Charley Pride (1932-2020) Sun nan

‘All I Have To Offer You Is Me’ te leh ‘Kiss An Angel Good morning’ hla avangtea country music tuipuitute beng min fah ṭhintu, Charley Pride chu kâr kalta Inrinni, December 2 khan Dalls-ah Covid-19 avangin kan chân leh ta! Amah hi kum 86 mi a ni. Amah thlah nan a chanchin kimchang lo tak ziah hi ba veah ka inngai tlat. 

Mississippi khaw chhuak, African-American (mi hâng) zînga Country star hlawhtling ber tia chhâl ngam, Charley Pride hian a vânglai, kum 1966 aṭanga 1987 chhûngin Billboard Hot Country Songs chart-ah hla 52 lai top-10 hits nei theiin hêng zinga hla 30 chu #1 ni pha a nei thei a. African-Americans zîngah chuan DeFord Bailey leh Darius Rucker te nên, a rualin the Grand Ole Opry-a mi hâng member ni thei hmasa ber an ni.

A hminga Charley tih hi a pa’n a birth cerificate a ziah sual (“Charl” tih tûra “Charley” tia a ziah) vânga pu hlen a ni. Kum 14 mi a nih laiin a là (cotton) hralhna aṭangin a ṭingṭang hmasa ber chu dollar 10-in a lei a. A pa hi blues music hla thu leh a satute leh ngainatute khawsak phung ngaithei lo zinga mi niin Grand Ole Opry fan ruhkawl a ni thung. Memphis aṭanga tihchhuah, B. B. King-a radio show aiin a fapa Charley Pride pawh hi Country music star hmasaho - Ernest Tubb, Pee Wee King, Hank Williams te leh Roy Acuff te a ngainat hmasaktîr zâwk a ni.

Kum 16 mi a nihin Pride hian Negro American League-a professional baseball khelh tumin in a chhuahsan a. Memphis Red Sox tan kum khat a khelh hnuah 1953-ah New York Yankees C-team, Boise Yankees tan a khêl leh a; mahse a inhliam hlauh a, Yankees' Class D team-ah khelhtîr a ni ta a ni.

Kum 1956-ah US Army-ah a ṭang a. Memphis nula Rozene Cohran nên inneiin 1958-a sipai aṭanga a bân rualin baseball league lian zâwka khelh dân kawng zawngin Pioneer League-ah a khêl zuai. California Angels-ah te a khelh leh hnuah a bán a hlìam avangin baseball khelh chu a chawlhsan ta a ni.

Hetih laia country stars Red Sovine leh Red Foley te fuihna zârah rimawi lama inhman zui tumin kê a pên chho a. Kum 1958-ah Memphis-a Sun Studios chu tlawhin hla eng emaw zat a record a. Montana-a club ṭhenkhatah zaiin a inhlawh kual pah bawk ṭhin. 

Kum 1965-ah RCA Victor enkawltu, Chet Atkins chuan a demonstration tape a ngaihthlâk hnuah Pride chu be pawpin contract a ziahpui ta a. 1966-ah RCA Victor hnuaia a single hmasa ber “The Snakes Crawl at Night” chu an tlângzarh ta. Chart-ah lang pha lo mah se radio station hrang hrang chuan, ‘Country Charley Pride’ tiin an playlist-ah an dah a. Mahse, a thlalâk erawh an chuantîr duh tlat lo! Mi hâng country singer chawisân chu an hreh vâng a ni ber a; hei hian Pride hi a tilâwm viau lo. 

Hemi hnu hian “Before I Met You” chu tlângzarh lehin chart-ah a lang pha chuang lo a; mahse, a single pathumna, “Just Between You and Me” tlângzarh a nih leh chuan Country charts-ah #9 a hauh ta. A kum leh Grammy Award-ah nomination a hmuhpui ta hial. 1966 nipui laiin Detroit-a Olympia Stadium-a show lian tham hmasa ber neihpui atan an sâwm ta hial a. He show-a tel mi sîng chuang chuan Charliey Pride chu mi hâng a ni tih an hre ta chauh a. Chu pawh, stage-a a lâwn chhuah hnuah chauh a ni. Amah hmu châk mipui au thâwm pawh a hmêl an hmuh rualin an reh nghâl dûk hial a ni!

A vun rawng avang hian hlawhtlinna a chan tûr ang pawh a chang pha thei chiah lo a. Kum 1967-ah the Grand Ole Opry-ah a inlan a; 1925 – 1941 chhûnga harmonica player DeFord Bailey inlan hnua mi hâng country zaithiam inlan leh hmasa ber a ni nghe nghe. 1969 leh 1971 inkârah Pride-a singles pariat, “All I Have to Offer You (Is Me)”, “(I'm So) Afraid of Losing You Again”, “I Can't Believe That You've Stopped Loving Me”, “I'd Rather Love You”, “Is Anybody Goin' to San Antone”, “Wonder Could I Live There Anymore”, “I'm Just Me” te leh “Kiss an Angel Good Mornin'” te chuan Billboard Hot 100-ah #1 a hauh pha ta vek mai a. Kum 1969-ah a hla hit dah khâwmna album, “The Best of Charley Pride” chu tichhuakin copy mtd. chuang hralhin gold disc a dawng ta hial a ni. 

RCA label zinga amah aia record hralh ṭha chu Elvis Presley chiah a ni.

Kum 1971-ah a hla hit ber, a signature tune, “Kiss an Angel Good Mornin'” a tichhuak leh a. Copy mtd. chuang hralh lehnghalin a kum leh Country Music Association award ngaihhlut ber, Entertainer of the Year award a lâkpui hial bâkah Top Male Vocalist award a dawng tel bawk. 1971 kum tâwp lam leh ’72 kum tîr lam, kâr nga chhûng teh ngawt he hla hian Country chart-ah #1 a hauh a; a hla zinga Pop chart top-40 hit a neih chhun a ni bawk.

1970s leh ’80s thleng khan a hla hrang hrangin chart an luah châwl lo a. Tin, country stars dang ang bawkin Hank Williams a hla a sakna album pakhat, “There's a Little Bit of Hank in Me” a tichhuak ve bawk a. He album-ah hian Williams-a hla hit, “Kaw-Liga”, “Honky Tonk Blues” te leh “You Win Again” te pawh sa telin copy mtd. 70 chuang a hralh tling hial a ni.

May 1, 1993 khan Pride hi the Grand Ole Opry member ngheta lawm luh ni a; 2018 May 4 leh ni 5 khan, Opry member a nih kum 25-na lawmna hun a buatsaih nghe nghe. Kum 2000-ah Country Music Hall-ah Fame-ah lâkluh a ni a, 2008-ah Mississippi Arts Commission chuan Lifetime Achievement Award an hlan bawk. Kum 2016 khan CMA Awards kum 50-na lawm a nih ṭumin Country zaithiam mi 30 ‘Forever Country’ sa tûr an thlan chhuah zingah a tel bawk a ni.