ANI KHA

Ka ṭhianpa nupui damlo kan tura ka kal ṭum kha ka la hre reng mai. Vanduai thlak takin an khua aṭanga Aizawl an rawn panna kawngah a hrawk a vung vak a, a tuk zan aṭang phei chuan a vung khan a hnawh tlat avangin a thaw hlei thei tawh lo va. Hmanhmawh takin Aizawl Hospital-ah an tlan pui nghal a. Oxygen nen theihtawpa an inenkawl hnuah a zia chho ve deuh a. Thingtlang mi harsa tan chuan senso te a lo hau tak em avangin Civil Hospital lamah an insawn ta a. Chuta ka thil hmu chu ni vawiin thlenga ka rilrua riak ta reng chu.

Damlo ka kan ka han ti tak na in ka hmel kha ka va inlan ve a ni deuh mai a, engmah phei chu tihsak theih ka nei lem lo. Ka ṭhianpa nupui pa chuan, ‘Keini chu Pathian zarah ngaihtuahawm kan ni tawh lo ve, saw lai lawkah sawn keimahni lam mi an awm a, awmpuitu pawh an nei miah lo; va tlawh ve lawk ang hmiang,' tiin min sawm a.

Kan inzui phei a. Naupang kum 11 mi, natna khuma mu, putar chau tak pakhatin a lo awmpui mek chu niin. Zai pui a lo tawk ve reng mai a. Kan va thlen lai chuan doctor leh nurse-ten an zaina hnu hma te an lo enfiah mek a. Luh mai a rem chan loh avangin pawnah kan nghak ta zawk a. Ka thianpa nupui pa chuan ti hian a chanchin min hrilh a.

“A ni kha... khua an ni a, kum 11 vela upa a ni. A nu leh pa te an inṭhen a, a tu ve ve mahin an ngaihsak loh avangin a pi leh pute in an enkawl a. A pu chu i hmuh ang khan tar tawh tak mai a ni a. A pi erawh chu khaw lamah vawk leh ar te an vulh ve avangin a rawn kal pui ve thei ta lo a nih kha. Vawi hnih lai mai zai pui a tawk tawh a, naupang kum 11 mi tan chuan rapthlak tak a ni. Zam lamah pawh riahpuitu an nei ngai lo a. A pu, tar tawh tak khan chau tak chungin a menpui hram hram ṭhin. Tum ṭuma zai a tawk leh phei chu an zaina kha a chhunglamah a pun vak a, an silfai sak chang chuan a na ti lutuk hi a ṭap vawng vawng ṭhin asin," tiin min hrilh a.

Chu thu chuan ka thinlung hi a nghawr che dawt ni berin ka hria. Theih ni se a tupa tuar ai kha tuar a chak ngawih ngawih tih a pu hmelah khan ka zuk hmu thei a ni. Ka rilrua thil rawn lut hmasa ber chu a nu leh pa te an ni - mi tlak tlai lo ber an va ni em. An nawmchenna vangin naupang pawi sawi loin hetiang khawp hian a tuar ta chu a ni si a. Thlamuantu nu leh pa a mamawh ngawih ngawih lai hian khawnge an awm? Nu hmangaihna kut chuan kuah ni se a na pawh a dam deuh tur. Mi tam tak chuan fa an nei ve duah a, Laiking fa nei an sawi ang maiin an ngaihtuah zui leh si lo.

Ni li a liam hnuah damdawi inah chuan ka va kal leh a, an khum chu a lo ruak huai mai a, hmuh tur reng reng an lo awm tawh lo. Engtikah khan nge an chhuah? Dam takin damdawiin an chhuahsan nge a thi zawk? Ka mitthlaah naupang khawngaih thlak tak leh a pu kha an lo lang a. Ka exam a laklawh em avanga zan khat lek pawh ka riahpui thei ta lo kha pawi ka ti a ni. Vawiin thleng hian ka thinlungah kha mite pu tu khawngaihthlak tak kha an lo lang leh ṭhin. Nimin ang mai hian ka thinlungah a thar leh ṭhin.

Kha naupang khawngaih-thlak tak ka hmuh aṭang khan ka rilru nasa takin a insual a. Fa te lo nei ve ta i la, khatiang dinhmunah khan dingin bawihsawmtu nu leh pa awm lo se, eng ang chiahin nge a rilru a nat ang tiin ka ngaihtuah a. Khatiang hreawmna kha tu chungah mah thleng nawn turin ka duh lo a. Nu leh pa ni mek leh la ni turten khatiang thil kha chu tumah in kan fate chunga thleng tur chuan kan duh ka ring hauh lo. Mahni chauha ka awm changa ka rilrua zawhna awm reng ṭhin chu, ani kha engtin nge a awm tak zel ang le tih hi a ni.

- K. Lailianthanga

Sangau, Zion veng