TRAFFIC ZAM HI

Lirthei nei ve lo tan chuan city bus leh taxi hi kan lirthei neih chhun a ni a. Bazarah leh khawii hmunah pawh han kal dawn ila taxi leh city bus lo chu chuanna tur dang kan nei lo. Chutihrual chuan a bikin city bus leh taxi te hi duh aiin an fai tawk lo emaw tih mai tur a ni a, chuan a hrehawm deuh ṭhin.

City bus te phei hi chu conductor nei an ni a, tun ai hian fai deuh thei se a duhawm ngawt mai. Ṭhenkhat erawh fai tak tak an awm tho. Chuan bus chhe deuh hlek tawh leh hlui lutuk tawh hi chu sawrkar hian service tir tawh loh dan ngaihtuah se a duhawm ngawt mai. A thara thlak (replace) tir dan ngaihtuah se.

Tuna kan sawrkarin replacement a theih loh a tih hi, a bikin city bus-ah leh taxi bikah hi chuan phal thei se a duhawm ngawt mai. Heng motor ṭawng tak takte hian traffic zam an thlen chang a tam hle.

Taxi fai tak tak, chuan chakawm ngawih ngawih, rimtui tak, driver fel tak tak, zurui chunga khalh mai mai lo mi tam tak an awm laiin ṭhenkhat erawh hi chu han chuan chak awm lo ngawih ngawih, chhe lutuk, kawng chhoah phei chuan a driver chauh pawh a zo lo ang a tih khawpa chhia an awm leh nuk bawk; a zia lo hle. A bik takin eizawnna lirthei (commercial vehicle) te hian mipui tana chuan nuam thei tur ang zawng leh chuan chakawm tur ang zawnga motor enkawl fai kawngah hian ṭan la se a duhawm hle.

Hmanni chu Chan-mari aṭanga city bus ka chuang phei chu Sikulpuikawn thlen nan darkar khat chuang ka hman phah a, ka thin a rim hle. Tih theih erawh ka nei der si lo. Ka thin tirim lehzualtu chu, kha traffic zam chhan kha eng dang vang ni lovin, kawng chhak leh kawng thlang lama motor an dah hlawm avanga kawngpui chep lutuk vang kha a ni.

Chu lo lehah chuan, bazar city bus stand hma chiaha sumo
ṭhenkhat tlan chhuak tur leh stand-a back lut tur insiam rem vel vang saw a ni. Saw lai sumo stand saw khawi lai hmunah emaw sawn chhuah dan awm thei se a duhawm ngawt mai.

Chuan, Lower Zar-kawt pheiah hian kawng sirah motor dah phal tawh loh tih ni se a duhawm ngawt bawk. Kawngpui a tichep a, traffic zam a thlen nasa bawk. Kawngsir tawn tawnah lirthei an lo dah tawh chuan kawngpui a ti zim em em a, kea kal tan pawh a chep lutuk a ni.

Lirthei nei kan tam tial tial a, Aizawl khaw chhung kawngpui lah zauh ngaihna a awm tawh si lo a. Chumi avang chuan Aizawl bikah hi chuan tun aia nasa zawk hian nitin traffic zam hi kan tawkin kan hmachhawn dawn tih hi thil lang chiang tak a ni a, traffic zam a ziaawm theih nan ruahmanna felfai zawk kan siam a hun hle.

Tun ang renga kan kal chuan Aizawl khawpui traffic zam hian ziaawm lam pan a hnekin zual lam a pan zelin a rinawm. Chuvang chuan, tun aṭang hian kan sawrkar hian huaisen taka hma an lak a ngaiin a hun ta. Mipuiin sawrkar thlawp ṭha bawk ila.

- Nawlchunga Chinjah, Siaha