a ngai

Mizoram sorkar Pu Lal Thanhawla kaihhruai chuan sorkar sum tipung turin hma a la mek a. Thil chi hrang hrangah chhiah lakna pawh a nei tawh a, tunah hian chhiah thar lakna tur pawh thui tak a ruahman leh a, sum renchemna lam pawh thui tak a kalpui mek niin a lang.

Ni e, Mizo mipuite hi sorkara chhiah pe hreh ber hnam kan ni a, sorkara kan thawh ve tur ang thawh hreh viau si hian sorkar aṭang beisei kan nei vek lawi si a. Hei hi sorkar hnathawkte pawh huamin, mipui mimir hian kan chin ṭhan thil ṭha lo tak a ni.

Khua leh tui ṭha chuan sorkar tan engnge tih ve theih a neih tihte pawh hi a ngaihtuah tur a ni; sorkar aṭangin eng hamṭhatna nge a hmuh theih tih chauh ngaihtuah loin.

Mizoram hi India ramah power supply nei ṭha pawl tak kan ni a, North East states zingah phei chuan kan nei ṭha lawrlak tih chu mipui mimir hian kan hre kher lo ang.

Heti chung hian electric lamah darkar hnih/ thum kan in enchhawk pawhin kan phun luai luai a, a bill pek kan hreh nghal em emte hi Kristian rama tiha mawi lo a ni. Kan power bill-te hi state dang ngaihtuah chuan a sang lo hle tih kan hriat a ngai ta hle mai.

Tui mawlh mai hi a tlawm em em a, chhungkaw khatin connection pakhat aṭanga a tui hmuh a kham tawk em em a, thlatin Rs. 100-150 vel chauh a la chawi zui. Tui hi han lei chiah ila PHE aṭanga kan dawn hlutzia leh tlawmzia a hriat em em a, chuti chung chuan Rs. 200/300 kan chawi chuan a bil a sang em em niin kan hre tlat maite hi kan mizia dik lohzia a lang ching khawp mai.

Ration buhfai etc. te hlei hlei hi sorkar hnathawk a lian ber aṭanga a te ber thlengin kan la a, hei hian sorkar sum tam tak a khawhral phah a ni. Ration buhfai lek phei chu Aizawl khawpuiah ei an tam lo hle awm e. Tute emaw vawk chaw atan an lakchhawn tir mai mai a ni.

Chuvangin, sorkar hnathawk reng rengin rstion buhfai hi dawng tawh lo se, VIP-te pawhin an ration dawn ṭhin titawp vek sela sorkar sum sen chu nasa takin a tlem dawn a, hei hi sorkar hmalakna tur ngei ngei a ni. Sorkar sum ei zawh duak duak ringawt hi ram rethei tan chuan a fel lo a ni.

Chuvangin, sorkar hian huai takin mipui laka chhiah a lak tur ang hi la se, tui bill leh electric bill angte pawh a ṭul angin tisang se. Zu kan zuar dawn a nih pawhin huai takin chhiah la sang ngam se tlemin awmzia a nei ngei ang.