Kûtpui leh veng chei

Khawvel huap hunpui leh, Mizotena a uar thei ang bera kan hman, Krismas leh Kumthar kan hmang liam a, kût rilruin min la ṭham hlawm a, hnathawh pawh a phurawm loh hle. Heng hunpui pahnih hian Mizote nunah nghawng a nei nasa a, kum hi a tawp hliah hliah a, chumi hnuah kum h a thar leh hliah hliah bawk.

Kum dang zawng aiin tun Krismas leh Kumthar vuakvetah puipunna leh huau huau a tam niin alang a, mipui pawhin hetiang rilru hi kan pu deuh ṭhup niin alang. Mizote nunhluia Krismas boruak leh lunglen kha khawpuiah chuan a reh tial tial niin alang a, Bethlehem deuh ruih kha hmuh tur a tlem ta hle. Kan kawtthler leh hmun cheimawinain a nghawng a ni thei ang em?

Kawtthler leh kawn kan chei dan kha a nihna takah chuan Isua pian hunlaia Palestina ram rim nam miah lo deuh hlir a ni a, Nordic pagan influence hmuh tur a tam tial tial. Bungkawn lamah Palestina deuh ruiha chei hmuh tur a awm a, tûm thing leh sanghawngsei lemte siamin an dah a, a Krismas hlein ka hria. Cheimawi hrim hrim kha kan tum a ni ber a, veng tam tak chu kan hlawhtling hle. Bethlehem Veng lamin an chei dan pawh kha a Krismas viauin ka hria.

Changkanna leh hmasawnna kan ûmna lamah hian kan nghah chhan ber hi kan hlat tial tial thung niin alang. Lênchungho mitthi ina kal kan ang ta deuh viau mai. Lênchung nuho mitthi ina kal haw lam zinga pakhat chuan, "Kan mitthi ber kha tunge maw ni le?" a ti a, pakhat chuan, "Tapchhaka vaibel zu hluah hluah kha a ni lawm ni," a ti a, pakhat chuan, "Kawta an rawh ṭhen ṭhi ṭhe kha a niang," a ti e, an ti. Hetiang deuh hian Krismas awm chhan ber pawh hre tawh meuh lo leh hrechang lo lêkin kan lâwm chu a ni ber.

Kumthar chu kumthar a ni a, engtin pawhin lo lawmin a pawi lo e; Krismas kan lawm dan, hmuah dan leh lawm tura kan inpuahchah dan aṭangte kha chuan kohhranho pawh han hlim mup mup thei tur zia chu kan ni lo e. A kum têlin kan ro tial tial hmel. Kâwn leh hmun remchang kan chei dan tam tak kha chu fairytale leh Europe-ho Kristian hmaa an thil tih ṭhin ang hmangin kan chei ber. Êng kût ang lek lekin kan lâwm ta a, vaiho Diwali te nen pawh khaikhin theih a ni deuh tawh tlat mai. Hetiang hi kan chîng zel dawn nge, 'Kristian theme zawkin' kan ti dawn, tih chu veng neitute thu a ni e.

Tunlai ṭhalaite hi huau huau châkin kan tui a hal emaw ni tih mai tur a ni a, veng hrang hrangah, veng neituten eng zan zan emaw kan siam a, thâwm a ṭha thei em em a, kan lâm luih luih mai. Hei hian a bikin Aizawl khawpui chhunga mite thlarau nun a lantir hle. Pathian thu emaw, a ram leh a felna kan zawng tawh lo hle a, taksa nawmna leh nun nawmna tur ringawt kan ngaihtuah nasa ta hle a ni tih a hmuh theih. A nghawng leh a kal zel chu kohhran ṭhalai pawl hrang hrangah a lang zui zel ang a, thutak aiin huau huau lamah kan kal na tial tial dawn a nih hmel. Member tam zawkte phurna leh an ngaihtuah zawng a nih zawk miau chuan inkhawm tur hmuh loh emaw, tlem te inkhawm ai chuan hetiang zawnga kal zawk zel hi a ṭul phahin a rinawm. Kohhran inkhawm pangngai pawh a la nghawng chho zel ang.

Tih loh tur a tih theih ngawt lo a, amaherawhchu kum kal zela kan tih zel dan turah, kawn leh hmun remchang kan chei hian Kristian theme hmang hnem tial tial ila, chutah chuan Mizo zia pawh bilh hnem tial tial theih nise a duhawm hle. Veng cheia pakhatna latu Armed Veng inpekna leh an thawhrimna a fakawm rual rualin, pã lem lian pui puite kha a timawitu hrim hrim atan chuan a ṭha a, Kristianna nen chuan inkaihhnawihna a nei lo khawp mai. Lasi thawnthu kan chang a ang mah zawk. Nakkin lawkah chuan kan Krismas hmannaa tel châk hnam dang tam tak an la awm ang a, chung mitena kan hnamzia leh kan sakhua an hmuh thiam theih dan tur zawnga cheimawi kan thiam a pawimawh hle ang.