No Vehicle Zone mipui tan malsawmna

Kan Mizoram sorkarin Krismas vuakveta 'No Vehicle Zone' a buatsaih ṭhin hi mipui tan a thawventhlakin a huam chhung kawngpui dungte chu lirthei hlauhawm lakah inven reng ngai loin hmun ralmuangah a siam a. Hei hi sorkar thawh rah malsawmna, mipui hnen lo thleng tia kan sawi theih langsar tak pakhat chu a ni awm e.

Hetiang thil naran lo tak, thuneihna chak tak hmanga tih puitling a nih hian mipui lam aṭanga lawmthu sawi thawm sorkar beng thleng phakte pawh eng media hmang pawhin ni se tuma hnial chi niin a lang lo a, mah se mipui lam aṭanga lawmna ri hi ti ti thuphunga a rik bak sawi tur a vang deuh niin ka hria. Chuvangin, thawm nei thei ang chite an ngawih tlat siah chuan, no vehicle zone ṭhatzia a taka changtu ka nih ve avangin ka han au chhuahpui ve dawn a ni.

Highway leh kawngpui kan neih zawng zawngte hi mimal emaw sawrkar official-te emaw, motor nei ngahte leh roreltu, MLA etc. te tabil ni loin mipui ta (property) a ni. Mipui chu ramchhunga mi hnuaihning ber aṭanga ram awptu lal ber huapzo sawina a ni. (Kawng danga sawiin ram neitu 'citizen' tawh phawt chu mipui an ni). Kawngpui zawh leh hman chungchangah pawh mipui kan tih zawng zawngte hian equal right an nei ṭheuh a (pianpui dikna kan neih

ṭheuh ang tho hi a ni.) Mi a hausak em avangin miretheiin kawng a kian ngei ngei tur tih dan a awm lo a, "Mitdel leh bengchhette chu piangsual an nih avangin kawngpuiah an kal ve thei lo ang" tih dan a awm hek lo.

Pianphunga rualbanlote thlengin kawngpui neitu an ni a, an pawimawh dan a zirin kawngpuiah an kal mai tur a ni. Kawng an kan a ṭul pawhin an kal ve ang a, mah se traffic an tihbuai lohna turin duty-ten an veng mai tur a ni zawk.

No vehicle zone

ṭhat dan point 5

I. Ram chhung mipui din­hmun inthlau tak tak, a hniam ber aṭanga a sang ber thleng, thleibik awm loa hrutrualna Dan a ni a. Motor (lirthei) tam tak neite leh nei ve zo loa kea kal ṭhinte kawngpui dungah ralmuang taka an lenza theihna hmun a ni.

II. Khawvel hmasawnna

ṭhang zelin a ken tel, lirthei chi hrang hrang a lo tam tak em avangin kan Zoram khawpui ber Aizawl kawngpuite chu kea kal ṭhinte tan chetsual hlauhthawnna hmun ralṭi a lo chang zo ta! Chutih rual chuan kan hunpui Krismas leh kumthar vuakvetah lirthei tlan phal lohna 'No Vehicle Zone' buatsaih a ni ṭhin hi mipui sang tam tak malsawmna a ni.

III. Mizoten kum khat chhunga hunpui kan neih Krismasleh kumthar den­chhena No Vehicle Zone sor­karin a buatsaih hian kawngpui chhawr thei tura mitinte dikna (right) 100% a hman theih a lo ni ta ṭhin a. No Vehicle Zone hi a nuam a, ṭhenrual hluite leh ṭhian inhmu ngai tawh lote in chibaina hun ṭha a lo ni ta a nih hi.

IV. Lirthei awm phal lohna zone siam a nih hian motor diesel leh petrol hmang tam takte chu garage-ah an chawl ṭhup mai a, an chawlh chhung ni hnih emaw lekah pawh petrol leh diesel man cheng tam tak an save a, motor-in boruak chhia 'carbondioxide' a tih chhuah ṭhin pawh a chawl ṭhup a. Hei hian environment tichhe zawnga chetna nasa takin a do let tih a hriat theih a ni. Kawngpui chhung 2 km lek No Vehicle Zone a nih pawha sum tam tak save a nih a, environment humhim theih a nih si chuan khawpui chhung area zawng zawngte hi lirthei chet phal lohna No Vehicle Zone han ni thei ṭhin phei se chuan hmasawn zel chauh mai lo chu hmabak kan nei awm lo e!

V. No Vehicle Zone huam chhung kawngpui dunga motor awm tlat ṭhin te, thupek awiha an kiang duak ṭhinte hian Aizawl a tinuam a, No Vehicle Zone hun a zawh rual ruala kawngpui dunga khat leh mai ṭhin erawh Aizawl tihreawmtu a ni.

Thil veiawmte

No Vehicle Zone ṭhatzia kan sawi hian a buatsaih theitu chu sorkar chauh a ni. Ram chhung mipui tana thil ṭha siam chhuak theitu chuan ram chhunga thil ṭha lo leh hmasawnna dal theitu, hlemhletnain a ken, mi hriat loha eiruk chingte pawh tih reh a nih theih nan rorel an thiam ang tih hi kan ring ngam tur a ni a. Self-confidence an neih a pawimawh takzet.

Zoramah hian eng party pawhin sorkarna lo chang sela, Kristianna nena inhmeh, retheite chawikang thei zawnga rorelna kalpui mai tur a ni. Pathian hnam thlan, Juda leh Israel lal, retheite ngaihsak loa mahni ropuina mai umtute chu Pathianin lal reng atan a duh lo a, an lal hun chhung a tihtawi sak mai ṭhin tih kan hria.

Mizo zinga politician tam berin politics an thiam theih hauh loh chu, mahni party vawrh san tum luatah party dang sawichhiatna ṭawngka, ar chuk tui lo khawpa inbeihna an bansan thei lo hi a ni. Ram leh hnam hian hmahruaitu

ṭha a mamawh a, chutiang tur chuan mithiam an nih ruala mi rinawm leh belhchiandawl an nih tel a ṭul tih hi kum 2015 a lo thar rual hian i thar chhuahpui ṭheuh ang u.