Mizoram mamawh weigh bridge

Vanglaini dt. 19th December, 2014 chhuaka thupui 'Sawrkarin lei chim pahnih a sawifiahna leh lei chima thi leh hliam' tih kha ngun takin ka lo chhiar a. Lei pahnih chim chhan leh nunna hial chan leh hliam tuarte chunga pawi a tih thute tarlan a ni a.

Sawrkarin lei chhiat chhan nia a hriatte sawifiah tawh mah se ngaihdan hrang hrangte pawh tarlan a ni. Sawrkarin ngun taka thil a zir chian a, tih tur ṭul hmasa enge ni tih hriaa a bawhzui a pawimawh khawp mai.

Vanglaini a i rawn tarlan danah hian Tlawng lui hi MT 24 (quintals 240) aia rit phur tan zawh phal loh tih tar a ni a. Chu chu pawisa loin MT 35.76 (quintals 357 chuang) phurin vawi eng emawzat an zawh thu i rawn tarlang a. Tunlai truck lian chite chuan ke 12 te a nei tawh a. Truck/ motor reng reng hi a phur phal zat bithliah vek a ni a. Phal chin awm mah se heng ke 12 neite hi chuan phal chin aia tam MT 35 (quintals 350 aia tam) te an phur ṭhin a. Silchar leh Aizawl inkarah an tlan zut zut reng tawh a ni.

Heng truck/ motor phurh rih zawng/ document etc lo endik tur hian Mizoram sawrkar chuan Vairengte-ah Enforcement check gate a dah a, Inspector hoin an awm ve a. Mahse, truck phurh rih zawng lo endikna tur (weigh bridge) a awm si lo a, sumdawng leh contractor-ten duh zat zat phurin an paltlang mai mai ṭhin a ni. Hei hi kan kawng leh lei chhiat chhan bulpui ber pakhat chu a ni.

Weigh Bridge hi Vairengte-ah hian Mizoram sawrkar hian dah ta se chuan dan ang thlapin truck hi lo endik ta bawk se, phurh tur phal chin baka tam phur truck ho chu pawisa chawitir tur a ni. Chu chu sawrkar tan pawisa lakluhna ṭha tak a ni dawn bawk a ni.

Sawrkar pawisa indaih loh avanga Ration buhfai Kg 1 Rs. 9.50/- chu 2015 aṭang chuan kg 1 ah Rs. 15/- a hralh turin Assembly hialin a lo pass ta a. Kg ah Rs. 6.50/- a han sang dawrh tur chu mipui tan chuan na tak a ni. Amaherawhchu, kan sawrkar hian sum harsatna a tawh miau avangin ti lo thei lo dinhmunah a ding ta a ni ngei ang.

Chutih laia dan ang taka sumdawng leh contractor-te aṭanga pawisa ṭha­hnem tak a hmuhna tur a ni dawn a, chuvangin Vairengte hmunah hian weigh bridge a rang thei ang bera buh hi sawrkar tih makmawh a ni.