FAINA LEH BAWLHHLAWH
India hnam pâ Mahatma Gandhi chuan India ram hi fai leh thianghlim ni tura a duh thu a lo au chhuahpui tawh ṭhin a. Tunah hian Prime Minister Narendra Modi chuan India ram chu fai leh thianghlim ni turin a rawn puang chhunzawm leh ta.
Mahatma Gandhi-a pian champhaphâk kum 150-na tlin hun tur kum 2019 October ni 2 hian India ram chu ram fai ber ni hman tura ruahmanna a kal chho mêk a. Sawrkâr laipuia Ministry of Urban Development (M/o UD) leh Ministry of Drinking Water and Sanitation (M/o DWS)-te chuan ram pum huapin hmâ an la chho char char a ni.
Mizoram bik enkawl, vawn fai leh tihthianghlim hi kan mawhphurhna a ni a, sawrkâr hmalâkna ṭha taka thlâwpin kan hma zâwn ṭheuhah faina kawngah ṭan la thar mai ila. YMA, MHIP, MUP, VDP, JAC leh Welfare hrang hrang kan awm a, kan hma lâk dân chu inang diak diak lo mah se fai kan duh dân leh kan ngaihdân chu a inang deuh vek âwm e.
Khawpui faia hmingthang tak mai Singapore ai hian tunah hian Aizâwla kan nitin bawlhhlawh neih hi a tlêm zâwk a, fai hi kan harsat lo ang. SIPMIU hmalâknain tûnah hian khawpuia kan bawlhhlawhte chu fel fai taka sâwngbâwl tura hma lâk mêk a ni bawk.
Bawlhhlawh bâwm pahnih zêl chhûng tinah sem mêk a ni a, bawlhhlawh bâwmte hi ṭawih thei chi leh ṭawih thei lo chi paihna tur a ni a, chhûngkaw 11,975 chuang hnênah sem ni tawhin sum pawh chêng nuai 418.47 chuang lai sên a ni tawh a, AMC hnuaia Ward 19 chhûnga chhûngkaw 66,094 hnênah sem leh tura hma lâk mêk a ni.
Aizawl mipui nuai thum chuang hian nitina kan bawlh-hlawh paih chhuah hi kg 1,59,800 vêl a ni a, chawhrualin mi pakhatin kg 2 vêl nei ziah ang kan nih chu. Kan bawlhhlawh zâ-a 38 vêl hi ṭawih thei chi a ni a, ṭawih mai thei lo chi hi a tam zâwk a, hman chhunzawm tura han sâwngbâwl mai theih hi engnge maw zât a awm bawk.
Kan bawlhhlawh hi a tam emaw a tlêm emaw a thehthang dân a mûmal loh chuan rei lotêah nasa takin harsatna min thlen dawn a, chuvângin ruahmanna fel tak awm sâ hi kan zawm ṭhat a ṭûl hlê a ni.
Mi tinte hian sawr-kâr laipui duh dânin kum khatah dârkâr 100 tal faina kawngah thawk ila. Chutiang tur chuan kâr khatah dârkâr hnih tal faina kawngah hnâ kan thawh a ngai dâwn tihna a ni a, thil harsa lo tak niin a lang.
Engkim a hun leh a hmunah ti ila, naupang zâwkte zirtir zêl bawk ila, kan hlawhtling ngei ang. Ram nuam i siam ang u.
- C. Lalduhawma,
Member Secretary,
Mizoram Pollution Control Board