BUHFAI MAN TIHSAN KA THLAWP E

Vanglaini chanchinbu July 4, 2024 chhuaka Food, Civil Supplies & Consummer Affairs Minister-in ration buhfai card var neite tana buhfai khulna kg khat zela Rs 15.00 ni ṭhin Rs 30.00-ah tihsan a nih thu tarlan hi ka thlawp e.

FCSCA Deptt-in RTI Act hmanga ka zawhna min chhan dan chuan, Govt. of India aṭanga thla tina kan buhfai dawn dan chu hetiang hi a ni:

Antyodaya Anna Yojana (AAY) = 8,942.85 qtl.

Priority Household (PHH)

= 30,954.60 qtl.

Tide over (TO)–14,900.88 qtl.

AAY leh PHH atana kan buhfai dawn hi a thlawn (free of cost) a ni a, tide over erawh hi chu quintal khat Rs. 830.00 zelin kan lei. National Food Security Act-in a huam ve loh non-NFSA (card var) hmangte tan hian Mizoram sawrkar hian thla tin buhfai hi 40,000 qtl. lei belhin, qtl. khat Rs. 3,550 zelin a lei ṭhin.

Buhfai man hi chu buhfai man a ni a, hei bakah hian a phurh man a la awm. RTI hmang thoa ka zawhna FCSCA-in min chhannaah chuan, FCI Godown aṭanga buhfai kan lak chhuaha Mizoram hmun kilkhawr ber Tongkolong thlenga a phurhna hi chawh rualin quintal khat zelah Rs. 480 kan chawi. AAY leh PHH atana kan buhfai dawn hi a thlawn pawh ni mah se la, a phurh man hi Mizoram sawrkar hian quintal khat zelah Rs. 480 a chawi tho a ngai. Tichuan, non-NFSA atana kan buhfai lei qtl. khat Rs. 3,550 tih hi a nihna takah chuan Rs 4,030-a lei ang kan ni tihna a ni. Retailer-te'n godown aṭanga an fair price shop thleng an phurna hi Mizoram sawrkar hian a pek a la ngai cheu bawk.

Ration buhfai atana sawrkar senso ngaihtuah hi chuan non-NFSA (card var) neite tana ration buhfai khulna Rs. 15.00 aṭanga Rs 30.00-a tihsan hi thil tih awm ngawih ngawih niin a lang. Ration khulna tihsan a ni chung pawh hian thil danga senso (thawktu hlawh, etc) chhut tel miah lo pawhin sawrkar hian quintal khat zelah Rs. 1,030.00 zel a la hloh sa tihna a ni.

Buhfai man tihsan hi 100% ngawt a nih avang hian to kan ti mai thei e, amaherawhchu, Rs 30 hian kuhva pack khat pawh a lei zo ta lo chu a nih hi, a to lutuk hran lo e. Tuna kan sawrkar tharin non-NFSA bik tana buhfai khulna man a tisang tur hi ka thlawp a, kalphung thar hi a ṭha turah ngai ang.

Sawrkar thar hian buhfai non-NFSA tan 100%-a a tisang ngam a nih rau rau chuan, tuna kan godown neih pawh hi titlem leh law law se, kan state sawrkar sum sen hi a tlem leh zual ngawt ang ! RTI hmanga Deptt lamin chhanna min pekah Mizoram pumah Supply godown hetiang hi kan nei mek:

1. Principal Distribution Centre – 10

2. Subsidiary Distribution Centre – 17

3. Supply Centre – 97

PDC leh SDC hi chu thu dangah ngai ta ila, supply centre 97 la awm hi tihtlem theih niin a lang. Aizawl leh a chhehvel khuate hian Zuangtui Godown aṭangin retailer-a sem tur an la hlawm a, a hla ber chu km. 30 chuang lai a ni thei ang. DCSO, Aizawl West chhung bik thlir ta ila, supply centre hi khaw inhnaih te te, Reiek, Khawrihnim leh Kanghmuna awmte hi hmun khatah chhun khawm ni ta se. Deptt tan thawktu indaih lohna leh godown enkawlnaah mai piah lamah, transit loss leh godown loss a ziaawm phah ngeiin a rinawm.

- RL Rindika (Diktea)