Yoga: Kan ti ve mai dawn em ni?

Tun hnaiah Mizorama Yoga tih leh tih loh chungchangah sawi a tam a, ngaihdan a inang lo a, inhnialna pawh a tam hle mai.

Yoga hi Kristianna leh Pathian thu nen a inkalh lo anga sawi te, Hindu sakhaw thil bik a nih loh thu leh taksa sâwizawina chi khat a nih thute an sawi ṭhin. Hmanlai aṭanga Yoga lo ti ṭhin pawh ni lo, tun hnaia ti ṭan ve chauh Mizote zingah Yoga chungchanga intihre tak tak an tam a. Mahse, Mizote hi Yoga leh Hindu sakhua a inzawm leh inzawm loh hre chiangtu kan ni chiah em?

Sorkar vs MKHC

Sorkar laipui thu angin Mizoram sorkar chuan district tinah Yoga training centre an din mek a, chu chu Mizoram police-te taksa sâwizawina atana tih niin, instructor turte chu Laxmi Hota-in a zirtir a ni. June 9, 2016-a AYUSH department hotute'n an office-a media-te an hrilhfiahnaah, Mizoramah Yoga chungchang hriat chian tâwk loh vanga sawisel an awm ṭhin thu an sawi a. Mizoram police-a Yoga atana nodal officer PC Lallianthanga, Wireless SP chuan police-te tan district pariatah Yoga hmanga insawizawina buatsaih a nih dawn thu leh, district tinah Rs. 8,00,000 ruahman a nih thute a sawi bawk.

Chutih laiin, Mizoram Kohhran Hruaitute Committee (MKHC) hruaitute, June 2, 2016-a Synod Committee Room-a ṭhu khawm chuan, Yoga chu Kristian zirtirna kalh nia an hriat thu an tarlang a, yoga chungchanga fimkhur tur leh inhnamhnawih lo turin kohhran mite an ngen thung. MKHC ngaihdanah chuan, Yoga zirtirna chu Kristianna pawlh dal thei a ni a; chuvang chuan kohhran mipuite fimkhur tur leh inhnamhnawih lo turin inhriattir thar leh an rel a ni.

Yoga leh Modi

Internet lamah Yoga an chin ṭan dan te, an tih dan te, a kalphung chi hrang hrangte chhiar tur a tam a; kan sawi zui vak lo ang. Mahse, internet-a Yoga chungchang chhiara chiang em em chu - Yoga hi taksa sawizawina ringawt ni loin, Hindu sakhua nen a inzawm tlat tih hi a ni. MKHC seminar paper-ah pawh an ziak chiang viau mai.

Nikuma International Yoga Day khan Delhi-a an hmannaah Prime Minister Narendra Modi-a'n thu a sawi a; "Essential that human beings develop internally.“ Yoga is not just for exercising limbs. If that was true, people working in the circus would be called yogi's." a ti. A thusawi tur ziah saah chuan, "People often think that yoga is just a set of exercises. Yoga is a philosophy of discipline and meditation that transforms the spirit and makes the individual a better person in thought, action, knowledge and devotion," tih a ni.

PM Narendra Modi thusawi hian Yoga chu taksa sâwizawina ringawt a ni lo a, rilru sâwrbingna, rilru leh thlarau nun thleng khawih thei a ni tih a tichiang viau. Mizo ṭhenkhatin 'Yoga leh Kristianna a inkalh lo ang leh taksa sawizawina mai a ni' tih an sawi hi rin ngam chi leh innghahna tlak a ni lo.

Entir nan, Sialsuk khuaah 'Pawlmang' an hmang ṭhin a; an hman dan chanchin mi sawi hretu sawi nge, a hmangtute zinga mi ngei sawi kan rin ang? Yoga chungchangah hian mahni ngaihdan leh mi sawi/ziah aṭanga hriate sawi nge, hmânlai aṭanga a taka hmangtu leh nunpuitute sawi kan rin ang le?

International Yoga Day

International Yoga Day hmasa ber, June 21, 2015 khan khawvel ram hrang hrangah hman a ni a, Mizoramah pawh a vawi khat nan hman a ni. Sorkar thu anga Mizorama International Yoga Day hman a ni hi a awm ve viau tho mai. Mahse, nikuma Yoga Day kha Pathianni-ah a tla a, chuti chung chunga a ni tak, Pathianni-ah ngei hman an ti kher erawh kha chu a ṭul lo hle.

Mizoramah hian 'day' chi hrang hrang, pawimawh tak tak hman a lo ni tawh ṭhin a. World Health Day, World Blood Donor Day, World AIDS Day, World No Tobacco Day, International Day against Drug Abuse and Illicit Trafficking, etc. te hman a ni tawh ṭhin. Heng day hrang hrangte hi Pathianni-ah pawh a lo tla ve tawh ṭhin a; mahse, Pathiannia a tlak kumah chuan a ní tak (Pathianni)-ah hmang loin, a tûk Thawhṭanni-ah emaw, hun remchang dangah an hmang mai ṭhin.

Khing day zawng zawng aia Mizo mipuite'n kan ngaih pawimawh, YMA Day meuh pawh Pathiannia a tlâkin Pathianni-ah kan hmang ngai lo a; a hma Inrinni-ah emaw, a tûk Thawhṭanni-ah emaw kan hmang ṭhin. Chutiang chu a nih laia nikuma International Yoga Day kha a ní tak, Kristiante ni serh, Pathianni-ah hmang ngei tura Central sorkarin thu a pe khan ngaihtuah a tithui viau a ni. Mizorama a hmangtu Kristiante ngeiin Pathian thu zah zo loa sorkar thupek zâwma Kristiante ni serha Yoga Day an hmang khan ngaihtuah a tithui lehzual!

Kristiante inenfiah a ngai

Mizo Kristiante hi kan Kristian dan te, Pathian kan rin dan leh Amaha kan innghah ngam dante hi inenchian a ngai hle. A tawp khâwkah hian, sorkar thu nge kan zawm dawn a, Pathian thu tih hi mahni inzawh fo a ṭha awm e. Mizote hi Kristian vek kan ni a; eng vanga Kristian ni nge ka nih, tihte pawh inzawh fo a ṭha ang. Kristian ni miah lo ram hruaitute'n ti tura an tih zingah hian Pathian thu kalhte pawh a awm palh thei a; chutiang hunah chuan sorkar hnathawkte'n an hlawh hmuhna sorkar thu nge, Pathian thu an zawm tâk ang le?

Bible-a Daniela Bung 3-naah Sadraka, Mesaka leh Abednagoa te chanchin kan hmu. Lal Nebukanezzara'n rangkachak milim ropui tak an siam kha a ram mi zawng zawng zawngin chibai an bûk tur a ni a, chibai bûk duh lote chu meipuia paih tur an ni. Anni pathum erawh chuan an bûk duh lo a, "Kan Pathian, a rawng kan bâwl ṭhina chuan rawhtuina meipui ata min chhanchhuak thei si a, i kut ata pawh, aw lalber, min chhanchhuak mai ang.“ Chuti lo pawh ni se la, aw lalber, i pathian rawng chu kan bâwl dâwn lo va, i rangkachak milim din pawh chu chibai kan bûk hek lo vang tih hi hria ang che," (Daniel 3:17-18) an ti! Rawhtuina meipui, a sat dan pangngai lêt sariha an tihsat hnua an paih luh khan meiin a kâng lo mai ni loin, Nebukanezzara chuan meipui chhungah mi pali a hmu a; Pathian dik tak mite an ni tih hriain, meipui aṭangin an la chhuak leh ta a ni.

Sadraka, Mesaka leh Abednagoa te khan ram roreltute thupek pawh ni se, pathian dang biakna thil reng reng an duh lo. Ram roreltute thu an awih loh vangin engkim, thihna thlengin tawrh an huam tih a chiang. Chu tawrhna lak ata chu Pathianin a chhanchhuak thei tih an hriat bakah, chhanchhuak kher lo pawh ni se, thih thlenga Pathian tana tawrh an inhuam a nih kha. Pathian an rinzia leh an rinawmzia kha Mizo Kristiante'n entawn ila a va ropui dawn em!

Nunna hlan ngai êm pawh ni lo, hlawh a kiam phah dawn tih chiang sa pawh ni si lo a, kan Kristianna leh Pathian thu phatsana ram roreltute thu âwiha sakhaw dang thil lo ti ve chiam tur kan ni em? Mizoram sorkar tan, Central sorkar sum ît vangin Pathian thu kalhin thil kan ti mai dawn em ni? Sorkar hnathawk kan nih avangin a dik leh dik lo pawh thliar ngam loin, Pathian thu zâwm loin sorkar thu kan zâwm ang a, sakhaw dang nena inzawm tlat Yoga chu kan lo ti ve ang a, kan lo sawi mawi chiam dawn em ni? Pathian ráwn chungin inngaihtuah chiang teh ang u.

Hei hi sorkar emaw, hotute thu zâwm lo tura infuihna ni loin, thil ṭha lo ni thei, Pathian thu nena inmil lo thilah chuan pute pawh hnial ngam tura infuihna a ni. Sual (sin) do tur hian sual (crime) tih a ngaih cháng pawh a awm thei awm e.

Mizo ṭhenkhatin Yoga kan lo sawi mawi ve chiam te, Pathian thu leh Kristianna nen a inkalh lo anga sawi te, sakhaw dang zawmna a ni lo anga sawite hi thil awm ve thei tak a ni. Intihchangkanna, intihvengvatna, rilru zau pú nih duhna rilru vangin Pathian thu hi kan ngai pawimawh thei lo a ni mahna!

Tlipna

Yoga hi a hlauhawm a ni lo a, MKHC leh a duh lotute hian an hlau hrim hrim a ni lo. Kristian, Pathian ringtute tan hlauh tur a ni hek lo. Yoga duh lotute hian an hlauh vang ni loin, an duh lo vang te, Pathian ringtu Kristiante tih ve chi a nih loh avangtein ti ve lo tur leh inhnamhnawih lo turin an inchah a, kohhran hruaitute pawhin ngenna an siam mai a ni zawkin a lang.

- K. Zothanpara