A VA'N SUAL THEIH TAK!
Mi sual nih hlawh hi a har lo teh e. Tualthah, eirûk leh pawngsual case awrh kher ngai lo hian a lo sual theih khawp mai!
• In office leh school-a in thawhpui pakhat, a nghet lo (MR) lehnghal chu ṭan hun dar 9:00 am-ah a rawn thleng ngai meuh lo a. Dar 11:00 am-ah te, a duh hun hunah, a châng leh a lo kal lo va. A nam ther ther fo lehnghal a. Chawhnu lamah tu mah hrilh loin a bo zing hle. A nihin a ni ta em em lo ve, tiin, châwl tawh mai turin i ti ta a. Mi hriat thiamna nei lo, misual i lo ni ta!
• In awmpui nula chu a fuh vak lo a, a tho tlai a, a taima lo a, TV leh phone a buaipui deuh reng a. Chaw a chhûm fuh thei lo a, tirh a har hle bawk. In awm loh hlanin thil rû chhuakin a tlanbo duh mai ang tih in hlauh avangin in chhuahtir ta nge nge a! A hnuah a dang in lâk leh pawh a hmasa aia nikhualo zawk mah a lo ni leh a, in chhuahtir leh a. Awmpui pawh nei thei lo, mi khirhkhiap chhungkua in lo ni leh ta! In va sual tak!
• I mistiri rawih chu a lo tlai thei hle a. Hna ṭan hun tawhah mei zuin, kuhva ei a han siam kual tê tê a. Hmanrua a tah hriam leh meuh chuan dar 10:00 am a hnai hle tawh a! Tlai lamah bân hma ngawt ngaihtuahin dar 3:00 pm bawrah chuan a za deuh chung zel bawk si. Chuti ziah mai chu tiin, i chhawr zui duh ta lo a. Rethei zawkte harsatna pawh hrethiam lo, mi sual i lo ni leh ta!
• Kawng kama i serthlum huan chu a rah hunah kawng kal apiangin an vawm tla a, a hmuna an ei tur bâk ah haw an chîng bawk si a! Pal i ping phei ta a. Mi uikawm tak, mi sual nih i hlawh leh ta!
• In driver lah chu petrol la tur leh workshop-ah pawh tirh ngam loh, sikret zûk reng duh, kuhva heh si, tirh dawna chhuanlam siam chîng, pa ber chauh hlau, mi dang chu engahmah ngai lo a ni a. I chawlhtir ta a. Driver pawh nei rei thei lo, mi sual chhungkua in ni! Kohhran upa, in nu lah hmeichhe lam hruaitu ni siin in sual lutuk!
• I ṭhian hlui, inhmuh châng apianga ‘Khawi maw?’ tia pawisa dil ziah che a awm a. I pe deuh ziah a. A rui nawi i phâwk zui fo a. Chhiattawhna, mithi vui zawhah ṭum khat a dil leh che chu, pawisa i ah remchan loh thu i hrilh ta a. A lên kual velnaah chuan ṭhian hluite pawh hre lo, inla hausa si, tu nhma lama in harsat laia a lo puih nasat tawh em em che kha i lo ni âwm a! I va'n sual tak!
• In nu eichawp dawr chu a lian bik vak lo. Ṭhenawm lawka chhungkaw pakhat chuan an batsak che a. Bá a inkhâwl zel a, thla 3 hnuah an leiba chu an pe thei tawh em, tih i zawt a. Mi zinga ba ṭhin chîng, kan be tawh lo ang, an bâ pawh hi kan pe duh dawn em ni, an ti che. I va'n sual tak!
• I patea fapa, a nu leh pain an thihsan tawh, zu duh ve tak hian a duh chang changin a rawn tlawh che u a. Kawr thar lei a ngen loh leh pheikhawk thar; a rawn rui ziah bawk a. Nakinah chuan, i insiam ṭhat hma chuan mi rawn tlawh tawh suh, rui chung phei chuan naupang hmuhah kan duh lo. Awm ṭha la, kan hnenah i awm ang a, a remchang changte i thawk ve ang a, i ti a. Mual letliamah chuan nupa sual, thisen zawmpui, fahrah pawh lainat lova hnawtchhuak in ni ta! In van sual tak!
Ṭhat loh theihna mual hi a lo tam viau mai!
- Zobiakvel a (Masena)