KAN MLA-TE THUKHAWCHANG THLIRNA KAWNG KHAT CHU

Mizorama kan rorelna sang ber Mizoram Legislative Assembly thlasik ṭhutkhawm (2014)-a kan MLA-te thu aṭanga hma kan sawnna tur, vei zawng ka neih te; kan ram tan kawng khat tala hmasawnna a nih theih beiseiin ka han au chhuahpui ve e. A bik takin Ni 21, November, 2014-a, MNF member Dr. K.Beichhua resolution put luh, "Mizoram chhunga inkalpawhna kawngpui leh leihlawn chhe ta lutuk hi tun aia chak zawkin siamṭhat hna thawh ni rawh se," tih sawihona rilrua mitthla chunga ziak ka ni.

Kan MLA/Minister te hian a theih lohna lam thu mawi taka min fah tam lo in, a theih dan kawng zawk hi min hrilh tam thei deuh se, keini mipui tawn hriat nei tam lo, khawvel hmun zau zawk pawh hmu ve pha lote hian, a theih lohna lam kan hriat nasat lutuk chuan kan tha a ṭhum ang a, kan dâwih tawlh tawlh ang a, hnam dang leh khawvel hmun dangte kan chung en lutuk palh ang e. Khawvel hmun dang changkang zawkte awhna hi kan intuh nasa tulh tulh tur a ni a, awt satliah mai lo in; lehpelh zawk pawh kan tum tur a ni dawn lawm ni. Thawhrimna leh taimakna aṭanga hmasawnna leh changkanna hi lo awm a nih tak zet chuan Zopa, Zonu leh ṭhalaite hian chu kawng chu kan zawh ve thei em em ang.

Hmasawnna muan chhana rambuai mawhpuh reng mai hi a rei lutuk tawh lo maw le? Rambuai hnuah khawvelah hian thil ropui leh thar a piang hnem tawh em mai. Mahni ṭanhmun tihngheh nana chhuanlam leh insawithiamna lam uar lutuk hi mipuiteah a tla na viau dawn em ni ang aw? Insawi mam lamah hma kan la sawn viau zelin a lang bawk. Kan tihdik tawk loh pawm mai ngamna leh siam ṭha zel tura mipuite thlamuanna aw kan hre tlem lam deuh. Entirnan, "Kan ram lungte hi a no a, kawngpui a tlo hlei thei lo," tih te hian eng thil ṭha zawk nge a thlen ang le? Chu ai chuan, "Kan ram lungte hi a no deuh mah se, theihtawp kan chhuah ang a, kawngpui ṭha zawk kan siam ngei dawn a ni," tih lamhawi tumruhna hriat a van chakawm em! Kan ram lugn thoa siam, Sesawng leh Darlawn kawng dungte khi a tlo em em tih thu a khaw mipuiten an sawi fo mai.

Khelmual ṭha 'Artificial Turf' (phul lem kan tih mai) phah kawnga hma la ṭha tak, kan sawrkar hian kawngpui tlo zawk a siam theih ngei hi a rinhlelhawm loh a ni.

Kan MLA-te aṭang hian beiseina êng kan nghak a, dawihzep hawi zawnga thu chah sawi lo, huaisenna 'thir ang maia chang' leh tumruhna 'kahpathir tlo anga daihrei' min chhawm nunsaktu tur kan thlir ngawih ngawih a nih hi.

Kan ram tana hlawkna awm tawh lo, term hmasa lama party kan hnawl lailawkte mawhpuh tel zel mai hi a rem teh ṭeuh lol mang e aw! "Min thlang tling rawh u; tun aia sawrkar ṭha hi kan pe ang che u," tia inzuar ten hun kal tawha mite kan sawi lang leh kher ṭhin hi chu a puitling zia lo deuh em? Sawi lan ṭulna a awm a nih pawhin, "Hun hmasaa an tih dik loh siam ṭhat ngai kha heti zawng hian kan siam ṭha a, kan thlen chin chu heng hi a ni e," tihte talin chhanna min pe ṭhin se, mipuiten hawizawng mumal kan nei thiam deuh ang.