Sun control bel phal a ni leh ta, i lawm ang u!
Hun kha leh chen mahni motor ngei, keimahni pawisa ngeia kan lei ni si pawh mahni duh angin kan chei thei lova, darthlalang lang tlang rel rula kan awm avangin ni sa a hrehawm a, vantlang hmuh theihin kan inpho lang uarh bawka, sun control ṭangkai tak mai chu Supreme Court thurel vangin hlih a lo ni ta a, tunah chuan sun control bel an phal leh ta niin ka ngai a, Aizawlah sun control belna motor ka hmu leh nual tawh a, ka lawm kher asin le.
A chhan chu mi ṭhenkhatin an ziah tawh angin sun control bel avangin lirthei chhung hi a him phah sawt kei chuan ka hre ve lo a, Vairamah motor chhunga pawngsual a thlen ṭhin avanga invenna niin an sawi a. Hei hi a nih chuan Mizoramah chuan a ngaih ve ka hre lova, lirthei chhungah hian pawngsual a thleng ve ngai lova, a lo awm palh a nih pawhin pawng tel lo a ni tlangpui zawkin kei mimawl hian ka ring!
VIP motor-ah pawh sun control belna ka hmu tawh a, Facebook-a Aizawl Traffic group-ah pawh an inhnial deuh rap rap ṭhin a, private motor-ah pawh sun control hi an bel leh ṭan tawh a, chuvangin sun control bel hi an phal tawhah ka ngai a, i bel leh sup sup ang u.
Sun control zuarte pawh an khawngaihthlak a, motor chhunga chuangte pawh zin nikhuain daihlimah an ṭhu ve thei tawh ang chu. Tumahin i khap buai tawh lo teh ang u, a ho lulai e mai.
Supreme Court thurel kan bawhzui tak tak duh a nih chuan thingzaite hi man vek law law se a ṭha zawk.