SOCIAL WORK LEH SOCIAL SERVICE

Changkanna leh Westernization vangin ‘social service’ hi chu Mizote ah chuan thu thar a ni lem lo; mi ṭhenkhatin vantlang tana hna an thawh a, thil ṭha an tih hi a ni. Social service hi a tlangpuiin mipui-te hamṭhat nana hmalakna a ni ṭhin.

Pawl leh intel-khawm rorelna tam takah hian thil fel chiah lo a awm ṭhin a, chu chu an programme siam-ah hian sap ṭawng telh ve ngei ni se an ti a, hnatlang hi an programme-ah an dah a. Hnatlang tih hi sap ṭawngin ‘social work’ tiin an dah leh palh hlauh ṭhin; hriat fuh tawk loh vang pawh a ni thei. Sorkar thuchhuakah pawh hmuh tur a awm.

MLPC Act in kaihhruaina bu ah ngei pawh mi hrem nan social work neih tir tum a ni a, UPC pawhin social work day mumal takin an nei bawk. Hnatlang hi sap ṭawnga dah kan duh a nih pawhin ‘social work’ tih ber kher hi hman tawh loh ni se. Chuan Sorkar pawh in MLPC Act dan bu a mi ‘social work’ tih kha thu dik an hriat tawh avangin a rang lamin paih ve bawk se.

‘Work’ tih hi Mizo ṭawng chuan hnathawh tihna a ni a, ‘social’ tih chu mipui emaw vantlang tihna a ni ve thung. A lan dan chuan social work chu hnatlang tihna a nih duh hmel khawp mai a, mi ṭhenkhatten an hriat pawlh fo. Hnatlang hi sap ṭawng chuan social work ni lovin social service a ni zawk e.

Social Work chu ṭan-pui ngaite anmahni leh mahni an in puih theih nana ṭanpuina pek hi a bul tum a ni; tlawmngai pawl ṭhenkhatin midangte puih nan an duh duh huna bul an ṭan a, an duh hun huna tawp san leh ang chi hi a ni lo. Social work ti tur hi chuan a kum tel meuh mai zir phawt a, midangte dan dik tak hmanga puih theih dan thiamna zir chhuah phawt a ngai.

Social Work leh social service inanna chu mipuite tan hna an thawk ve ve. A inan lohna chu social service chu hun rei lo te chhungin a zawh theih a, social work erawh chu hun a duh rei thung.

Mizoramah hian social work zirna hmun thumah a awm. Bachelor level-ah chuan Higher and Technical Institute, Mizoram (HATIM), Lunglei ah kum 2010 aṭang khan din niin Bachelor of Social Work (BSW) kum thum chhunga zir theih a ni. Tin, tun kum 2016 academic session aṭang hian Devine Mercy College-in BSW an hawng thar leh dawn bawk.Master level-ah chuan Master of Social Work (MSW) zirna Mizoram University-ah a awm.

Mi an fing telh telh a, tunlai chhana hnatlang tih sawi nana ‘social work’ lo la tih kurh hi chu thil fuh ber a ni lo mai thei. Amaherawhchu, miin hnatlang hi social work tiin lo la sawi ta se, jail tanna khawp sual chu a ni lo, nuih sawh emaw nuih san mai mai chi lah a ni hek lo. Tha taka hrilh fiah mai tur a ni. Hriat lohna hian mihringte hi min ti mawl ṭhin si a.

- LP. Lalnunpuia