Politics hi kan buaipui thar a ngai

Hman deuh khan politics-ah beiseina min siam a, a tawpah beidawnna khurah bawk min luhpuitu pawl kha an awm a, inthlan dawnah thawm an nei a, an zuih ral zui ta mai mai kha a ni. Tunah political party pahnih lek nei ang mai kan ni a, anni pahnih kan ninzia leh kan duh lohzia hi kan hre tlang vek tawh si a, chuvangin politics hi mi tharin kan buaipui a ngai tawh a ni.

Politics hi kan buaina thlentu a ni a, kan buaina chingfel theitu a ni bawk tih kan hre reng si a, tuna politician-te hi chuan an kal mek dan bak hi an hre lo. Tunah hi chuan inthlan dawnah tute emaw pawisa hmangin an campaign a, inthlan zawhah chumite chuan politics-a an Chiahpuam chu seng leh tumin contract an dil a, sorkar aṭanga sum la chhuak hnem thei nih hi kan hausak tum dan a ni tawh a, hei hi kan kalphung thlak theih tawh loh chu a ni si a, kan ram hmabak hi a thim hle a ni.

Kan ramin hma a sawn dawn chuan kan politician-te hian hma an sawn a ngai a, chu chu kan beisei theih a ni si lo. MNF leh Congress bak hi sorkarna chelh tur an awm tawh si lova, tuna kan awm danah hi chuan he Zoram hmasak hi a la thim hle a ni tih hi ka sawi duh a ni. He ram hian hmasawn a duh chuan politician thar a neih a ngai, chumi tur chuan tute emaw hian party thar an dinin awmzia a neih ka ring lova, party lian tham a nih meuh chuan kum 30 emaw a liam hman ang, chu chu ZNP-ah hian a chiang a, party hi a ṭhang chak thei lo. Hei vang hian party awm saah mi thar lut mai zawk awh se.

Mizo zingha mi thiam tak tak kan nei ṭhin a, hengte hian political party an zawm hian an ze ngai an pu zui thei lova, party zia hi an rawn pu chhuak ṭhin a, hei hi ramin a tuar a ni. Tuna ka rawt duh chu mithiam rual leh hawi zau deuhte hian a hlawmin khawi party emaw zawk hi zawm ta se awmzia a nei thei ang em? tih a ni a, politics hi kan buaipui thar deuh a ngai a ni.