Kohhran thawhhona

Tunhnaiah Evangelical Church of Maraland hmalaknain Mizoram Presbyterian Kohhran leh Baptist Church of Mizoram ten inremna an neih leh theihna turin inbiakna buatsaih a nih tur thu ka lo chhiar a, ECM hmalakna a chhuanawmin a fakawm hlein ka hria.

Mizoram Presbyterian Kohhran leh Baptist tena ramri fel tak nei a, rawng inbawl tawn a, inpalai tawna kum tam tak an kal hnuah hetianga innêk zawnga an kal ta hi a pawi a, Mizote zingah nghawng a nei lian a, Chhim leh Hmar inepna lian tak a siam a. Ramthara hmalaknaah buaithlak tam tak a hring a, tualchhunga kohhran hrang hrang a tam chuan inpumkhatna a ṭha tâwk thei lo bawk. Politics lam thlengin nghawng lian tak a nei a ni.

Thawhhona leh inpumkhatna chungchangah Mizoram kohhrante hian ṭan an lak a ngai hle mai. Mizo Theological Association-in inpumkhatna a awm theih nan nasa takin hma a la a, inrawnkhawmna leh sawihona tam tak a lo buatsaih tawh bawk. Mizoram Kohhran Council (Council of Churches in Mizoram) din tumin hma an la a, kohhran hrang hrang hruaitute ko khawmin sawihona an lo buatsaih fo tawh a ni.

Mizo hnam tlêm tê kan ni a, kohhran hrang hrang kan ṭhahnem hle. Hei hian khawtlang inpumkhatna a nghawng a, ram inpumkhatna a nghawng a, chhungkua a ṭhen darh nasa hle. Kohhran lian pahnih hi a hma anga an thawhho leh theih chuan hei ringawt pawh hian nghawng a nei lian hle ang.

Ram pawna mission rawngbawl hna thawh­naah te hlei hlei hian thawhhona ṭha hian rah a chhuah nasa dawn. Ram bial khat, zau vak loah kohhran hrang hrang mission an lut a, ringthar neih tum ṭheuh an ni a, luhna ngaiah an inluh chhawk sek a, chutah mahni beram hum tumin theihtawp an chhuah ṭheuh bawk. Hengte hian ramthar atana kan sum leh pai thawh tam tak hi a tihek lehzual hle. Khaw pakhatah mission hrang hrangin biak in kan din thluai thluai a, Kristianna la hre ngai lo tan leh, hre tir tan chuan hriatthiam a har ang a, Kristianna chu inngeih lohna hringtu angah an hmu mai ang tih a hlauhawm hle.

Organic Union hi chu tun dinhmunah chuan beisei ngam ni chiah lo mah se, duhthusam a ni. India ram ril lamah erawh an ti thei tlat mai hi a ropui hle a ni. Thurin inhlat tak tak, Pathian biak inkhawm dan inang lo tak takte an inzawmkhawm a, Church of North India leh Church of South India te a'n ding thei a, a ropui a, Pathian a ropui zual hle a ni. Hetiang taka kohhran inzawmkhawmna ropui hi khawvelah pawh a thleng tam lo hle. Mizoramah pawh hian a theih ve ngei mai. Hnam khat, ṭawng khat hmang kan ni a, chhuahna hmun khat kan ni. Tih tur awm chhun chu kan chapona kan paihthlak a, kan nihna ṭhin kalsan ngam a ni.

Organic union hi kan thei lo a nih pawhin ramthar rawngbawlnaah tal hi chuan thawhhona leh inremna emaw neih a, mission pakhat luh tawhnaa mission dang luh loh tia kan kal theih chuan thlarau bo zawn nana kan sum sen tam tak hi a kiam ang a, mission mal pakhatin hna kan thawk nasa zual thei dawn a ni. Rawngbawlna tur chin bik ram tal hi insiam thei ila chuan a lawmawmin, a Kristian ngawt ang.