Serchhip bialah mihring kan la awm e

Kum 2018 kum tawpa Mizoram Inthlan pui awm turah khan Serchhip Bial mipuite hian Chief Minister bial hun rei tak kan nih tawh hnuah MLA thar atan ZPM CM candidate Pu Lalduhoma kan thlang tling a. Kan thlan tlin chhan chu kan bial min enkawl turin mipui tam zawkin kan duh vang a ni a, kum nga chhunga vawi khat chiah kan hman theih kan vote hlu tak chu Pu Duhoma tan hian kan lo pe tawh a ni. 

Serchhip bialah hian eng party nge tam ber? tih zawhna hi chhan theih a ni lo. Kum 2018 ah kha chuan MNF leh Congress aiin ZPM candidate, ZPM Flag ring, ZPM symbol hmanga rawn campaign, ZPM Manifesto nena rawn in zuar, ZPM boruak kengtu ber Pu Duhoma kha kan duh a. Serchhip bial mipuiin ZPM a ni tih hre chung leh ZPM CM candidate a ni tih hre vek chungin kan lo thlang tling a nih kha. 

Kha kah tuma nawr luih vang ni lovin Serchhip bial mipuiin chhia leh ṭha hriatna nen kan duh tak kan thlan a ni a, ZPM a ni tih pawh kan hre vek a ni. Amah hektu MLA 12 te pawhin ZPM a ni tih hi chu in hre chiang e.

Chuti chuan helai bial mipuiin candidate awm zinga kan duh ber kan thlan tlin khan kan bial min enkawl ṭan dawn chauh a, ram tana thil pawi tak a tih vang emaw, sum tam tak a eiruk vang emaw, hmingchhe taka eirukna leh hmeichhiat mipatna lamah mawi lo taka a khawsak vang emaw pawh ni lovin MLA fel hmel tak tak 12-te chuan, "Dan a bawhchhia," tiin kan MLA chu min han hek sak ta tawp mai a. He thilah hi chuan Serchhip Bial mipuite hi bial dang MLA 12 hian engahmah min ngai lovin min hmusit kan ti lo thei lo. 

Kan duh taka kan thlan tlin hi min peih sak dan ringawt an zawng ta a. Assembly Secretariat buai dan zawng zawng pawh kan lo hre ve vek a (Serchhip lam chhungte hi an thawk ve asin), an hekna tur point leh paih theih dan tur Assembly staff te an zawn buai tir dante pawh kan lo hre ve zel a ni; kan bialtu min paih sak hrim hrim an tum a ni.

Kan duhthlanna, kan ngaihtuahna nena kan lo tih fel tawh, kum nga chhunga kan MLA atana kan thlan min paih sak duhtute hi chu Serchhip bial chuan kan hre chiang ta hle a ni. 

Serchhip Bial hi a MNF, a Congress, a ZPM zawngin kan ṭawng kher lovang, mahse bial mipuite thutlukna pawh min ngaihnep saka kan MLA duhtak, ZPM a ni tih hre chunga kan thlan chu, "ZPM angin a khawsa," tia hekin min paihsak ta a ni. 

Serchhip bial mipui chuan min paihsaktute, a hektute, a phena roreltute pawh hi kan ngaihtuah thiam ve vek a, Serchhip bialah hian party ruihchilh lo mihring kan la awm ve e.