Halpuah hal chhan media leh sorkar

Kumhlui thlah zanah halpuah hal miah loin Aizawl khawpui a awm thei ta a, Mizote thuawih theihzia leh kaihhruaitu an ṭhat chuan ṭha taka enkawl theih kan nihzia an sawi an sawi a, kei chuan ka rilru te tein kaihruaitu lam ni loin 'media power' vang a nih thu hi ka pawm dan a ni.

Chumi tichiang tur chuan kum 2015 kan hmuah zanah meuh chuan halpuah a ri leh ta a, hei hi kum 2014-a media lamin halpuah hal loh an ziah loh vang a ni.

Ka hriat sual loh chuan Vanglaini ngei hian halpuah hal lo tura inzirtirna painting nge drawing competition-te kha in siam a, naupangin halpuah hal loh an duh mai ni loin hal lo tura mipuite zirtirtuah an ṭang a, chu mai ni loin Vanglaini chanchinbu pawh hi halpuah hal lo tura campaigner hlawhtling tak a lo ni tawh.

Kha hlawhtlinna kha Vanglaini hian a tawk emaw an ti mai a, kum 2014-ah halpuah hal loh lam slogan leh thil lem tarchhuah an nei ta miah lo a, kumhlui thlah zan a nih chuan halpuah a ri leh ta chuah chuah mai. Hei hi kan tihreh leh thuai loh chuan Mizoram khawpui ber hi zên khu hrisel lo takin a bawh khat leh chûk ang a, chu chu zan khatah thamral mai loin mi tam takin an hrisel loh phah ang a, ran vulhin an tuar ang a, kan ramin a chhiat phah leh dawn.

Ka ui em em ṭhin chu halpuah leina sum kan sen Vaiho kuta lut khu a ni a, chuvangin media lamin in tih tur ti leh ula halpuah chu a rem leh mai ang.

Sorkar pawhin thuchhuah siam an duhtawk velin ka hria a, a takin an bawhzui ṭha lo a ni ngei ang. Kumhlui thlah ni khan Zarkawtah ualau takin halpuah leh rocket tih vel an inchuh luai luai ka hmu a, bazar chhungah ka lut lo nangin ka ṭhianpa chuan halpuah lei tur an zawrh thu a sawi tlat mai. a hal tur ber ualau taka an zawrh chuan an hal ngei ang tih chu thil chiang sa a ni mai lo'm ni?

Halpuah hal thar chhan chu media-in campaign an tihtawp vang leh sorkar inthlahdah vang a ni. Media hi an pawimawh zawkin ka hria.